Author: E. Evertsz

Posted on

Breve Deporte Awe #1-026

  • E selekshon oropeo ku lo hunga dos partido di ekshibishon kontra e selekshon di Hapon dia 10 i 11 di mart próksimo lo biaha dia 3 di mart próksimo pa Hapon i lo ta na Hapon dia 4 di mart. Tur e peloteronan lo biaha huntu, ku eksepshon di peloteronan ku ta biaha for di Merka, Repúblika Dominikana i Venezuela. Promé ku e dos partidonan kontra e selekshon hapones, e ekipo di Tur-Strea Oropeo lo hunga un wega di praktika dia 8 di mart kontra e ekipo di Liga Menor di Yomiuri Giants. E selekshon di Tur-Strea oropeo ta konta ku seis pelotero di Kòrsou kual ta: Andruw Jones, Yurendell de Caster, Curt Smith, Dashenko Ricardo, Shairon Martis i Diegomar Markwell.
  • Wladimir Balentien lo no forma parti di e selekshon di Tur-Strea oropeo pa motibu ku e no ta kompletamente rekuperá ainda di e operashon ku e la hasi aña pasa na su pia. Sin embargo, Wladimir ta plania pa yega Hapon di 2 di mart próksimo. Ta spera ku e pelotero lo keda añadí riba e roster aktivo di Tokyo Yakult Swallows den komienso di aprel.
  • Detroit Tigers a yega na un akuerdo di un aña ku picher Joba Chamberlain. Chamberlain lo risibí un salario di 1 mion dòler mas 500 mil dòler di insentivo basa riba e kantidat di aparishon ku e pelotero hasi. E ekipo di Los Angeles Dodgers tambe tabata tras di e pelotero aki despues ku a bira konosí ku Kenley Jansen lo pèrdè entre ocho pa 12 siman. Temporada pasa ku e ekipo di Detroit Tigers, Chamberlain a drenta den 69 partido i tabata tin un efektividat di 3.57 ku dos partido salba.
  • E picher as di St. Louis Cardinals, Adam Wainwright mester a bandoná e kampamentu di entrenamentu di Cardinals na Florida. Wainwright lo biaha bek pa St. Louis unda dòkternan di e ekipo lo chek e picher despues ku e la sinti doló den su apdómen. Segun e picher e ta sinti mas mihó kada dia pasa pero ke chek ku un spesialista pa hasi mas klaridat riba e asuntu.
  • Chicago Cubs a anunsiá ku nan a kontratá Manny Ramirez komo konsehero di bateo pa e ekipo. Den 2014, Ramirez tabata entrenadó i pelotero pa e organisashon di Chicago Cubs den tripel A. Segun e ekipo Ramirez lo bai traha ku e peloteronan di Liga Menor i Liga Grandi riba e fundamentonan di bateo i aspektonan mental. Tambe e ekipo a añadí Kevin Youkilis komo konsehero part-time di scouting i desaroyo di peloteronan.
  •  MLB.com a hinka un lista den otro di loke nan ta kere ta e 10 ekiponan ku mihó ‘farm-system’ aktualmente den Liga Grandi. Segun MLB. com Minnesota Twins tin e miho ‘farm-system’ aktualmente.

1.  Minnesota Twins
2.  Chicago Cubs
3.  Pittsburgh Pirates
4.  Los Angeles Dodgers
5.  Colorado Rockies
6.  Texas Rangers
7.  Houston Astros
8.  Toronto Blue Jays
9.  New York Mets
10. Washington Nationals

Posted on

Rekompensa pa informashon den Kaso Maximus

WILLEMSTAD — Dia 5 di mei 2013 a mata Helmin Magno Wiels na pir di Marie Pampoen. E.R.K. a keda sentensiá pa medio di veredikto di 29 di ougùstùs 2014 pa e asesinato aki. Den e veredikto wes a stipulá ku E.R.K. a risibí pago pa e asesinato aki. E veredikto aki a keda konfirmá dor di Korte di Apelashon den su veredikto di 20 di febrüari 2015.

