Author: E. Evertsz

Posted on

KAMPIONATO FEMENINO TIN SU EKIPONAN KAMPION I SUPKAMPION PA AÑA DI 2021-2022

WILLEMSTAD — Djabièrnè último, Kampionato Femenino 2021-2022 a yega na su gran final despues di a inisiá na dezèmber aña pasá i a tuma lugá tur djabièrnè anochi na tereno di Willemstad i tambe tereno di Jong Holland. E gran finalnan di kategoria U-17 i kategoria Senior a tuma lugá na tereno di Willemstad promé di yüli último miéntras e ekiponan kampion i supkampion di kategoria U-15 ya tabata konosí. Tur ku ta tei presente a disfrutá di partidonan yená ku emoshon kaminda nos damanan a duna tur ku tin pa bai ku e título máksimo.

Resultado final Kampionato Femenino;

Tereno Kategoria Tim di Kas vs Bishitante U-17 Senior
WILLEMSTAD U-17 Jong Holland vs Excellence School 1-3 –
WILLEMSTAD Senior VESTA vs Hubentud Fortuna – 0-1

E promé partido a keda empatá na 0 durante e tempu reglamentario i despues den tempu èkstra Excellence School a sa di gana ku skor di 3-1. Tur 3 gol a keda anotá pa Raengelly Keller ku alabes e ta e máksimo goliadó di kategoria U-17, miéntras Laura Lauffer a anotá e úniko di Jong Holland. Asina Excellence School a titulá e kampionnan di kategoria U-17 i Jong Holland a resultá e ekipo supkampion di e kategoria aki.

Despues di e partido final di U-17, e partido di kategoria Senior a tuma lugá kaminda Hubentut Fortuna a gana Vesta ku skor di 1-0 ku gol anotá pa Shadé Desir. Asina e ekipo di Hubentut Fortuna a titulá kampion di kategoria Senior miéntras Vesta a resultá e ekipo supkampion.

Despues di e tremendo partidonan aki Komishon Femenino huntu ku miembronan di direktiva di FFK a hasi entrega di e trofeo i medayanan na e ekiponan kampion i supkampion pa Kampionato Femenino 2021-2022.

Premiashon Femenino;

Kategoria U-15

Kampion: Jong Holland

Supkampion Centro Juve

Kategoria U-17

Kampion: Excellence School

Supkampion: Jong Holland

Kategoria Senior

Kampion: Hubentut Fortuna

Supkampion: Vesta

Komishon Femenino i FFK ta felisitá tur e ekiponan aki i ta gradisí tur hungadó, entrenadó, mayor, rèfri i tur ku a kontribuí di un manera òf otro pa kampionato aki ta unu eksitoso!

 

Posted on

GRAN FINAL DI KAMPIONATO FEMENINO 2021-2022! DJABIÈRNÈ, PROMÉ DI YÜLI 2022

WILLEMSTAD — Despues ku wikènt último Kampionato Hubenil a konosé su gran final, awor ta toka turno pa nos damanan mustra kiko tur nan tin aden. Esaki lo tuma lugá durante e gran final di Kampionato Femenino 2021-2022, ku lo inisiá for di mitar di 7 di anochi na tereno di Willemstad.

Mañan, promé di yüli 2022 nos lo konosé e ekiponan kampion i supkampion di Kampionato Femenino 2021-2022 pa kategoria U-17 i kategoria Senior. Jong Holland, Excellence School, Vesta i Hubentut Fortuna ta den e kontienda i lo batayá pa optené e kopa di kampion pa aña 2021-2022. Despues di kada partido Komishon Femenino lo hasi entrega di e premionan na e ganadónan korespondiente huntu ku e ganadónan di kategoria U-15 ku ya ta konosí; Jong Holland (kampion) i Centro Juve (supkampion).

Skema final Kampionato Femenino;

Tereno Kategoria Tim di Kas vs Bishitante U-17 Senior
WILLEMSTAD U-17 Jong Holland vs Excellence School 18:30 –
WILLEMSTAD Senior VESTA vs Hubentud Fortuna – 20:30

Komishon Femenino ta deseá tur e ekiponan ku a klasifiká pa e gran final hopi éksito i ta invitá pueblo di Kòrsou kompletu pa bin apoyá nos hungadónan i mira kiko tur nos damanan tin aden durante e gran final di Kampionato Femenino 2021-2022!

Entrada ta kompletamente grátis!

Posted on

Kompetí i dibertí, pasobra deporte ta dushi

WILLEMSTAD — Dia 26 di yüni próksimo Fundashon Desaroyo Buena Vista (FunDeBu) ta organisá un ‘mini olimpiada’ titulá: “Kompetí i dibertí, pasobra deporte ta dushi”.

