WILLEMSTAD – Tur aña e wepsait di notisia Hulandes NUsport ta publiká un lista di e 100 atleta nan Hulandes ku a gana mas tantu sèn durante di e aña. E promé tres lugá nan a bai pa tres futbolista, kual ta: Wesley Sneijder, Robin van Persie i Arjen Robben. Sneijeder ku ta kabesa e lista di atleta nan hulandes mihó paga a gana 12,2 mion euro durante e aña ku a pasa.
Di e 100 puesto nan, solamente 21 lugá a wòrdu okupá pa atleta nan ku no ta hunga futbòl. Un di e atleta nan aki ta e hóben yu di Kòrsou, Churandy Martina. Segun NUsport den 2012 Martina a gana no ménos ku 650.000 euro. E lista kompletu lo keda publiká mañan den e revista NUsport Magazine.