Den e investigashon Maximus ta investigando entre otro ken a duna òrdu pa e asesinato. E sospecho ta ku esnan ku a duna òrdu a rekurí na dos entermediadó ku a usa E.R.K. pa ehekutá e asesinato. Tambe tin e sospecho ku e dunadonan di òrdu a paga un montante grandi na e dos entermediadornan. E investigashon Maximus ta dirigí su mes pa e motibu aki tambe riba e fluho di plaka rondo di e diferente sospechosonan.

Probablemente E.R.K. a risibí djis un parti chikitu di e total di plaka ku a ser pone disponibel. Mayoria di e sobrá plaka a keda serka e entermediadornan. Den kuadro di e investigashon ta hopi importante pa determiná serka ken e sobrá plaka a keda of a keda alohá aktualmente.

Fiskal Mayó di Ministerio Públiko (OM) di Kòrsou a disidí pa pone disponibel un rekompensá na e persona of personanan ku ta pone OM riba e kaminda pa rastreá e plaka i pa konfiská esaki. E altura di e rekompensa ta 50 % (sinkuenta porshento) di e plaka ku finalmente keda konfiská a base di e tip(nan). Mester por determiná ku ta plaka ku a keda pagá pa e asesinato.

Esnan ku tip por tuma kontakto ku polis via e liña di telefòn anónimo 108.

Posted on

Swim Club Orca Curaçao na kaminda pa ta un klup grandi, sólido i ehemplar

WILLEMSTAD — Despues di 5 siman, entrenamentu di Swim Club Orca Curaçao ta bayendo hopi bon. Swim Club Orca Curaçao su promé treinen tabata dia 10 di yanüari 2015, e dia ei e klup a konta ku 9 mucha/miembro. Awe sinku (5) siman despues, e klup ta konta ku 30 miembro. Algu interesante ta pa mira, kon durante di e sinku (5) simannan aki ku tabatin treinen, tur dia mas i mas mucha ta bira miembro.

Djasabra dia 28 di febrüari awor, Swim Club Orca Curaçao ta organisá un aktividat di “team building” ku lo tuma lugá na Caracas Baai. Esaki ta pa e miembronan i “coachnan” siña konosé otro mihó i pasa un ratu huntu hasiendo aktividat di “team building” kantu di laman.

Swim Club Orca Curaçao ta un klup di landamentu nobo ku ta brinda su futuro miembro i aktual miembro e siguiente disiplinanan:

Landamentu kompetitivo; (“Speed zwemmen”)
Landamentu rekreativo;(trein pa tene kurpa den kondishon i distraishon)
Waterpolo; (“polo aquatico”)
Landamentu sinkronisá;(“waterballet”)
“Open waters”; (kompetí riba distansia largu den laman)
“Diving”; (kompetí den bula kabes i bula nechi for di springplank
“Master”;(treinen pa kondishon pa adulto)

Pa tur hóben ku ta interesá, Swim Club Orca Curaçao ta trein: djasabra di 15.30 or pa 17.00 or i djadumingu di 10.00 or pa 11.30 or na Pisina Bennie Leito.

Kontribushon ta Naf. 35,00 pa luna pa trein dos (2) biaha pa siman. Tin treinen pa adulto tambe riba djasabra di 17.00 or pa 18.00 or i djamars di 19.00 or pa 20.00 or. Kontribushon ta Naf. 50,00 pa luna pa trein dos (2) biaha pa siman. Swim Club Orca Curaçao, na kaminda di ta un klup grandi, sólido i ehemplar den nos pais.

