Author: E. Evertsz

Posted on

Partidonan desisivo den Liga MCB su buèlta di 4

WILLEMSTAD — Kuminsando awe, Liga MCB Promé divishon ta kontinuá ku e delaster weganan di e buèlta di 4. Den e partido di awe na Stadion Ergilio Hato, Centro Barber lo enfrentá Jong Holland. Miéntras ku djaluna e ekipo di Centro Dominguito lo topa ku UNDEBA.

E weganan aki lo ta sumamente interesante mirando ku tur e 4 ekiponan ku ta den buèlta di 4 tin 3 punto. E 2 ekiponan ku sa di gana e weganan aki ta e 2 nan ku lo klasifiká pa e gran final di Liga MCB Promé Divishon ku ta programá pa tuma lugá 7 di dezèmber próksimo. Miéntras ku si tur e 4 ekiponan aki empatá, UNDEBA i Centro Dominguito ta pasa pa e gran final mirando ku nan 2 tin e mihó averahe di gol. Centro Dominguito, e ekipo ku tin e mihó averahe di gol, por konformá su mes ku solamente un empate pa e klasifiká pa e gran final di Liga MCB.

Skema di partido:

Djabierne 28 nov. 14        20.30 Centro Barber Jong Holland
Djaluna 1 des. 14      20.30 Centro Dominguito Undeba

Tabla di posishon:

WH WG WE WP Pt GF GK Saldo
1 CENTRO DOMINGUITO 2 1 0 1 3 6 3 3
2 UNDEBA 2 1 0 1 3 4 3 1
3 C.S.D. BARBER 2 1 0 1 3 3 4 -1
4 JONG HOLLAND 2 1 0 1 3 3 6 -3
 
  8 4 0 4 12 16 16 0
Posted on

Breve Deporte Awe #198

Breve:

  • Yurendell de Caster ta konektá honron den su debut ku e ekipo di Gigantes De Rivas den Beisbòl Profeshonal na Nicaragua. Yurendell a bai di 4-2 den e partido ku 1 base por bola, 2 kareda anotá i 1 empuha. Yurendell a keda añadí siman pasa na e roster di Gigantes de Rivas. E pelotero, no ta un deskonosí den beisbòl na Nicaragua. Durante e temporada 2012-2013 ku e ekipo di Tigres de Chinandega, Yurendell a logra gana e premio di tripel korona ku un promedio di .416, 13 honron i 56 kareda empuha .
  • Atlanta Braves ta mustrando mas interes den e pelotero Kubano, Yasmany Tomas. E ekipo di Braves a manda manager Fredi Gonzalez, koach di bateo Kevin Seitzer, asistente gerente general John Coppolella i skout internashonal Gordon Blakeley bai wak un seshon di praktiká di e pelotero na Repúblika Dominikana. Yasmany ta un prospekto Kubano ku ta bati pa poder. E pelotero na yüni ultimo a bandoná Kuba en búskeda di un kontrakt di Liga Grandi. Diferente ekipo, inkluyendo San Francisco Giants, San Diego Padres, Arizona Diamondbacks i Philadelphia Phillies a mustra interes den e pelotero di 24 aña.
  • Segun manager di Boston Red Sox, Hanley Ramirez lo sali for di kuadro i lo bai hunga left field pa e ekipo den e temporada benidero. E manager a añadí ku den e senario aki, Yoenis Cespedes lo hunga sea center field of right field. Ku esaki, Xander Bogaerts por ta sigur di su lugá den short por lo pronto.
Posted on

Breve Deporte Awe #197

  • E pelotero, Pablo Sandoval a disidí di bai di akuerdo ku e oferta di Boston Red Sox. Ainda tur e términonan finansiero di e akuerdo aki no ta kla. Pero segun informashonnan, ta trata di un akuerdo di 5 an pa mas of ménos 100 mion dòler. Awe e ekipo di Boston lo introdusí Sandoval durante di un konferensia di prensa na Fenway Park. Ku Pablo Sandoval i Hanley Ramirez e ekipo di Boston mester bai wak awor kon nan ta bai hasi akomodá Xander Bogaerts den kuadro.
Posted on

Breve Deporte Awe #196

Breve:

