Segun Konseho Supremo Elektoral e promé parti di dia di elekshon a bai relativamente trankil.
Ku eksepshon di algun detaye mínimo na algun urna, e dia di elekshon a habri relativamente trankil i sin ningun insidente importante. Konseho Supremo Elektoral a konstatá detaye logístiko ku e áwaseru fuerte na vários parti di Kòrsou a okashoná. Na un manera fásil a resolvé esakinan.
Apesar di e áwaseru e kantidat di hende ku a vota te ku awor ta surpasá e kantidat di e elekshon último. Nos por menshoná ku un total porsentahe di 23% ku ta ekivalente na 26.882 di e totalidat a bai vota te ku awor. Miéntras e porsentahe di e elekshon na 2010 tabata 20%. E kantidat aki ta un indikashon hopi kla ku e interes pa bai vota den e elekshon aki ta basta grandi. Tambe siudadanonan te ku awe ta akudí na ofisina di Asuntunan Públiko (Kranshi) pa buska nan karchi di vota. Segun e ofisina menshoná un kantidat di 728 persona a bin buska nan karchi awe mainta lokual ta hasi e kantidat total di persona ku a bin buska nan karchi di vota 3506.
Aparte di dos insidente chikí ku a resolvé nan mes, polis no raportá nada ku por influensha elekshon.
Klik aki pa siguí e kobertura kompletu bibu i direkto di Elekshon Kòrsou 2012.