Pa mas informashon por yama telefòn: 529 6586, Vernon Toré

Posted on

Breve Deporte Awe #1-025

  • E ekipo di Texas Rangers a anunsiá ku Jurickson Profar a keda opera ayera na su skouder drechi na Trinity Surgery Center na Arlington, Texas. Durante di e operashon, dòkter di e ekipo Dr. Keith Meister a drecha un sker ku e pelotero tabata den su múskulonan di skouder. Segun e dòkter e operashon a bai a bai bon i no tabata tin nada adishonal ku mester a keda opera den e skouder di Jurickson. E ekipo a duna di konosé ku Jurickson lo kuminsá un programa di rehabilitashon den e próksimo dianan pero lo no hunga beisbòl durante e temporada 2015.
  • Tambe Texas Rangers a anunsiá ku nan lo keda ku e pelotero Adian Beltre pa e temporada 2016 tambe. Segun e ekipo, Beltre lo risibí un salario di 16 mion dòler den 2015 i 18 mion dòler durante e temporada di 2016. Beltre temporada pasa tabata tin un promedio di .324 ku 19 honron i 77 kareda empuha den 148 partido temporada pasa.
  • E èks-pelotero di San Diego Padres den Liga Menor, Rodney Daal a yega na un akuerdo ku e ekipo di Evansville Otters den e liga di beisbòl profeshonal independiente. Aktualmente Daal tin un suspenshon di 100 partido pa uso di supstansiá prohibí. E suspenshon ta drenta na vigor na momentu ku e pelotero firma ku un organisashon di Liga Grandi. Temporada pasa Daal a hunga solamente 12 partido, esaki pa motibu di leshon i tambe un suspenshon di 50 partido. Den e 12 partidonan aki e pelotero a logra un promedio di .214 ku 2 honron i 6 kareda empuha.
  • E ekipo di Boston Red Sox a yega na un akuerdo ku e kubano Yoan Moncada. Segun informashonnan, Moncada lo risibí un bono pa firma di 31,5 mion dòler. Moncada ku ta un infielder, switch-hitter di 19 anja ta un dje prospektonan internashonal mas buska den historia resien. Ekspertonan ta bisa ku e pelotero ta un ‘5-tool player’ i skoutnan ta kere ku e lo por desaroyá den un pelotero similar na Robinson Cano. Distinto na e otro peloteronan kubano ku a keda firma anteriormente nan ta kere ku Moncada tin ku hunga sigur un pa dos temporada den Liga Menor promé. E ekipo di New York Yankees ku tambe tabata tras di e pelotero a ofresé un bono di 25 mion dòler ku e posibilidat di subi te ku 27 mion dòler. Los Angeles Dodgers tambe tabata tras di e pelotero i tabata dispuesto na paga te ku 35 mion dòler, pero e ekipo tabata ke pa Moncada warda te 2 di yüli próksimo pa firma.
Posted on

Breve Deporte Awe #1-024

  • E manager di Atlanta Braves ya a anunsiá ken lo ta e picher ku lo habri e promé wega di temporada regular pa e ekipo. Segun Fredi Gonzalez, si tur kos bai bon , Julio Teheran lo habri e promé wega di temporada pa e ekipo. Temporada pasa Teheran tabata tin un rèkert di 14-13 ku un efektividat di 2.89 den 33 salida.
  • E ekipo di Los Angeles Dodgers a yega na un akuerdo di un aña ku picher Brandon Beachy. Beachy tabata den e ekipo di Atlanta Braves promé ku nan a lag’e liber. E pelotero a pèrdè e ultimo dos temporadanan pa motibu di dos operashon Tommy John. E temporada aki tambe e pelotero lo kuminsá riba lista di hungadó inkapasitá miéntras e ta rekuperá di e operashon.
  • Segun informashonnan, tur kos ta bayendo bon te ainda ku Masahiro Tanaka. Ayera e picher a picha 34 bala den su di dos seshon di bullpen den e pre-temporada. Segun e picher, tur kos ta bon te ainda. Lo ke tabata mas importante pa Tanaka tabata ku e abilidat pa picha un tiki mas duru ku e biaha anterior.
  • Segun picher di New York Yankees, CC Sabathia e ta sinti su mes muchu mas mihó awor ku e la oumentá di peso. Sabathia a yega spring training pisando 305 liber. Segun e picher e ta sinti’e un tiki mas fuerte awor, e ta sinti su pianan mas sólido i por pusha ku mas forsa for di montikulo. Sabathia ke mantené su mes entre 295 pa 305 liber durante di e temporada. Mas aleu e picher a bisa ku e dòkternan di e ekipo i e trainernan ta di akuerdo ku e peso aki.
Posted on