  • E ekipo di Rakuten Golden Eagles no ta sigur ainda si nan lo trese Andruw Jones pa un di tres temporada. Aktualmente e ekipo di Rakuten tin bista riba otro peloteronan, manera Wily Mo Peña i Tony Blanco. Den dos aña ku e ekipo, Andruw a logra un promedio di .232 ku 50 honron.
  • Segun informashonnan, e ekipo di Boston Red Sox a yega na un akuerdo ku Hanley Ramirez. E ekipo mes no a konfirmá esaki ainda, pero segun informashonnan e pelotero ta biaha awe pa Boston pa finalisá e dil ku e ekipo. Ta trata di un dil den kareda di 5 aña pa 90 mion dòler.
  • E ekipo di Boston ketu bai ta tras di Pablo Sandoval. Segun informashonnan, e ekipo a ofresé Sandoval un akuerdo di 5 aña pa 95 mion dòler den siman tras di lomba. Segun e agente di Sandoval e pelotero a risibí oferta di tantu Boston, San Diego i San Francisco i pronto e pelotero lo disidí kua oferta e ta bai kuné.
Posted on

Centro Barber i Jong Holland ku viktoria importante den buèlta di 4

WILLEMSTAD — Liga MCB su buèlta di 4 a kontinuá den wikènt tras di lomba den Stadion Ergilio Hato, kaminda tantu Centro Dominguito komo UNDEBA por a logra nan pase pa final. Pero niun di dos ekipo no a logra esaki. Riba djabièrnè e ekipo di Centro Dominguito a enfrentá Centro Barber. Akinan tabata e ekipo di Centro Barber ku a sali di e porta grandi derotando Dominguito ku skor di 2-1. Pa Barber e golnan a keda anotá pa Ruensley Leuteria i Jurensley Martina. Miéntras ku pa Dominguito e uniko gol a keda anotá pa Ivanny Calvenhoven.

Den e otro partido riba djadumingu e ekipo di Jong Holland a enfrentá UNDEBA. Akinan tabata Jong Holland ku a stroba e pase pa final di UNDEBA, derotando nan ku skor di 2-1. Pa Jong Holland e golnan a keda anotá pa Riddick Koeiman i Errol Albertus. Pa UNDEBA e gol a keda anotá pa Edgard Cassiani.

Ku e resultadonan aki e finalistanan di Liga MCB lo keda determiná wikènt benidero riba e ultimo fecha di e buèlta di 4. Akinan e ekipo di Centro Barber lo enfrentá Jong Holland. Den e otro partido Centro Dominguito lo enfrentá UNDEBA.

Pa wikènt benidero, e ekipo ku logra un viktoria ta pasa outomátikamente pa e final, miéntras ku ekiponan ku pèrdè outomátikamente ta keda eliminá. Den kaso ku ambos partido terminá den un empate, Centro Dominguito i UNDEBA ta pasa pa final. Si e partido entre Centro Barber i Jong Holland finalisá den un empate i e otro partido no terminá den un empate, Centro Barber ta bai final huntu ku e ekipo viktorioso di e otro partido. Den kaso ku e partido entre Centro Barber i Jong Holland no finalisá den un empate i e otro partido si finalisá den un empate, Centro Dominguito i e ekipo ganadó di e otro partido ta pasa pa final.

Tabla di senarionan:

Senarionan pa e partidonan di wikent binidero Resultado Final
Senario #1
Centro Barber vs. Jong Holland no empate Ekiponan ganado
Centro Dominguito vs. UNDEBA no empate
Senario #2
Centro Barber vs. Jong Holland empate Centro Dominguito i UNDEBA
Centro Dominguito vs. UNDEBA empate
Senario #3
Centro Barber vs. Jong Holland empate Centro Barber i ekipo ganado di e otro partido
Centro Dominguito vs. UNDEBA no empate
Senario #4
Centro Barber vs. Jong Holland no empate Centro Dominguito i ekipo ganado di e otro partido
Centro Dominguito vs. UNDEBA empate

Tabla di posishon despues di dos partido den buèlta di 4:

Ekipo PH G E P GF GK GD Pt
Centro Dominguito 2 1 0 1 6 3 3 3
UNDEBA 2 1 0 1 4 3 1 3
Centro Barber 2 1 0 1 3 4 -1 3
Jong Holland 2 1 0 1 3 6 -3 3
Posted on

