E derecho di voto ta un derecho sagrado ku kada suidadano mester hasi bon uso di dje pa eligí su representantenan den nos parlamentu. Konseho Supremo Elektoral banda di organisá e elekshon, na un forma konfiabel i transparente, tin tambe e tarea pa stimulá mas tantu hende, ku derecho di voto, pa hasi bon uso di nan derecho.
Pa e motibu aki Konseho Supremo Elektoral di Kòrsou a kuminsá ku un kampaña pa stimulá pueblo pa bai vota. Un i tur por tuma nota di e mensahenan den medionan di komunikashon pa enkurashá i rekordá e votadó pa bai vota.
Banda di esaki lo rekordá e votadó riba tur lokual bo mester pa bo por efektuá bo voto korekto. Ta pone atenshon tambe riba e loke nan no mester i por hasi na momentu di efektuá bo voto.
Presidente di Konseho Supremo Elektoral, sr. Geomaly Martes a bisa: “ Nos ta drentando e rekta final rumbo pa elekshon pa representantenan den Parlamentu di Kòrsou djabièrnè dia 19 di òktober próksimo. Un di e tareanan di Konseho Supremo Elektoral ta pa stimulá nos pueblo pa hasi bon uso di su derecho di voto. Nos ke rekordá e votadó tambe riba loke ta nesesario pa e por vota i depositá un voto válido. Por último nos ta hasi uso di e oportunidat pa un biaha mas deskonsehá akshonnan ku no ta ser permití na momentu di vota.”
Konseho Supremo Elektoral Kòrsou anteriormente a lansa su website www.kse.cw i a repartí un foyeto ku informashon balioso tokante votashon. Bal bishita e website òf konsulta e foyeto pa tuma nota di tur informashon relevante. E kampaña pa motivá e votadó lo konsentrá den korant, radio i televishon.
Tuma bon nota di e mensahenan di e kampaña aki, hasi bo eskoho pa e kandidato ku bo ta sostené i Sali bo kas bai vota dia 19 di òktober próksimo.