Liemarvin Bonevacia i Denzel Comenentia kampion Hulandes

APELDOORN — Liemarvin Bonevacia a bira kampion Hulandes riba 400 meter indoor despues di a gana den final na e Nationaal Kampioenschap Indoor na Apeldoorn. Liemarvin a kore un tempu di 46,54 sekònde den e final. Tras di Liemarvin a finalisá Bjorn Blauwhof, miéntras ku na di tres lugá a finalisá e yu di Kòrsou Terrence Agard.

Terrence Agard a kore un tempu di 46,77 sekònde ku ta sufisiente pa logra klasifikashon pa e kampionato Oropeo Indoor na Praag, Repúblika Cheko otro luna. Liemarvin ya a logra su klasifikashon pa e kampionato Oropeo i a konsiderá e kareda aki komo un kalentamentu pa e kampionato Oropeo.

Aki dos siman den e kampionato Oropeo Liemarvin tin pensa di bende su kueru karu. Segun e atleta e ta sinti’e den su mihó forma i ta bai pa un medaya.

Den e mesun evento aki den disiplina di ‘kogelstoten’ tabata Denzel Comenentia ku a gana e título Hulandes ku un diferensia di 1 centimeter. Denzel a logra tira un distansia di 18 meter ku 87 centimeter.

Final 400 meter indoor

Kortesia di: Losseveter.nl

Posted on

Johnny Hellmund ganado prome torneo Bankpool

WILLEMSTAD — Pa promé biaha den historia di e deporte di biyar na Kòrsou a tuma lugá un torneo di e disiplina konosí bou di e nòmber di “Bankpool”. Esaki ta un disiplina di pool kaminda tur bola ku keda hinka mester mishi ku un banda di mesa promé ku e kai den buraku. E evento a keda organisá pa MacPool Promotions ku ta bou di direkshon di Michael Arvelo den selebrashon di su 25 aña organisando eventonan di biyar.

Djaluna, 16 di februari,13 biyardista invitá a bini huntu na pool arena riba Gosieweg i a kuminsá bataya kontra otro pa e promé título den e displina aki. Den buelta di ganadó tabata Johnny Hellmund ku a gana di Jeffrey Nieuwenhuyzen ku skor di 2-0 pa a pasa pa final.

Den buèlta di pèrdèdó Steven Ibrahim ta gana Roukous Tannouri kende ta keda na puesto 4. Steven ta bin topa Jeffrey i ta saka su sla bek ganando 2-1 i asina ta bai final kontra Johnny Hellmund. Jeffrey ta keda na puesto 3. Den e ultimo partido di e torneo “The Legend” Johnny Hellmund ta gana Steven Ibrahim 2-0 i ta titulá kampion di e promé evento di bankpool.

MacPool Promotions/Michael Arvelo kier gradisí tur e partisipantenan pa nan aporte duna na e evento y ta invitá un y tur pa keda pendiente pa nas aktividat pa siguí selebrá 25 aña di MacPool Promotions.

Posted on

Jetro Willems ku diferente donashon rònt Kòrsou

WILLEMSTAD — E Futbolista yu di Kòrsou Jetro Willems, ku ta militá den e ekipo di PSV Eindhoven na Hulanda i ku ta miembro di e selekshon nashonal di futbòl hulandes, durante di e dianan tras di lomba a entrega diferente donashon na diferente instansia i persona na Kòrsou.