Centro Dominguito i UNDEBA por posishoná nan mes den final di Liga MCB wikènt aki

WILLEMSTAD – Liga MCB Promé Divishon ta kontinuá e wikènt aki despues ku tin un pousa chikí debí na e partisipashon di nos selekshon nashonal senior na e delaster buèlta di e CFU Men’s Caribbean Cup Tournament. Esaki lo ta e penúltimo wikènt di e Liga MCB su buèlta di kuater pa asina dia 7 di dezèmber próksimo nos bai haña e gran final di Liga MCB. Ku un viktoria tantu Centro Dominguito komo UNDEBA ta posishoná nan mes den e final di Liga MCB. Pues Centro Barber i Jong Holland mester di por lo ménos un empate pa mantené speransa.

Skema pa wikènt benidero di LIGA MCB buèlta di kuater:

Djabierne 21 nov. 14      20.30 Centro Dominguito vs CSD Barber
Djadumingu 23 nov. 14      18.00 Jong Holland vs Undeba

Tabla di posishon:

Ekipo PH G E P GF GK GD Pt
Centro Dominguito 1 1 0 0 5 1 4 3
UNDEBA 1 1 0 0 3 1 2 3
Centro Barber 1 0 0 1 1 3 -2 0
Jong Holland 1 0 0 1 1 5 -4 0
Posted on

Breve Deporte Awe #195

Breve:

  • E Liga di Beisbòl Dominikano a suspendé tur partido di kas di e ekipo di Aguilas Cibaeañas  pa motibu di kandela na e stadion di e ekipo. Segun téknikonan di bombero e kandela e surgi pa motibu di un korto sirkuito den e sekshon di VIP di e stadion. Segun ofisialnan di e ekipo, e dañonan pa motibu die kandela ta grandi. Tur ekipo di transmishon di radio a kima, meskos ekiponan pa traha ku e scoreboard elektróniko. E ekipo ta bisa ku hopi di e ekiponan ku a kima mester trese nobo for di eksterior i esaki lo por dura mas of ménos 15 dia pa yega.
  • Segun informashonnan, e ekipo di Toronto Blue Jays tambe ta interesá den e tersera base, Pablo Sandoval. E ekipo ya tabata den kòmbersashon ku e agentenan di e pelotero i lo presentá un oferta na e pelotero den próksimo dianan. E ekipo di Boston Red Sox tambe a presentá un oferta na e pelotero, miéntras ku San Francisco Giants tabata tin un kòmbersashon telefóniko ku e pelotero su agente ayera. Ekiponan ku a mustra interes den e pelotero te ainda ta; Boston Red Sox, Chicago White Sox, San Diego Padres, San Francisco Giants i Toronto Blue Jays. Sandoval a ekspresá di ta interesá den un kontrakt di 6 aña pa  mas of ménos 100 mion doler.
  • Banda di Pablo Sandoval, e ekipo di Boston Red Sox a presentá un oferta na e picher agente liber Jon Lester tambe. Lester ya tabata ku e ekipo di Boston te na momentu ku e ekipo mand’e Oakland Athletics den un kambio pa Yoenis Cespedes.
Posted on

Breve Deporte Awe #194

Japan All Star Series 

  • Ayera:

    MLB All Stars a derota Hapon ku skor di 3-1

Breve:

