Stichting tegen Kindermishandeling ta sigui den full swing ku su proyekto di “DO BLUE”, e inisiativa di e fundashon den kuadro di e luna di konsientisashon kontra abuzu di mucha. E siman ku a pasa e fundashon tabata presente na diferente organisashon, kompania, kas di famia i skol pa kompartí ku nan e mensahe ku abuzu di mucha mester stòp.
Míles ya kaba, for di prinsipio di e proyekto aki, a konosé e señalnan di abuzu i e formanan kon pa kombatié. Sigur den e temporada aki ta sumamente importante pa kuminsá ku prevenshon na rais.
E bario di Soto tambe a risibí un charla interesante ayera di Coraline Kooistra presidente di e fundashon riba Edukashon i Komunikashon entre mayor i yu. Alabes a laga e hóbennan partisipá na diferente wega i e kolo blou kontra abuzu i violensha di mucha tambe tabata visibel tur kaminda.
E blue ribbon, o sea sinta blou kontra abuzu tambe a wòrdu pega na kurpa di tur partisipante. Diferente skol tambe a risibí presentashon i konosementu di e fundashon riba e lucha inkansabel kontra abuzu di mucha.
E siman ku ta drenta aki atrobe ta un siman yena ku aktividat, i Stichting Tegen Kindermishandeling lo ta na diferente skol, kompanianan pa sigui plama e mensahe. DO BLUE i Stichting tegen Kindermishandeling ta kontinuá.
Esnan ku ta interesá pa duna nan sosten na e fundashon òf ku ke djòin den e lucha por tuma kontakto ku e fundashon na 522-1235 òf via email kindermishandeling@gmail.com