Resientemente a keda publiká den notisia e afan di Promé-minister Gerrit Schotte pa logra yega na un propio Komishon Nashonal Olímpiko. Riba su mes esaki no tin nada malu kuné i en realidat ta algu bon ku gobièrnu ta hasi tur loke ta posibel pa Kòrsou yega na un Komishon Nashonal Olímpiko.
Pa bo por yega na un Komishon Nashonal Olímpiko tin sierto kosnan ku e pais ku ta pidi rekonosementu mester kumpli kuné. Den e artíkulo aki mi no ta bai drenta den e rekisito nan ku Kòrsou mester kumpli kuné pa por yega na su propio Komishon Nashonal Olímpiko, pero mi ta bai asumí ku Komité Olímpiko Internashonal ta aprobá e Komishon Nashonal Olímpiko di Kòrsou.
E Komishon Nashonal Olímpiko su mishon ta desaroyá, promové i protehá e Movementu Olímpiko na Kòrsou. Banda di esaki e Komishon Nashonal Olímpiko tin e derechi pa manda atleta nan, ofisial nan di ekipo i otro personal di ekipo na e Weganan Olímpiko.
Pa un atleta por partisipá na Weganan Olímpiko e mester partisipá na evento nan klasifikatorio organisá pa e diferente Federashon nan Internashonal di deporte(por ehèmpel, IAAF, FIFA, FINA etc.). Na e momentu ku e atleta kumpli ku e rekisito nan klasifikatorio buta pa e Federashon Internashonal di deporte i Komité Olímpiko e atleta ta wòrdu rekomendá pa su Federashon Nashonal (por ehèmpel, Federashon di Futbòl Kòrsou) di e deporte ku e ta práktika na e Komité Nashonal Olímpiko di su pais. Na su turno e ora ey e Komishon Nashonal Olímpiko di e pais ta disidí si e ta manda e atleta Weganan Olímpiko si òf no.
E problema di Kòrsou ta sinta den e echo ku pa por ehèmpel e deporte di atletismo nos NO por tin un Federashon Nashonal atletismo ku ta wòrdu rekonosé dor di nos Komishon Nashonal Olímpiko, te pa esaki rekomendá nos atleta nan na e Komishon Nashonal Olímpiko di Kòrsou i pa asina nan por partisipá na e Weganan Olímpiko. Un di e rekisito nan ku mester pa un Federashon Nashonal di deporte wòrdu rekonosé dor di su Komishon Nashonal Olímpiko ta ku e Federashon Nashonal mester ta afiliá na un Federashon Internashonal di deporte ku ta rekonosé dor di Komité Olímpiko Internashonal. Den e kaso di atletismo nos no por ta afiliá na IAAF ya komo nos no ta pais independiente i esaki ta hiba kuné tambe ku nos Federashon Nashonal di atletismo no por bira miembro di nos propio Komishon Nashonal Olímpiko. Esaki ta nifiká ku e desishon tuma dor IAAF no ta afektá nos solamente pa loke ta trata e kompetensia nan di IAAF pero tambe den Weganan Olímpiko.
E loke a wòrdu menshoná anteriormente no ta konta solamente pa e deporte di atletismo pero e ta konta pa tur otro deporte ku pa un òf otro motibu no por ta afiliá na un Federashon Internashonal di deporte ku ta rekonosé dor di Komité Olímpiko Internashonal. Esaki ta pone mi yega na e konklushon ku te na e momentu nan aki si Kòrsou haña su Komishon Nashonal Olímpiko mes, ta Federashon di Futbòl Kòrsou so lo por bira miembro i asina kana e kaminda pa yega Weganan Olímpiko.
?