Ta trata aki di sigur di un montante respetá di kasi 20 mil florin ku a keda repartí entre diferente instansia i o persona den nesesidat. Djasabra 21 di febrüari último a realisá e 3 último donashonnan ku a bai pa Scouting Antiano Grupo VII Simon Bolivar, e hóben Karen Vazquez i na Soeur Hedwig School ku ta un skol pa muchanan ku limitashonnan tantu físiko komo mental. E mayornan di Jetro Willems, personalmente, ta esnan ku a realisá e diferente donashonnan na nòmber di Jetro. Djadumingu nan a biaha bèk pa Hulanda.

Tabata den oranan di djasabra atardi ku e mayornan di Jetro Willems a sorprendé e hóbennan di Scouting Antiano Grupo VII Simon Bolivar ku tin un kantidat di mas ku 75 hóben di entre 4 pa 19 aña di edat komo miembro. Aki a entrega e lidernan i e hóbennan un donashon di 1500 florin pa nan por realisá algun evenementu i atkerí algun kos pa e edifisio. Tabata Hòpman Elvis Mercelina (Lider di Grupo) huntu ku Stanley Francisca (Presidente komishon di mayor) i e verkèner Sergio Constancia huntu ku e wèlpnan Rafael Willems i Zane Mercelina ku a risibí e donashon na man di e mayornan di Jetro Willems. E intenshon ta ku durante di aña e grupo di scouting lo sigui risibí yudansa di parti e hóben futbolista pa asina e grupo di scouting por realisá nan diferente proyektonan planiá.

Seguidamente e mayornan di Jetro a bai Soeur Hedwig School kaminda nan a bai pa topa ku e hóben Karen Vazquez ku ta un hóben di 18 aña di edat ku tin limitashon físiko i mental i ku ta den nesesidat di un ròlstul. E mayornan di Jetro a entrega Karen Vazquez un donashon di 1275 florin ku ta pa kubri tur gastu di e ròlstul nobo. Sigur tabata un momentu di hopi emoshon pa e mayornan di Karen i tambe e propio mayornan di Jetro Willems. Tabata mayornan di Karen huntu ku su dosente Rachita Windster ku a tuma e donashon

Soeur Hedwig School ta un skol speshal pa hóbennan ku limitashon físiko i òf mental ku tin un total di 50 hóben ta studia. Karen Vazquez mes tambe ta un studiante di Soeur Hedwig school pa 5 aña kaba. Tantu e kabes di skol ku ta señora Jessy Naaldijk i e dosente di Karen ku ta señora Rachita Windster, a keda sumamente gradesido pa e gesto bunita aki. Mester remarka ku un motor grandi tras di e echo aki ta señora Rachita Windster ku ta lucha ku alma i kurpa pa tur e hóbennan ku ta bishita e skol. E mayornan di Jetro a komprometé nan mes i Soeur Hedwig school lo por sigui konta ku nan sosten pa den futuro tambe.

Jetro Willems i su mayornan ta gradisí pueblo di Kòrsou pa e kariño i sosten brindá na nan i ta komprometé nan mes di sigui koperá ku e pueblo di Kòrsou te kaminda ku nan por. Un danki sigur na tur persona ku di un òf otro forma a intervení i òf koperá ku e proyektonan di donashon aki por a keda realisá.

Posted on

Liga MCB Segundo Divishon tambe ta bai kuminsá

WILLEMSTAD — Liga MCB Segundo Divishon lo ranka sali djaluna 2 di mart ku un tremendo partido entre Vesta i Caribbean International University. E partido aki lo tuma lugá na tereno di FFK mitar di 8 di anochi i entrada ta grátis.

