Author: E. Evertsz

Posted on

Nominadonan pa deportista di luna Novèmber 2014

Komishon Deportista di Luna riba djasabra 06 di desèmber 2014, a reuní den sala di reunion di FFK, kaminda a evaluá i diskutí riba e kandidatonan ku a keda presentá pa miembronan dje komishon i federashonnan pa e premiashon di “Deportista di Luna” korespondiente na luna di Novèmber 2014. Manera semper ta keda spliká, na momentu ku a inisiá ku e proyekto aki, e premio aki mester sirbi komo un estímulo, a base di prestashon i komportashon, pa nos deportistanan lokal, ku ta biba na Kòrsou i ku ta kompetí den kompetensianan lokal komo tambe internashonal den representashon di pais Kòrsou.

E komishon a yega na e siguiente nominadonan:

  1. R.K.S.V. Scherpenheuvel (Futbòl). E ekipo di Futbòl Scherpenheuvel, den luna di novèmber tabata sumamente eksitoso. Tur esaki a kuminsá ora ku nan ta kaba kaya 4 invikto i ta enfrentá e fuerte ekipo di C H Mahuma (kampion 2013) den e gran final di e di dos divishon di nos futbòl lokal. Despues ku e enkuentro a finalisá den un empate na 0 durante e tempu reglamentario, tabata den tempu èkstra, na di 110 minüt, ku e ekipo di Scherpenheuvel ta logra anotá e gol di viktoria pa konkista e titulo di kampion di segundo divishon 2014. Esaki mesora a duna nan derechi pa hunga promoshon/degradashon kontra di e ekipo di Vesta. Den e promé enkuentro di promoshon/degradashon e ekipo di Scherpenheuvel ta logra un viktoria mínimo di 1-0. Ku e viktoria mínimo aki tur kos por a pasa ainda, pero den e di dos enkuentro e ekipo di Scherpenheuvel ta bini desidido pa promové pa promé divishon i den un wega sumamente bon bringa, ku tabata empatá 1-1 te na di 85 minüt, e ekipo di Scherpenheuvel ta anotá nan di dos gol i ta logra viktoria ku skor di 2-1 pa asina promové pa e promé divishon. Despues di 27 aña e ekipo ta logra subi bèk pa promé divishon . Pa e motibunan ya menshoná, R.K.S.V. Scherpenheuvel a keda skohe komo nominado pa deportista di luna Novèmber 2014.
  1. Arnalda Margarita (Sòftbòl). Arnalda ta miembro di e ekipo di Sòftbòl Pichingolo. Arnalda den luna di Novèmber a picha 5 wega, ku rèkòrt di 5-0, di kual 2 di nan tabata pa blankeo. E la picha 35 inen, enfrentando 158 batido, propiná 28 ponche i a pèrmití 27 hit. Danki na e tremendo labor aki, Arnalda ta logra ku su tim Pichingolo ta pasa pa e gran final, logrando 3 viktoria den 3 enkuentro siguí kontra di Soto. Pa e logro aki Arnalda a sali MVP di e serie aki. Den e gran final di sòftbòl  Arnalda a bolbe picha 3 dia konsekutivo, logrando 3 viktoria pa hasi su ekipo Kampion di sòftbòl 2014. Mester apuntá tambe ku Arnalda a defendé sumamente bon den e seri final. Den un wega e so tabatin 7 asistensia. Pa su gran labor i tremendo aktuashon Arnalda ta sali tambe MVP di e final i a resultá tambe MVP di kampionato di Sòftbòl 2014. Pa e motibunan ya menshoná, Arnalda Margarita a keda skohe komo nominado pa deportista di luna Novèmber 2014.
  1. Chade Nersicio (Natashon). Chade ta un hóben di 13 aña ku ta praktiká e deporte di natashon i ta den e ekipo di Typhoon. Chade Nersicio kende for di fin di Òktober a afiliá su mes na e Typhoon Swim Club, di 19 pa 23 di novèmber último, a partisipá na “24th Speedo Winter Championship Plantation 2014, Miami Florida. Chade a kompetí den 7 evento den su kategoria di 13 aña, i mester a batayá fuertemente pa logra su puesto nan den final i a logra landa 5 final. Riba 200 pechu e la logra un di 10 lugá, riba 50 free un medaya di plata, 100 pechu medaya di plata, 50 pechu medaya di plata i pa korona e fin di siman e la logra su medaya di oro riba 50 mariposa. Pa e motibunan ya menshoná, Chade Nersicio a keda skohe komo nominado pa deportista di luna Novèmber 2014.

