Ministerio Públiko di Kòrsou ta pèrmiti, pa un temporada indefini, pa yag riba Lionfish den laman territorial rondo di Kòrsou. Esaki entrante 8 di oktober 2012 i te ku próksimo aviso i ta konta solamente pa personanan ku ta yag den grupo organisá, i hasiendo uso di un asina yama ‘ELF’ òf polespear.
Ministerio Públiko ta enfatisá ku no ta permiti pa hasi uso ku obhetonan manera ‘Hawaïan sling’ òf speargun. Ta pèrmiti solamente uso di un ‘ELF’ of un polespear. A tuma e desishon pa pèrmiti yagmentu tenporal riba Lionfish pasobra, sigun ekspertonan, ta urgente pa trata na erediká Lionfish den nos laman. Ta trata di un piska predetor ku tin influensia hopi negative riba koral i flora i founa di bou di laman.
Ministerio Públiko ta korda tur esnan ku ta yag riba Lionfish, ku ta keda nan responsabilidat pa registrá nan mes komo yagdó di Lionfish i pa mantene komunikashon ku Warda Kosta ora yag riba Lionfish.
E instrukshon ariba menshoná ta konta solamente pa yagmentu den gupo organisá riba Lionfish. Yagmentu riba tur otro piska ta prohibi. Esnan ku keda gará ta yag riba otro piska por keda persigui i nan armanan por keda konfiská.
Leinan aktual di Kòrsou no ta pèrmiti yagmentu bou di laman ku armanan spesifiko pa esaki. Realidat ta ku kambio di e lei eksistente ta tuma muchu tempu pa keda realisá. Pa e motibu aki a skohe pa un instrukshon pa medio di Ministerio Públiko ku ta pèrmiti yagmentu den grupo organisá riba Lionfish.