Manera Deporte Awe! a relatá anteriormente, tin un otro yu’i di Kòrsou ku ta partisipá den e kompetensia Mundial di atletismo na Daegu, Sur Korea. Ta trata aki di e hóben yu di Kòrsou, Geronimo Goeloe. Den pasado Geronimo a yega di partisipá kaba na diferente kompetensia internashonal i a forma parti di e selekshon di Antia ku a sali na di seis lugá den e kampionato Mundial di atletismo na 2005. Kontrali na Churandy Martina i Brian Mariano, Geronimo ta kore pa isla ruman i bisiña, Aruba. Geronimo lo bai partisipá den 100m meskos ku Churandy. Esaki ta nifiká ku si tur kos bai bon Kòrsou por tin dos di su yu nan den final di 100m.
Geronimo Goeloe lo kore su promo kareda dia 26 di ougùstùs alrededor di 11:55pm (ora di Kòrsou). E kareda aki ta un di e kareda nan preliminar den e kompetensia di 100m, esaki ta nifiká ku Geronimo tin ku sali den e tòp tres nan den su kareda pa pasa pa e siguiente buèlta. Si Geronimo no logra esaki e mester sòru pa tin e mihó tempu den tur esun nan ku no a klasifiká pa asina pasa pa e siguiente buèlta. Keda pendiente di Deporte Awe!, manera nos tin resultado di e kareda aki nos lo publiká esaki.