FunDeBu ta un fundashon ku primordialmente ta organisá aktividat-/eventonan sosial i deportivo ku ta kontribuí na desaroyo di tantu nos hóben- komo adultonan.

Praktiká deporte ta kontribuí na kurpa i mente sano. Ademas deporte ta uni hende i trese union den pais.

Basá riba e filosofia aki nos ta organisá i kordiná e dia di deporte na vèlt di Buena Vista i den skol Juan Pablo Duarte. Tur esaki ku kolaborashon di e diferente federashonnan di deporte.

Nos lo transformá e aria den unu olímpiko.

Nos aspirashon ta pa riba e dia en kuestion, bishitantenan sera konosí ku e diferente ramonan di deporte na Kòrsou. Ademas federashonnan por propagá i duna informashon spesífiko di nan ramo i asina purba motivá i konvensé hóbennan pa afiliá na un tim. Pues un oportunidat di “ganá-ganá”.

Mas o ménos 13 diferente federashon di deporte lo partisipá riba e dia aki. Nan ta garantisá presentashon na nivel haltu di parti di nan deportistanan.

E siguiente ramonan di deporte lo partisipá n’e evento aki:

  • ‘Denksporten’: Dam, Dominó, ‘Schaken’
  • ‘Vecht-/Zelfverdedigingsporten’: Yudo, Karate, Taekwondo
  • ‘Balsporten’: Futbòl,  Basketbal, Ping Pong, Bola’s
  • Atletismo: Maratòn, ‘Hardlopen’ Triatlon
  • Subi flie
Posted on

APERTURA DI “LUNA DI KOLEKTA” NA BRIONPLEIN

WILLEMSTAD — Djasabra 4 di yüni 2022 Federashon Deporte i Olímpiko Kòrsou (FDOK) a tene su apertura di e luna di kolekta pa deporte ku a tuma lugá riba Brionplein.

Presidente di FDOK sr. Rignaal “Jean” Francisca a habri e atardi ku un diskurso den kua e la informá ku meta di e kolekta aki ta pa rekoudá fondo pa diferente proyekto i plannan ku FDOK tin pa engrandese deporte aki na Kòrsou. Tambe miembronan di direktiva FDOK huntu ku Komishon di kolekta pa deporte a hiba palabra.

Riba e dia aki tabatin 13 federashonnan miembro di FDOK ku tabata presente kaminda nan a duna demostrashon i informashon di nan deporte. Curacao National  Anti-Doping Organization (C-NADO) tambe a uni pa duna splikashon di Anti-doping.

E ambiente tabata unu deportivo i sosial kaminda henter famia por a bishita.

Tabatin músika pa entretené e públiko presente.

FDOK ta yama un danki special na Minister di Ekonomia Sr. Ruisandro Cijntje i tambe na Parlamentario Rennox Calmes ku tabata presente i a duna aporte na e proyekto.

Despues di e apertura di dia 4 di yüni, direktiva i miembro nan di FDOK ta hasi uso di e oportunidat aki pa pidi Pueblo di Kòrsou pa sigui duna nan aporte durante e luna di yüni aki.

Diferente deportista / atleta i tambe coach i dirigentenan di deporte lo ta presente na diferente sitionan, aktividatnan i establesimentunan na Kòrsou ku e buzonnan pa asina komunidat kompletu por hasi su donashon durante di e luna aki.

Bo por hasi bo donashon tambe via di kuentanan bankario di FDOK:

  • MCB: #22791707
  • BDC: #33107701
Posted on

Marnix i Radulphus College ta gana di torneo eskolar di ahedres

WILLEMSTAD — Djadumingu 5 yüni 2022, Curacao Youth Chess Institute a organisá su kompetensia eskolar di ahedres anual dedika na memoria di e baluarte sr. Omalio Merien (dfm) kende durante su bida a duna un aporte grandi na desaroyo i promoshon di ahedres aki na Korsou.

Hopi ta esnan ku konese sr. Omalio Merien komo inisiado di e karnaval organisá ku nos tur konose awendia, pero poko sa ku sr. Merien su gran pashon tabata e wega noble di ahedres. Sr. Merien tabata praktika ahedres na di klup di ahedres Capablanca unda e a fungi entre otro komo presidente di direktiva. Na final di añanan ‘70 Omalio Merien a lanta su skol ‘Agedres na plaka chiki’ pa mucha i den dekada ’80 sr. Merien tabata organisa hopi torneo di reto pa tantu hoben komo adulto na SDK. Tambe sr. Merien a kuminsa na febuari 1981 ku su programa di televishon ‘Agedres na paka chiki’ ku a pasa mas ku 10 aña largu tur siman na TeleCuracao. Mirando e aporte grandi di sr. Omalio Merien na desaroyo i promoshon di ahedres na Kòrsou, Curacao Youth Chess Institute a dedika e torneo eskolar 2022 na su honor.

