Rekompensa NAF. 10.000 pa tep den kaso dòbel asesinato di Chinesnan Moontjiweg

Komunidat Chines ta ofresé un rekompensa di NAF. 10.000,- pa esun ku duna informashon konkreto ku ta kondusí na detenshon di esnan responsabel pa e asesinato di e dos personanan di orígen Chines djaluna, 17 di sèptèmber último, na Yen Lee Snèk na Moontjeweg.

Pa duna informashon mester hasi uso di e numbernan di polis menshoná aki bou ku ta duna garantia di anonimidat: 8666 249 òf 8666 250 òf 108.

Riba e dia enkuestion e pareha Chines aki den kompania di un yu menor di edat a yega kas ora nan a wòrdu sorprendé pa tres atrakadó, den posishon di arma di kandela ku a menasá nan i e sospechosonan a lòs bala promé riba e señora ku a resultá den su morto i despues riba e hòmber sinta den su outo ku konsekuensia ku e hòmber tambe a pèrdè su bida.

Ministerio Públiko ta hasi un súplika na komunidat pa dado kaso tin informashon balioso, pa duna esaki pa di e forma aki por yega na detenshon i persekushon di esnan responsabel.