Author: E. Evertsz

Posted on

MCSSI-2014 CURACAO Synchronized Swimming Championship

WILLEMSTAD — Dianan 5 i 6 di desèmber próksimo Federashon Aquatiko Kòrsou ta organisá e MCSSI-2014 CURACAO Synchronized Swimming Championship’ (Kampionato nashonal di landamentu sinkronisá). Lo tin kompetensia di Combo, Solo, Figura i Rutina di dueto den diferente kategoria di edat. E kompetensia lo tuma lugá na SDK kuminsando djabièrnè di 5 di desèmber ku e promé seshon di kompetensia 17:00’or di atardi. Riba djasabra 6 di desèmber e di dos seshon di kompetensia ta kuminsá 9:30 di mainta. Despues di un pousa, 16:30 di atardi ta kuminsá ku e di tres i seshon di kompetensia.

Posted on

FDOK ta pidi federashonnan deportivo pa kandidato pa deportista di aña

WILLEMSTAD — FDOK (antes CSOF) ya ta den preparashon pa su evento grandi kual ta e premiashon pa deportista di aña 2014. Tur kos ta kanando segun plan i ya a reuní na dos okashon ku e miembronan di e komishon ku lo elegí e nominado i ganadónan.

Apesar di esaki FDOK ke rekordá i ala bes hasi un supliká na federashonnan deportivo pa manda nan kandidato pa deportista di aña. E fecha límite pa hasi esaki ta dia 7 di desèmber próksimo. Despues di e fecha aki e komishon lo kuminsá ku su tarea i nan mes lo por buta miembro si e federashon no manda nada.

Posted on

Swim Club Orca Curaçao ta organisá dia habri

WILLEMSTAD — E organisashon di natashon, Swim Club Orca Curacao ta ekstendé un invitashon na pueblo di Kòrsou pa ta presente na e dianan habri ku lo tuma lugá dia 6 di desèmber i dia 13 di desèmber próksimo na pisina Bennie Leito. E dianan habri ta pa tur mucha for di 5 aña di edat i adultonan ku ta den poseshon di un Diploma A. Muchanan por bin landa i pasa dushi, landa “estafette”, hasi balèt di awa, waterpolo i bula for di “springplank”. Adultonan por landa “estaffete”, trèk ban, waterpolo i bula for di ”springplank”.

Posted on

Breve Deporte Awe #201

Breve:

  • Den un komunikado e ekipo di Texas Rangers a anunsiá ku Jurickson Profar por kuminsá tira bala den luna di yanüari próksimo. Resientemente Jurickson a hasi un otro MRI i esaki a mustra un progreso signifikativo den e múskulo leshoná di Jurickson. Manera kos ta bayendo awor aki e ekipo di Texas Rangers ta di opinion ku Jurickson lo ta kompletamente rekuperá pa e inisio di e temporada 2015. Manera ta konosí Jurickson a pèrdè henter e temporada 2014 pa motibu di leshon na skouder.
  • E ekipo di Los Angeles Dodgers a ofresé un kontrakt tentativo pa e temporada 2015 na Kenley Jansen. Den e próksimo lunanan e ekipo tin e posibilidat pa yega na un salario spesífiko ku e pelotero. Si e dos bandanan no yega na un akuerdo e pelotero ta elegibel pa arbitrahe salarial. Ta estima ku Kenley por risibí un salario di 8,2 mion dòler den arbitrahe salarial.
  • E ekipo di Minnesota Twins a yega na un akuerdo di un aña ku Torii Hunter pa 10,5 mion dòler. Torii Hunter temporada pasa tabata ku e ekipo di Detriot Tigers kaminda e tabata tin un promedio di .286 ku 17 honron i 83 kareda empuha.
  • E ekipo di Atlanta Braves a laga pichernan Brandon Beachy i Kris Medlen den libertat. Ambos picher a pèrdè temporada 2014 despues di nan di dos operashon di Tommy John. Di otro banda e ekipo di Atlanta a manda e manager di e ekipo Baltimore pa papia ku outfielder Nick Markakis.
Posted on

Swordfish Aquatic Group Christmas Show

WILLEMSTAD — Swordfish Aquatic Group e aña aki lo organisá su tradishonal Show di Pasku, ku ta tuma lugá dia 14 di Desèmber próksimo, di 17:00 te 20:00 na pisina di SOV Asiento den Emmastad.