  • Oakland Athletics a yega na un akuerdo di 3 aña pa 30 mion dòler ku agente liber Billy Butler. Temporada pasa huntu ku e ekipo di Kansas City Royals, Butler a logra un promedio di .271 ku 9 honron i 66 kareda empuha.
  • Pablo Sandoval a diskutí un dil di 5 aña di entre 80 pa 90 mion dòler ku tantu San Francisco Giants i Boston Red Sox. Sandoval ta na Boston i a topa ku gerentenan di e ekipo tantu ayera komo ántayera. Banda di e dos ekiponan menshoná, e ekipo di San Diego Padres tambe a kuminsá mustra interes den Pablo Sandoval. Apesar di esaki ta ainda e pensamentu ta ku Sandoval lo terminá sea serka su èks ekipo di San Francisco of e ekipo di Boston Red Sox.
  • Atlanta Braves lo kòmbersá ku pitcher, Jon Lester e siman aki. Lester aktual agente liber a habri temporada ku Boston Red Sox i despues a bai Oakland Athletics den un kambio. Banda di Atlanta, Jon Lester lo bishitá e ekipo di Chicago Cubs tambe. Lester temporada pasa tabata tin un rèkert di 16-11 ku un efektividat di 2.46 den 32 partido.
  • Un biaha mas e ekipo di New York Mets ta hala e murayanan di outfield mas aden. E ekipo tin intenshon pa hala e murayanan entre 3 pa 11 pia aden. Segun e ekipo, ku e dimenshonnan nobo aki lo tabata tin 27 honron adishonal temporada pasa, inkluyendo 17 konektá pa e ekipo di Mets.
Posted on

ABC Insel Air Champion na di dos lugá den relevo rondo di St. Maarten

WILLEMSTAD – Dia 11 di Novèmber último a tuma lugá e di 27 edishon di e kareda di relevo rondó di e isla di St. Maarten, di kua e ekipo di Kòrsou kombiná ku Aruba i Boneiru a partisipá. Esaki tabata e inisiativa di e atleta di distansia Randhy Cuevas pa hasi un kombinashon di e isla nan di manera ku bo por haña mas atleta fuerte den e ekipo ku a hiba e nòmber di ABC Insel Air Champion.

E kareda a start ku e koredó di St. Maarten ku a gana e kareda Fatum nan Kòrsou i establesé un rèkert nobo kontra di e koredó di Aruba, Roland Staring. Manera tabata di spera e koredó di St. Maarten a kue e bentaha, lagando e ekipo di ABC Insel Air Champion atras. E ekipo di ABC a keda atras te ku lèg 5 den u kareda kaminda mayoria koredó ta mas of ménos 3 km. Despues di 3 lèg e ekipo di ABC a pasa pa kue e puesto number 2. I na di 5 leg e selekshon a pasa pa puesto number 1. E selekshon a pèrdè e bentaha aki na momentu ku un dama di e ekipo mester a enfrentá un kabayero di e ekipo kontrali ya komo ku reglanan ta stipulá ku bo mester tin mínimo dos koredó di e sekso opuesto den bo ekipo.

Pero asina mes e kabayero ei no por a bai leu i e dama Shardiela a lucha balentemente. Despues a sigui e dama di Aruba Dorothal ku ta un koredó ku a yega di kore 5 km den 20 minüt, pero e hóben atleta di Aruba aki a bin konfrontá problema respiratorio durante di e kareda i esaki a pone e ekipo di ABC Insel Air Champion kai un minüt atras ku a bira difísil pa nos koredó lokal Rashid por a sera e distansia ei, mirando ku e koredó number 10 di e otro ekipo ta tin mes un nivel ku n’e. Asina nos ekipo a sali number dos den e kompetensia di relevo rondó di e isla di St. Maarten.

Posted on

Breve Deporte Awe #193

Breve:

  • E ekipo di Beisbòl Profeshonal na Nicaragua, Gigantes de Rivas a añadí e pelotero yu di Kòrsou Yurendell de Caster na nan roster. Yurendell no ta un deskonosí den beisbòl na Nicaragua. Durante e temporada 2012-2013 ku e ekipo di Tigres de Chinandega, Yurendell a logra gana e premio di tripel korona ku un promedio di .416, 13 honron i 56 kareda empuha .
  • E pelotero, Giancarlo Stanton a yega na un akuerdo ku e ekipo di Miami Marlins. Ta trata aki di un dil di 13 ana pa 325 mion dòler. Stanton di 25 aña di edat, a gana e premio di Silver Slugger, tambe e premio Hank Aaron i a sali dos den votashon pa premio di Hungadó-Mas-Balioso den Liga Nashonal.
  • E ekipo di Atlanta Braves huntu ku St. Louis Cardinals a anunsiá ku nan a hasi un kambio ku kuater pelotero involukrá. E ekipo di Atlanta a manda Jason Heyward i Jordan Walden pa St. Louis Cardinals, miéntras ku e ekipo di Atlanta a risibí pichernan, Shelby Miller i Tyrell Jenkins.