 

Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – RIO LOUNGE & SPORTS BAR- MCB – FDOK – SALAS SPORT SHOP – LILO SULVARAN – ALLSTAR EMBROIDERY – DIORCA NV – PELOTA – DE JONGH’S SPORTHUIS – FOTO STUDIO KORT – STRAK STRAK BARBERSHOP – FFK – SELIKOR – FUNDASHON NOBO – COCA COLA.

E anunsio i premiashon di e ganadó lo tuma lugá:
Fecha: Djasabra 13 Desèmber 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.
Den un ambiente liber di humamentu i liber di alkohòl!

Posted on

Andrelton Simmons ta gana otro premio

ATLANTA — Andrelton Simmons ta gana otro premio pa su prestashon defensivo durante di e temporada 2014. E biaha aki Andrelton a gana e premio GIBBY ku ta para pa; ‘Greatness in Baseball Yearly Awards’. Pa Andrelton esaki ta e di kuater premio ku e pelotero ta keda honra kuné pa su defensa den e temporada 2014. Anteriormente Andrelton a keda otorgá e premionan di; Wante di Oro, ‘Fielding Bible Award’ i ‘Wilson Defensive Player of The Year Award’.

Posted on

Centro Barber kampion di Liga MCB

WILLEMSTAD — E ekipo di Centro Barber a titulá kampion di Liga MCB despues di a derota Centro Dominguito den e final di Liga MCB den Stadion Ergilio Hato. E ekipo di Barber ku ya a gana temporada regular ku un punto riba Centro Dominguito, e biaha aki ta gana Dominguito den e final ku skor di 1-0. Esaki apesar di ku e ekipo di Banda ‘bou a hunga e di dos mitar kompletu ku 10 hòmber despues ku Kenneth Kunst a keda ekspulsá den promé mitar. Pa Barber tabata Ruensley Leuteria ku a manda e ekipo ariba den di 38 minüt di e partido.

Posted on

Mariekson ‘Didi’ Gregorius a pasa pa New York Yankees

NEW YORK – E ekipo di Arizona Diamondbacks a kambia Mariekson ‘Didi’ Gregorius. Den e kambio aki e pelotero a bai finalisá den e ekipo di New York Yankees. Ta trata aki di un kambio ku a involukrá tres ekipo. New York Yankees a manda picher Shane Green pa Detroit Tigers, miéntras ku Arizona Diamondbacks a risibí picher Robbie Ray mas un pelotero di Liga Menor.

Didi di 24 aña di edat, a logra un promedio di .226 ku 35 kareda anotá, nuebe doblete, sinku tripel, seis honron, 27 kareda empuhe durante 80 partido temporada pasa ku Arizona Diamondbacks. E pelotero a yega Liga Grandi na 2012 ku Cincinnati Reds. Na final di 2012 Cincinnati a manda Didi Arizona Diamondbacks den un kambio. Ku Diamondbacks e pelotero a pasa dos temporada.

Den oranan di ayera tardi e gerente general di New York Yankees, Brian Cashman a papia riba e atkishon di e pelotero yu di Kòrsou. Segun Cashman, ‘Didi ta un pelotero hóben, atlétiko i defensivamente hopi bon. E tin un tiki problema kontra pichernan slengu pero ta bati pichernan derecho. Mas aleu e gerente general a bisa ku Didi lo kuminsá temporada kompartiendo e trabou di short ku Brendan Ryan. Didi no ta kompletamente desaroyá ainda segun Cashman, pero e ta kere ku Didi tin e kapasidat pa sigui progresá. E ekipo ta konsiente ku Didi su parti fuerte ta su defensa pero nan tin e konfiansa ku Didi por adelantá ofensivamente tambe.’

Parti di e konferensia via telefòn ku gerente general Brian Cashman (diskulpa pa e kalidat ku no ta masha bon):

 

For di marduga DeporteAwe.com tabata informa di e kambio di Didi Gregorius.