Na e torneo eskolar 2022 a partisipa un total di 46 alumno di 21 diferente skol. Entre e 46 alumnonan ta tin tambe 4 ahedresista di Liseo Boneriano ku tambe a bin Kòrsou spesial pa por partisipa. E kompetensia di ahedres a keda organisá den dos grupo apart pa separa alumnonan di skol di fundeshi for di e alumnonan di skol avansa. E hobenan a bataya fuertisimo durante 5 buelta di 10 minut pa banda den nan respektivo grupo i e resultado di weganan a mustra un diferensia di skor minimo na final. Mester a aplika sistemanan di tie-break den ambos grupo pa por a saka e siguiente resultadonan:

Grupo di skolnan avansa overall:

  1. Rishab Anandbadoer    Radulphus College                4 pto
  2. Dylan Léañez        Vespucci College                4 pto
  3. Johan van Delden        Juan Pablo Duarte                4 pto

Grupo di skolnan di fundeshi overall:

  1. Jie-Peng Wu        Marnixschool                    4.5 pto
  2. Björn Elisa            Vigdis Jonckeer Mensing            4.5 pto
  3. David Augusta        Marnixschool                    4 pto

Miho damitanan di skolnan avansa:

  1. Diantheley Pourier    Gouverneur Laufferschool            4 pto
  2. Esther Carolina        Marnix VSBO                    2 pto
  3. Tamaris Pikeur        Liseo Boneriano                1 pto

Miho damitanan di skolnan di fundeshi:

  1. Liana Pieter        Prins Bernardschool                3.5 pto
  2. Sharidania Suart        Glorieux College                3 pto
  3. Chalendriënsley Cristina    Kolegio Iris Bruyning            2 pto

Sr. Gibi Merien kende ta ruman di e baluarte Omalio Merien a representa famia Merien, kendenan a soru pa e bunita trofeonan pa ganadornan, i a entrega e premio na e ganadornan overall di skol di fundeshi i ganadornan overall di skol avansa.

Curacao Youth Chess Institute ta felisita e ganadornan i ta enkurasha tur nos hoben ahedresistanan femenina pa kuminsa prepara pa un gran kompetensia femenino ku lo tuma luga djis despues di fakansi grandi.

Posted on

Korsou ta Perde un i Gana Otro den Kampionato Sur Amerikano Femenino

EKUADOR — Djasabra dia 4 di yuni Korsou a sali ku su prome wega kontra Peru nos a perde ku Skore di 5 pa 1. Picher Perdedor tabata Leonela Elisabeth miho Bate Maximiliana THAIMA 2-1.

Dia 5 di yuni nos a topa e ekipo Argentina 21. Bou di lansamentu di J’Dah Girigorie nos a blankia Aregentina 21 ku skore di 8 pa 0 Picher ganador J”Dah Girigorie miha bate Jandely RICARDO i Anias Piar di 2-2

Posted on

BAN YUDA NOS KARGA DEPORTE NA KORSOU

WILLEMSTAD — Federashon Deporte i Olímpiko Kòrsou (FDOK) ta organisá pa promé bes luna di kolekta pa deporte. E meta di e kolekta aki ta pa rekoudá fondo pa diferente proyekto i plannan ku FDOK tin pa engrandese deporte aki na Kòrsou. E luna di kolekta pa deporte lo tuma lugá den henter e luna di yüni. Lo kuminsá ku un apertura ofisial riba 4 di yüni 2022 i lo terminá ku un klousura riba 30 di yüni 2022.

Siman Olímpiko Korsou

Un di e proyektonan ku FDOK tin programa ta e siman Olímpiko Kòrsou 2022 ku ta pone pa tuma lugá di 24 pa 31 di yüli próksimo. Meta di e proyekto aki ta pa krea un esfera olímpiko na kòrsou kaminda kada federashon lo organisá nan propio kompetensia lokal den un esfera estilo Weganan Olímpiko. Tur esakinan bou di guia i kordinashon di FDOK i den “partnership” ku FDDK.

Plan di desaroyo di topsport 2022 – 2026

Tambe FDOK ke ehekutá e plan di desaroyo di topsport ku tin komo meta pa den un término kòrtiku, medio largu i tambe largu krea deportistanan ku por destaká riba nivel internashonal i asina posishoná Korsou den e tòp 15 na e Weganan Sentro Amerikano i Karibe 2026 ku lo tuma lugá na Sto. Domingo.

