Stichting Tegen Kindermishandeling ta sumamente kontentu ku e forma profeshonal kon Korte a atendé e kaso di James Murray djaweps mèrdia.
For di komienso te final e tratamentu di e kaso a kana di un forma manera deseá. Siman ku a pasa Stichting Tegen Kindermishandeling a emití un komunikado kaminda e ta deseá Korte forsa i sabiduria den tratamentu di e kaso i esaki sigur ta loke e fundashon kontra abuzu di mucha a tuma nota di dje awe mèrdia.
Tantu Wes komo Abogado General a atendé e kaso ku hopi koutela. Stichting Tegen Kindermishandeling tin komprenshon pa e echo ku ta pa promé biaha den historia ku Korte ta trata un kaso kaminda mester evaluá liberashon di un kriminal grandi despues ku esaki a sinta 33 aña di kastigu di prizòn. Loke mas ta hasi e kaso unu interesante ta e forma kon komunidat a reakshoná for di momentu ku a bira konosí ku 10 di mei ta dia pa trata kaso di James Murray.
Wes na prinsipio di e kaso a splika esnan presente, spesialmente e famianan di Darly Lai ku Korte tin komprenshon pa e forma kon e famia ta sinti tur e añanan.
Wes a splika bon kla alabes e kontenido di e lei 1.30 ku ta duna akusadonan ku risibí bida largu i ku a sinta 20 aña di kastigu, e oportunidat pa apelá pa libertat. Banda di esaki konstantemente Wes tabata pidi pa e opinion di Abogado General riba puntonan di importansha i nesesario pa yega na un desishon den e kaso.
Den e kaso aki tabata falta dos rapòrt importante pa yega na un desishon. Ta trata entre otro e rapòrt sikiátriko di James Murray pa mira si su komportashon ta unu residivista o sea ku e por ripití loke el a hasi, i alabes e rapòrt di su komportashon den prison na Kia Aruba.
Tabata deseo di Famia Lai pa trata e kaso di Murray na Korsou, teniendo kuenta ku Murray mes ta na Aruba. Despues di deliberashon, Korte a yega na e konklushon ku lo trata e kaso aki na Kòrsou mes dia 6 di sèptèmber próksimo.
Wes a mustra ku e tin komprenshon pa e ansha di tur hende den e kaso aki pa un desishon mas pronto posibel den e kaso aki, pero Wes ta kere ku ta importante pa risibí e rapòrtnan enkuestion i pa tuma tempu pa e kaso kana bon. Tambe Wes ta kere ku ta importante pa trata e kaso ku tur e koutela nesesario i a pidi sala i famia su koperashon i komprenshon den esaki.
Tur kos huntu tabata un tratamentu ku a kana bon. Stichting Tegen Kindermishandeling ke sigui deseá sabiduria na Korte durante kontinuashon di e kaso dia 6 di sèptèmber próksimo.