 

Posted on

Didi Gregorius posiblemente pa New York Yankees

MERKA — Mariekson ‘Didi’ Gregorius por ta rumbo pa un otro ekipo. Informashonnan ku DeporteAwe.com a risibí di fuente nan ta bisa, ku e ekipo di Arizona Diamondbacks a kambia Didi den un kambio di tres ekipo. Den e kambio aki Didi Gregorius lo mester resultá den e ekipo di New York Yankees. (Mas detaye ta sigui despues)

For di den ora di marduga DeporteAwe.com tabata sigui e informashon aki i nos a publika lo siguiente riba Twitter:

Posted on

Breve Deporte Awe #203

Breve:

  • E ekipo di Milwaukee Brewers a anunsia ku nan a firma Hainley Statia na un kontrakt di Liga Menor pa e temporada 2015. Temporada tras di lomba Hainley a logra un promedio di .275 kombina entre Dobel A i Tripel A.
Posted on

Wega Final di Liga MCB Promé Divishon

WILLEMSTAD — Despues di lunanan di diferente partidonan di futbòl sumamente interesante, a yega e dia ku nos lo bai sa ta ken lo titulá su mes komo e kampionnan di Liga MCB Promé Divishon.

Djaluna último e buèlta di 4 a yega na su final i Centro Dominguito ku Centro Barber ta e 2 ekiponan kua logra klasifiká i lo bai batayá pa bira e kampionnan di Liga MCB Promé Divishon.

Aña pasa Centro Dominguito a logra derotá Centro Barber i a bira e kampionnan di Liga MCB, e aña aki kiko lo bai pasa? Historia lo ripití òf ta un otro gai lo bai kanta?

FFK i MCB ta invitá bo bin presensia e Gran Final di Liga MCB Promé Divishon!

Bin ku hinter bo famia pa bin disfrutá di un tremendo final, apoyá e 2 timnan aki i mira ta ken lo bira kampion e aña aki. E kosto pa e partidonan aki ta fl.12,50 pa hende grandi i fl.5,- pa mucha i 60+. Karchinan adelantá lo kosta fl.10,- pa hende grandi i fl.5,- pa mucha i 60+. Por haña karchi adelantá na FFK bou di ora di ofisina i tambe serka e 2 ekiponan ku lo hunga e partido final aki esta Centro Barber i Centro Dominguito. Animashon musikal lo bai ta na enkargo di Gio Fuertisimo.

FINAL DI DEN PASADO:

23 ougùstùs 2009:       CSD Barber vs Hub. Fortuna 0-1

15 ougùstùs 2010:       CSD Barber vs Hub. Fortuna 0-1

28 sèptèmber 2011:    CSD Barber vs Hub. Fortuna 1-0

30 sèptèmber 2012:    C. Dominguito vs Undeba      1-0

27 òktober 2013:         C. Dominguito vs CSD Barber 2-1

 

WEGANAN CSD Barber vs C. Dominguito 2014:

Promé buèlta:

Djasabra 3 mei 14 Centro Dominguito vs CSD Barber 4 1

 

Segunda buèlta:

Djasabra 9 oug. 14 CSD Barber vs Centro Dominguito 3 1

 

Buèlta di 6:

Djadumingu 2 nov. 14 CSD Barber vs Centro Dominguito 0 2

 

Buèlta di 4:

Djabièrnè 21 nov. 14 Centro Dominguito vs CSD Barber 1 2

 

TABLA DI GOLEADOR:

Nòmber Ekipo Gol
Colina Mirco Centro Dominguito 25
Bernardus Ashar Centro Dominguito 18
Martina Jurensley CSD Barber 17
Naar Norvianel Undeba 17
Leuteria Ruensly CSD Barber 16
Posted on

Kòrsou lo ta presente ku 5 partisipante na Schotborgh Cup 2014

WILLEMSTAD — Djaweps atardi a sali e selekshon nashonal di Federashon Biyar Kòrsou rumbo pa e isla di Bonaire pa bai partisipá den Schotborgh Cup 2014.