E ekiponan ku ta partisipá na Liga MCB Segundo Divishon ta lo siguiente:

  1. C.H. Mahuma
  2. U.D. Tera Kora
  3. New Song
  4. Inter Willemstad
  5. Marquita
  6. De Koning
  7. Sta Cruz
  8. Indekor
  9. Vesta
  10. Caribbean International University

E kampionato di 2e divishon ta wòrdu hunga manera esun di 1e divishon. I ku e ekipo Kampion di 2e Divishon ta pasa pa hunga Promoshon/ Degradashon.

E ekipo ku sali na nr. 10 di 2e divishon ta bai hunga weganan di promoshon/ degradashon kontra di e ekipo kampion di 3er divishon.

E aña aki e kampionatonan di Liga MCB Terser Divishon ta wòrdu hunga separá. E kampionatonan aki ta pone pa kuminsá den luna di aprel 2015.

Posted on

Liga MCB Promé divishon ta bai kuminsá

WILLEMSTAD — Falta algun dia mas pa e gran apertura di Liga MCB Promé Divishon kaminda Centro Barber e ekipo kampion di Liga MCB Promé Divishon 2014 lo bai enfrentá Scherpenheuvel e ekipo kampion di Liga MCB Segundo Divishon i e ekipo ku a logra promové pa Liga MCB Promé Divishon. Un wega sumamente interesante kaminda pueblo di Kòrsou por bai disfrutá di 1 gran partido di futbòl.

E promé partido di Liga MCB lo tuma lugá dia promé di mart den Stadion Antoine Maduro (SUBT) pa 6or di atardi. Entrada pa e promé wega di Liga MCB Promé divishon ta Fl 10 pa hende grandi i fl.5 pa mucha te ku 12 aña i 60+. Animashon pa e gran apertura aki ta na enkargo di Ata Nirooo, Janiro Eisden direktamente for di Aruba. Miéntras ku Preis pa kampionato regular ta 6 florin general i 60+ i mucha te ku 12 aña ta kosta ƒ2.50.

E partidonan di Liga MCB Promé Divishon lo wòrdu hunga den Stadion Ergilio Hato na Brievengat i den Stadion Antoine Maduro (SUBT). Weganan ta wòrdu hunga den wikènt esta, djabièrnè, djasabra i djadumingu. Na momento ku un wega keda kanselá lo reprogramá e wega aki durante di siman.

E ekiponan ku lo partisipá na Liga MCB Promé Divishon ta lo siguiente:

  1. CSD Barber
  2. Centro Dominguito
  3. Undeba
  4. Jong Holland
  5. Victory Boys
  6. SUBT
  7. Hubentud Fortuna
  8. FC Sithoc
  9. Jong Colombia
  10. Scherpenheuvel

Liga MCB Promé Divishon lo wòrdu hunga di e siguiente manera;

E promé fase lo konsistí di dos buèlta regular den kua kada ekipo ta enfrentá otro na dos okashon ku ta un total di 90 wega. Den e segundo fase (buèlta di 6),e promé 6 ekiponan despues di e buèltanan regular ta klasifiká pa e play off entre di seis klup den kua kada ekipo ta enfrentá otro na un okashon ku ta lo suma un total di 15 wega. Den e terser fase (buèlta di 4), e promé kuater ekiponan den play off di 6 klup ta klasifiká pa sigui den e play off entre di 4 klup den kua kada ekipo ta enfrentá otro na un okashon ku ta un total di 6 wega i den e delaster fase (Final), e dos promé ekiponan den e play off di 4 klup ta klasifiká pa e wega final di e kampionato pa disputa e título di kampion di Liga MCB Promé Divishon.

Konforme e desishon di reunion general e sistema di promoshon/degradashon pa e kampionato aki ta keda vigente. Pues e ekipo nr.10 di Liga MCB Promé Divishon ta hunga dos partido promoshon/degradashon ku e ekipo Kampion nr: 1 di Liga MCB Segundo Divishon.