WILLEMSTAD – Ministerio Públiko (OM) a disidí pa entrante awe eksihí kastigunan di prison mas haltu ora ta trata kasonan di atrako kontra esnan vulnerabel den nos komunidat. Den e kaso aki mester pensa entre otro riba esnan di edat mas haltu i hende muhé.
A registrá últimamente na Kòrsou un oumentu di ladronisia ku violensia (atrako i atrako armá) riba hende muhé i ansianonan den nos komunidat. E desaroyo aki a resultá resientemente den un reunion interno na unda a trata e desaroyo prekupante aki. A disidí pa oumentá e demanda den Korte di Hustisia ora ta trata di krímennan manera ariba menshoná.
Aktualmente e demanda máksimo pa un atrako armá ta 12 pa 15 aña di prison i 18 aña ora e atrako a resultá den morto di e víktima. Lo bai eksihí mas kastigu, den kaso e ladronisia ku violensia ta kontra hende muhé òf ansianonan. Ku e desishon aki Ministerio Públiko ke manda un señal fuerte pa komunidat ku no ta bai tolerá mas e violensia kontra esnan mas vulnerabel den nos komunidat.