Ministerio Públiko a tuma nota di e konferensiá di prensa di Minister di Hustisia, sr. Elmer Wilsoe. Relashoná ku esaki nos ta enfatisá ku nos ta respetá e desishon di Minister pa hala aden e mandato ku Prourador-general tin pa ehekutá desishonan na nomber di Minister. Prokurador-general a aktua sinembargo, den e kaso “Bientu” i den tur korespondensia, konforme e mandato ku e tin for di 1993.
Ta importante pa den e kuadro aki duna un rekuentro di loke a tuma lugá te na e momentunan aki:
Ministerio Públiko a diskubri, durante investigashon “Bientu”, montantenan kuantioso na Estádos Unídos ku tin tur indikashon ku ta plaka prosedente di labamentu di plaka. Ministerio Públiko a pidi wes-komisario durante un seshon será (besloten procedure) pa pone beslag conservatoir riba e fondonan aki. E apodrashon aki a keda otorgá dia 14 di yuli 2011.
Komo ku tin sospecho fuerte ku e fondonan aki ta pertenesé na algun persona huridiko (rechtspersoon), a pidi wes-komisario pa pone un beslag conservatoir tambe riba e fondonan aki. E apoderashon aki a keda otorgá dia 19 di yanuari 2012. Tabata tin pues aktuashon di un beslag dòbel.
Pa ehekuta ambos beslag Ministerio Públiko a pidi Estádos Unídos asistensia huridiko (rechtshulpverzoek) 29 di yuli 2011 pa beslag # 1 i 15 di februari 2012 pa beslag # 2.
Dia 4 di aprel 2012 Korte di prome instante a fiha ku beslag # 1 tin ku keda hisá. Wes no a bisa den su veredikto niun momentu ku e beslag tabata ilegal. No pa motibu ku e beslag tabata ilegal pues, pero dor ku Ministerio Públiko no a pone den un kuadro di un investigashon penal finansiero kontra e dos entidatnan huridiko. Pa no perhudika e investigashon andando, Ministerio Públiko no a trese tur informashon riba mesa.
E opheshon den kaso di beslag # 2 no a keda tratá dor di wes, komo ku e abogadonan no a sigi e prosedura korekto. No tin ningun desishon di Korte pa hisa beslag den esaki. E abogadonan te dia di awe no a entama e prosedura korekto. E abogadonan a entama un huisio sumario penal, pero mester a enkaminá e prosedura di prosedimiento di opheshon (bezwaarschriftprocedure). Pa e motibu aki e apoderashon di 19 di yanuari 2012 ta keda intakto.
Ministerio Públiko e mesun dia (4 april 2012) a informá Estádos Unídos e desishon di wes i a pidi Estádos Unídos mesora pa ehekuta apoderashon # 2 na lugá di apoderashon 1.E petishon aki a keda entrega dor di ministerio Públiko por eskrito na Estádos Unídos dia 5 di aprel 2012.
Ministerio Públiko ta enfatisá pues ku no a aktua illegal, pero realmente konforme un desishon di un wes independiente. Ministerio Públiko a aktua di buena fe, den interes general i den konkordansia ku nos leinan. Minsiterio Públiko a informa Minister di Hustisia i outoridatnan di Estádos Unídos di tur e pasonan ariba menshoná. No opstante esaki tòg Minister di Hustisia a manda su karta pa Estádos Unídos.