Brian Mariano ta subi pista di atletismo atrobe

PAPENDAL, Hulanda – Brian Mariano lo ta bek riba pista di atletismo djasabra 11 di mei durante di e 31 edishon di e kareda Ter Specke Bokaal na Lisse. Esaki ta e promé kareda di e di 17 temporada di Lotto Baancircuit. Mariano ku aña pasa a bira kampion Europeo ku e ekipo di relevo 4×100 meter lo partisipá pa su ekipo Rotterdam Atletiek riba 150m.

E di dos kareda di Lotto Baancircuit lo ta djasabra 18 di mei kaminda na Hoorn lo tin e Flynth Recordwedstijden. E di tres kareda ta Golden Spike, ku lo tuma lugá djadumingu 9 di yüni na Leiden. 7 di yüli e kompetensia ta bai sinta na Leiden den e Klaverblad Arena Games. E ultimo kareda di e temporada ta riba 7 di sèptèmber kaminda lo tin e Eef Kamerbeek Games na Eindhoven.