Swordfish Aquatic Group Christmas Show, titulá “Swimming Santa”, ta un tremendo show sumamente bon hinká den otro, kaminda tur nos atletanan, di chikí te grandi, prinsipiante te avansá, ta bai mustra kiko nan a presta den aña 2014.

Tambe ta bai tin un presentashon sumamente interesante di algun atleta for di Hulanda.

Entrada pa e show ta kosta únikamente Fl. 20.00 i karchinan ta optenibel na Mensing Kaminada, serka tur atleta, coach i miembronan di direktiva.

Posted on

Breve Deporte Awe #200

Breve:

  • E ekipo di Seattle Mariners a yega na un akuerdo di 4 aña pa 57 mion dòler ku Nelson Cruz. Cruz temporada pasa tabata ku e ekipo di Baltimore Orioles. Ku 40 honron, Nelson Cruz tabata e pelotero ku a konektá mas honron den Liga Grandi temporada pasa. Banda di esaki Cruz tabata tin un promedio di .271 ku 108 kareda empuha.
Posted on

Centro Dominguito den final di Liga MCB kontra Centro Barber

WILLEMSTAD — Centro Dominguito ta logra pasa pa e final di Liga MCB dia 7 di desèmber próksimo despues di a derota UNDEBA ayera den Stadion Ergilio Hato. E ekipo di UNDEBA ku tabata tin mester di un viktoria pa pasa pa final a sali bai ariba na di 27 minüt di e partido riba gol di Norvianle Naar. Den e di dos mitar Centro Dominguito ta bin bek i ta empatá e partido na unu ku gol di Steward Sambo. Un empate tabata sufisiente pa pone Dominguito den final. Apesar di esaki, e ekipo di Centro Dominguito a kana e ruta sigur i Micro Colina Jr. ta manda Dominguito ariba na di 67 minüt. E partido ta finalisá ku skor di 2-1 pa Centro Dominguito i di e manera ey e ekipo ta pasa pa final di futbòl Liga MCB. Den e final Centro Dominguito ku a klasifiká na kabes di e tabla lo topa ku Centro Barber.

Tabla di posishon:

Ekipo PH G E P GF GK GD Pt
Centro Dominguito 3 2 0 1 8 4 4 6
Centro Barber 3 2 0 1 4 4 0 6
UNDEBA 3 1 0 2 5 5 0 3
Jong Holland 3 1 0 2 3 7 -4 3
Posted on

Atletiek Vereniging Sparta ta presenta? konsierto: “Christmas on Track & Field Concert ” PART 2

WILLEMSTAD — Den afan pa sigui traha na bienestar di e atletanan ho?ben miembro di Atletiek Vereniging Sparta (AV Sparta), dia 9 di dese?mber pro?ksimo, AV Sparta ta organisa? e konsierto “Christmas on Track & Field Concert” Part 2. Dos ora di konsierto bon balansa ku kansionnan bunita di Pasku skohe spesialmente pa entretene? tur ku ta kontribui? na nos atletanan ho?ben. E konsierto ta tuma luga? riba Freewinds di 8or pa 10or anochi.

Por subi abordo for mitar di 8 pa asina tur kos kana zeta.

E konsierto ta konta ku artistanan lokal manera Rebecca Benschop (Ganado? Kanto pa Ko?rsou 2014) , Liesje Lispier i Reinier Lijfrock (artistanan lokal ku no mester di introdukshon) i “guest star” di e anochi Urvin Jano tur e artistanan di taya aki a pone nan mes disponibel pa kontribui? ku e atletanan di AV Sparta. Ta un konsierto u?niko kaminda Freewinds band ta bai kompan?a? nos artistanan lokal e anochi ei.

Ekspektativanan ta grandi pa ku e konsierto “Christmas on Track & Field”Part2 ya ku no ta tur ora bo por han?a un konsierto di Pasku di e taya aki ku nos artistanan mes ku ta aporta? na un bon kousa.

