WILLEMSTAD – Komishon Deportista di Luna a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Yüli 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.
E komishon a yega na e siguiente nominadonan:
1. Chade Nercisio. Chade ta praktiká e deporte di natashon i durante di luna di yüli último, tabata parti di e delegashon lokal ku a kompetí den e kompetensia di CISC, den representashon di Kòrsou. Nos representantenan a regresá kas ku 10 medaya i tambe 10 finalista na di 4 lugá, unda tur landadó di Kòrsou a logra yega final den nan kompetensianan. Chade durante di e kompetensia aki, a logra vários medaya i kibrando dos rèkert i tambe a optené e trofeo di mihó landadó den su kategoria. Chade ku e logronan aki, tambe a drecha su tempunan i posishoná su mes mas altu den ranking di Karibe, meskos ku demas landadónan lokal, yudando Kòrsou pa mantené su mes den tòp 10 di Karibe. Pa e motibunan menshoná, Chade Nercisio, un biaha mas, a keda skohe komo nominado pa deportista di luna, bálido pa luna di yüli 2014.
2. Gernailys ‘Nelly’ Zimmerman. Gernailys tabata parti di e delegashon di Federashon Biar Kòrsou, ku a bai Medellin Colombia i a partisipá na ‘Campeonato Panamericana de Pool’, den representashon di Kòrsou. Tabata pa promé biaha ku a organisá tur e disiplinanan den un solo evento, kual nan tabata bola 8, bola 9 i bola 10. ‘Nelly’ un biaha mas a demostrá su abilidat den e deporte di biar i den e kategoria femenino bola 8, ta gana di e kampeon di Argentina, pa logra su pase pa semifinal. Den semifinal e ta kai vensí kontra di Carlin Sanchez di Venezuela, kende tambe ta bin resultá e kampion. ‘Nelly’ di e forma aki ta bin logra konkista e di tres lugá i ta gana medaya di Bròns den e evento bola 8 femenino di e ‘Campeonato Panamericana de Pool’. ‘Nelly’ tambe ta logra e premio di ‘Fair Play’ di e torneo, kual tabata premio ku pa promé biaha tabata disponibel. Pa e motibunan menshoná, ‘Nelly’ Zimmerman, a keda skohe komo nominado pa deportista di luna yüli 2014.
3. Richard Moesker. Richard ta picher di Wild Cats ku a gana 2 wega durante di luna di yüli 2014. Esaki ku hopi bon sifra. Riba dia 7 yüli, pichando pa Wild Cats kontra di Sta. Rosa Indians, el a tira 6.2 ining sin permití kareda. El a poncha 10 batidó kontrali i a permití apénas 3 hit pa gana e partido. Seguidamente tabata dia 28 yüli, ku Richard Moesker atrobe kontra di Sta. Rosa Indians, ta tira tres entrada di relevo. Esaki sin permití hit ni kareda i ku 5 ponche, pa duna su ekipo e viktoria i yuda pa Wild Cats registrá un ‘no hit no run’. Pa e motibunan ya menshoná, Richard Moesker a keda skohe komo un di e nominadonan, pa deportista di luna yüli 2014.
Komishon ta gradisí e siguiente spònsernan ku ta yuda pa e premiashon aki por bira posibel:
CHANGES PRO SPORT – RIO LOUNGE & SPORTS BAR- MCB – PETRO INDUSTRIAL NV – CSOF – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.
E anunsio i premiashon di e ganadó lo tuma lugá:
Fecha: Djasabra 30 ougùstùs 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.
Den un ambiente liber di humamentu i liber di alkohòl!