E evento aki a tuma lugá pa promé biaha aña pasa na luna di desèmber aki na Kòrsou, kaminda e selekshon di Bonaire a bai ku e titulo ganando Kòrsou 11 pa 6 .

E aña aki ta toka turno pa e Federashon di Biyar Boneriano pa organisá e evento  ku ta dediká na memoria di e gran Eddy Schotborgh ( q.e.p.d.). kende ta e persona ku a pèrkurá ku den añanan nobenta nos (Antia Hulandes) por a partisipá den eventonan di biyar rònt mundu . Por menshoná ku e tres promé deportistanan ku a partisipá den un mundial tabata Eithel”Boy” Soliana di Bonaire , Richard Wolff di Aruba i Johnny Hellmund kendenan a partisipá na kampionato mundial ku a tuma lugá na Koningswinter , Alemania na 1993 . Tambe Sr. Schotborgh ta karga e nòmber di e persona ku a diseñá e mesa ofishal pa World Pool/Billiard Association kual mesa awendia ta keda usá den tur kampionato mundial i tambe eventonan di renombre .

E biaha aki e selekshon di Kòrsou ta integrá pa 1. Roukos Tannoury , 2. Michael Arvelo, 3. Afmad Ibrahim, 4. David Prins i 5. Sybren Boekhoudt kende tambe lo ta e kapitan . E evento lo tuma lugá dianan 5, 6 i 7 desèmber den Sporthal na Kralendijk i lo kuminsá djabièrnè anochi pa 8’or .

Federashon Biyar Kòrsou ta deseá su representantenan tur klase di éksito i ta deseá Dutch Caribbean Billiard Union/ Febibo tur klase di éksito ku e organisashon.

Posted on

Millard Petrona i Lainbert Mercelina lo partisipa na “Campeonato internacional de las luces” di BMX

WILLEMSTAD — Ayera djaweps 4’or di atardi, e hóbennan Millard “The MJ Machine” Petrona i Lainbert Mercelina a sali pa Medellin, Colombia pa partisipa na e “Campeonato internacional de las luces” di BMX.

Ta trata di un kompetensia internashonal di BMX ku lo tuma lugá dianan 5 i 6 di desèmber na Medellin Colombia i ku por sierto e aña aki ta selebrá su di 10 aniversario.

Lo tin diferente kompetidó internashonal i tambe lokal(Colombia) di renombre. Di Canada lo tei Tory Nyhaug, di Merka lo tei Sean Gaian, tambe lo tei Joris Daudet di Fransia, meskos Chris Mireles di Mexico i hopi mas.

Di Colombia mes lo tei entre otro e kampion olímpiko Mariana Pajon i tambe Carlos Mario Oquendo ku tambe lo ta kompetiendo den e kampionato aki.

E hobennan lo ta biahando ku Sr. Millard Petrona i lo ta di regreso djaluna 08 di desèmber próksimo.

Posted on

Breve Deporte Awe #202

Breve:

  • E ekipo di Tokyo Yakult Swallows a anunsiá ku nan a renegosha e kontrakt di Wladimir Balentien. Wladimir ta bai drenta e ultimo aña di su kontrakt di tres aña ku e la firma na final di 2012 pa 2,5 mion dòler. E ekipo di Swallows ta bai duna Wladimir 750 mil dòler adishonal pa e próksimo temporada.
  • E ekipo di Tiburones de La Guairá a anunsiá ku nan a añadí Roger Bernadina riba e roster di e ekipo. Pa Roger esaki ta su di tres biaha ku e ta hunga beisbòl na Venezuela. Den pasa e pelotero tabata huntu ku e ekipo di Navegantes del Magallanes i tambe ku Bravos de Margarita. Mesora Roger a mira akshon den e partido di ayera kaminda e la bai di 4-2 ku 1 kareda anotá, 2 kareda empuha i 1 base roba.
  • E ekipo di Atlanta Braves a yega na un akuerdo di kuater aña pa 44 mion dòler ku outfielder Nick Markakis. No mas ku algun dia pasa e ekipo di Atlanta a manda e manager di e ekipo Baltimore pa papia ku outfielder Nick Markakis. Markakis temporada pasa tabata ku e ekipo di Baltimore Orioles kaminda e tabata tin un promedio di .276 ku 14 honron i 50 kareda empuha.