Plan Stratégiko 2022-2024

FDOK huntu ku stakeholders ku yudansa di Innovatie & Ontwikkeling Adviesbureau a traha riba un plan stratégiko pa e temporada di 2022 pa 2024.

Pa hasi e proyektonan ariba menshoná posibel i kumpli ku e plannan, FDOK a bini ku diferente manera pa generá fondo. Un di e manera nan aki lo ta den forma di un luna di kolekta.

Apertura di e luna di kolekta pa deporte ta tuma lugá djasabra 4 di yüni 2022 di 3‘or di atardi pa 7ór di anochi riba Brionplein. Lo bai tin músika pa entretené e públiko presente. Lo bai tin tambe diferente federashonnan miembro di FDOK ku lo ta presente pa asina duna informashon di nan deporte. E ambiente lo ta unu deportivo i sosial kaminda henter famia por bishita.

Pueblo di Korsou por duna su aporte den e siguiente formanan:

  • Riba djasabra 4 di yüni por akudí na Brionplein pa depositá bo kontribushon.
  • Despues di e apertura di 4 di yüni, diferente deportista/ atleta i tambe coach i dirigentenan di deporte lo ta presente na diferente sitionan i establesimentunan na Korsou ku nos buzonnan pa asina komunidat kompletu  por hasi su donashon durante di e luna aki.
  • I si ta deseá di hasi un donashon via di kuentanan bankario di FDOK, esaki tambe ta posibel riba kuenta MCB: #22791707 i BDC: #33107701.

FDOK ta hasi un petishon na henter pueblo di Korsou pa kontribuí pa asina konhuntamente nos sigui yuda engrandese deporte riba nos isla.

Di antemano danki i FDOK ta konta ku boso sosten.

Posted on

Salida di Selekshon Nashonal di Softbol

WILLEMSTAD — Komo parti di e proyekto ku nos di Curaçaose Softball Bond (CSB) a start na aña 2017 di kual nos a titulá  Kampion na aña 2019 di e Torneo Sur Amerikano Femenino Señor na Ekuador, nos a bolbe haña invitashon pa partisipá den e magno evento aki. Komo ekipo  kampion di e lastu kompetensia e organisadónan di e torneo a hasi un  apelashon fuerte pa Kòrsou su ekipo Nashonal Femenino pa nos bin defendé e  título di Kampion di sur Amérika na Argentina; E torneo lo tuma lugá e aña aki 2 di yüni pa 12 di yüni 2022 na Buenas Aires  Argentina.

Despues di un preparashon intensivo a yega e ora pa nos selekshon subi avion  pa bai Argentina. Na Argentina 4 miembro mas lo djòin e grupo ku a sali for  Kòrsou pa kompletá 16 hungadó. Djaweps 2 di yüni 2022 pa 10or AM nos lo  reuní e hungadónan na airopuerto pa saka un foto promé ku nan subi avion.  Nos ta konta ku Bo(so) presensia.

Posted on

Roderick Bernadina ta Keda ku Royal Scorpions

WILLEMSTAD — Hopi tabata e rumor nan rondoná tras di e desishon ku Roderick Bernadina AKA Mozzy lo tuma, en konekshon ku su karera den nos kampionato di beisbòl dòbel A 2022. Despues ku e la bira liber, bastante organisashon a aserk’e pa e join nan, pero nos ta sumamente kontentu di anunsiá ku Mozzy a disidí di keda kas.

Pa nos gran siguidó nan di beisbòl Mozzy sigur no tin mester di masha introdukshon. Pa hopi aña e la bin ta profila hopi bon den nos liga di dòbel A i tambe a forma parti di nos Selekshon aña pasa kaminda nan a bai ku e título máksimo den e kampionato di Caribbean Cup 2021.

Pa nos di Royal Scorpion ta un plaser enorme di por siguí konta ku su sosten pa e próksimo aña nan. Awor si nos por bisa ku nos ta kla pa temporada 2022 ranka sali pa nos bringa pa nos título di kampion e aña aki i tambe aña nan benidero.

Nos ke invitá tur fanátiko i miembro di Royal Scorpions pa siguí nos riba nos red nan social i keda pendiente pa mas informashon, anunsio i vários tremendo aktividat ku tin den tapara pa tur fanátiko i miembro.

Facebook Twitter Instagram Youtube
© 2022 Deporte Awe. Tur derechi reservá. Diseñá pa E² Media.