Direktiva di AV Sparta ta invita? pueblo di Ko?rsou pa duna un man na un atleta dor di kumpra un karchi pa solamente 50 florin i disfruta? di un konsierto u?niko riba Freewinds den nos bunita i u?niko haf di Ko?rsou.

Kada karchi kumpra pa e konsierto aki ta bai pa yuda drecha ve?lt di entrenamentu i material pa por sigui entrena? e ho?bennan aki di AV Sparta i tambe aporta? na partisipashon di e atletanan di AV Sparta na un “trainings camp” kombina? ku un kompetensia na Merka na yu?ni 2015.

Karchinan ta optenibel seka tur atleta di AV Sparta.
Pa mas informashon relashona? ku e Proyekto di AV SParta i/o pa hasi un donashon o?f kumpra karchi pa e konsierto, por tuma kontakto ku sr. Raymond Jansen na telefon 5402414 o?f por hasi un depo?sito riba number di kuenta Giro 114422 Atletiek Vereninging Sparta ku e spesifikashon donashon “Proyekto: Lend a Hand for a Young Athlete”

Posted on

Breve Deporte Awe #199

Breve:

  • Andruw Jones ta ofisialmente un agente liber despues ku e ekipo di Rakuten Golden Eagles e kita e pelotero for di nan roster. Siman pasa ya e ekipo a duna di konosé ku nan no tin pensa di trese Andruw Jones ku e ekipo pa un di tres temporada. Aktualmente e ekipo di Golden Eagles ta negoshando ku otro peloteronan. E ekipo no ta deskartá e posibilidat di bolbe firma Andruw den kaso ku e negosashonnan aki no kristalisá. Di otro banda, tin indikashonnan ku Andruw Jones ta den kòmbersashon ku e ekipo di Chiba Lotte Marines di Hapon.
  • Den wikènt tras di lomba e ekipo di Tiburones de La Guira a anunsiá ku Roger Bernadina lo forma parti di e ekipo. Mas ku un luna pasa e ekipo a drenta den kòmbersashon ku e pelotero pero esaki no a kristalisá te ku siman pasa. Pa prepará, Roger lo hunga awe i mañan den e liga menor di beisbòl profeshonal Venezolano. Si tur kos ta bon, mas den siman e ekipo di La Guira lo subi Roger ku e ekipo prinsipal.
  • E ekipo di Baltimore Orioles tabata den komunikashon ku Los Angeles Dodgers riba un posibel kambio pa Matt Kemp. E ekipo di Baltimore ta buskando alternativa den e kaso ku nan no por firma Nelson Cruz i/of Nick Markakis.
Posted on

Centro Barber den final di Liga MCB

WILLEMSTAD — E ultimo partidonan di e buèlta di 4 di Liga MCB a kuminsá djabièrnè ultimo. Den e partido di djabièrnè tabata e ekipo di Centro Barber ku a topa ku Jong Holland pa determiná kua ekipo lo bira e promé finalista di futbòl Liga MCB su temporada 2014. Akinan tabata Centro Barber ku a logra e pase pa final despues di a derota Jong Holland ku skor di 1-0. E gol di Barber a keda anotá na di 43 minüt pa medio di un pinalti kobra pa Jurensley Martina. Ku e derota Jong Holland ta keda eliminá for di e kampionato.

Awe e buèlta di 4 ta kontinuá ku e otro partido desisivo ora ku Centro Dominguito enfrentá UNDEBA. Ku un empate awé nochi ta sufisiente pa e ekipo di Centro Dominguito posishoná su mes den final. E ekipo di UNDEBA no tin e mesun komodidat ku su rival i mester gana si nan ke ta den e final di Liga MCB dia 7 di desèmber próksimo.

Tabla di posishon:

Ekipo PH G E P GF GK GD Pt
Centro Barber 3 2 0 1 4 4 0 6
Centro Dominguito 2 1 0 1 6 3 3 3
UNDEBA 2 1 0 1 4 3 1 3
Jong Holland 3 1 0 2 3 7 -4 3