Author: E. Evertsz

Posted on

Ditto Acosta di Aruba ta gana promé stop di Curaçao Pro Tour

WILLEMSTAD — Djasabra dia 24 di yanüari tabata tin e inisio di e torneo di biar organisá pa Curaçao Billiards Association ku ta e famoso Curaçao Pro Tour kaminda un total di 26 partisipante tantu lokal i internashonal a partisipá.

Curaçao Pro Tour (CPT) ta un torneo ku ta wòrdu hunga durante henter e aña. Tin un total di 8 stop anto djasabra ultimo tabata e promé stop.

E disipliná ku a wòrdu hunga tabata 10 ball. E torneo ta kuminsá ku e Sistema di ‘double Knock Out’ pero ora yegá na e delaster 16 e la bira un ‘Single Knock Out’. Den otro palabra esun ku pèrdè ta afó.

Esnan ku a klasifiká pa e delaster 16 nan tabata Marvin Abdul (Boneiru), Julian Rijna, Jeffrey Nieuwenhuijzen, Javier Augusta, Bryan Farah, Karl Vervuurt, David Prins, William Ochoa, Brayen Landskind, Robertico Freitas, Salim Kuzi, Afmad Ibrahim, Raymond Magdalena, Jimmy Rol, Ditto Acosta (Aruba) i Gio Ariza.

Den e kuart final a hunga: Julian Rijna kontra Jeffrey Nieuwenhuijzen, Bryan Farah kontra William Ochoa, Robertico Freitas kontra Afmad Ibrahim i Jimmy Rol kontra Ditto Acosta.

E semifinal nan a bai entre Jeffrey Nieuwenhuijzen i Bryan Farah anto Ditto Acosta kontra Afmad Ibrahim.

E final a bai entre Jeffrey Nieuwenhuijzen di Kòrsou i Ditto Acosta di Aruba. Den un final di kita sombré anto manera nan ta bisa den e deporte di biar un final ku ta bai hill hill Ditto ta logra gana ku score di 8-7. E siguiente stop lo ta dia 7 di mart anto e disipliná lo ta bola 8.

Djasabra awor dia 31 di yanüari lo toka turno na e partisipantenan di Level 3 di CBA ku lo inisiá nan aña deportivo.

Posted on

Breve Deporte Awe #1-007

  • E ekipo di Baltimore Orioles a anunsiá ku nan a firma Sharlon Schoop na un kontrato di Liga Menor. Temporada pasa ya Sharlon tabata ku e organisashon di Baltimore kaminda e pelotero a hunga den dòbel A ku e ekipo di Bowie Baysox. Den 77 partido Sharlon a logra un promedio di .217 for di kua 17 doblete i 3 honron.
  • E ekipo di Miami Marlins a yega na un akuerdo di un aña pa 2 mion dòler ku Ichiro Suzuki. Suzuki temporada pasa tabata ku e ekipo di New York Yankees kaminda e tabata tin un promedio di .284 den 143 partido.
  • E ekipo di beisbòl Vegueros de Pinar del Rio Cuba ku lo representá Cuba den e Seri di Karibe lo reforsá su mes ku no ménos di 16 pelotero. Segun e komisario di e Federashon di Beisbòl Kubano, Herberto Suarez, Cuba ta bin pa gana e seri. Den e 16 refuersonan di Cuba tin, entre otro Yulieski Gourriel, Alfredo Despaigne, Lourdes Gourriel, Frederich Cepeda i Hector Mendoza. Tur sinku peloteronan aki a firma kontrakt pa hunga beisbol profeshonal na Hapon e aña aki.
Posted on

Brian Mariano ta klasifiká pa Kampionato Oropeo

APPELDOORN — Den wikènt tras di lomba e temporada 2015 di kompetensia indoor a kuminsá na Hulanda ku e karedanan di Zwolse Atletiek Verening PEC. Akinan mes ora atleta Brian Mariano a logra kore e tempu nesesario pa klasifiká riba 60m pa e Kampionato Oropeo Indoor na Praga, Repúblika Cheko.

Brian den e promé buèlta di e kompetensia a kore un tempu di 6.72 sekònde. Mas despues den e final Mariano a sali na promé lugá koriendo un tempu di 6.64 sekònde. Manera ya menshoná e tempu aki ta bon pa Brian klasifiká pa e Kampionato Oropeo Indoor ku lo tuma lugá na Praga den luna di mart próksimo.

Den un entrevista ku e revista Hulandes Atletiek Week Brian a bisa di ta sorprendé pa su prestashon. “Mi tin hopi preokupashon aktualmente”, Brian a bisa Atletiek Week. Segun e atleta, e ta en búskeda di un kas i tambe un trabou. “Mainta trempan mi ta na uitzendbureau, pero pa trahadó nan den konstrukshon no tin masha kos”, Brian a terminá bisando.

Posted on

Jair Jurrjens ta risibi invitashon pa Spring Training

MERKA — E ekipo di Colorado Rockies a ekstende un invitashon na Jair Jurrjens pa ta presenta ku e ekipo di Spring Training. Manera ta konosi picher, e picher a firma un kontrakt di Liga Menor ku e ekipo di Colorado Rockies for di november di aña pasa. Den Spring Training Jurrjens lo haña e posibilidat di prueba su mes i posibelmente keda ku e ekipo di Rockies den Liga Grandi.

Temporada pasa ya Jair tabata ku e ekipo di Colorado Rockies pero a opta pa bira agente liber na final di e temporada. Ku e organisashon di Rockies e pelotero a logra un rèkert di 0-5 ku un efektividat di 4.60. Na dos okashon Jair a haña e oportunidat pa picha ku Colorado Rockies den Liga Grandi. Akinan den dos salida Jurrjens a logra un rèkert di 0-1 ku un efektividat di 10.61.

Posted on

Breve Deporte Awe #1-006

  • Jurickson Profar lo tin otro seshon di tira bala awe. Meskos ku djamars ultimo Jurickson lo tira for di un distansia di 45 pia. Despues di a tira pa promé biaha djamars ultimo e pelotero a bisa ku e no tabata tin problema ku e skouder. Si tur kos bai meskos awe, Jurickson lo tira un biaha mas djaluna pero e biaha aki na un distansia di 60 pia. Despues di e seshon di djaluna e ekipo lo laga Jurickson hasi un MRI pa wak si tur kos ta bon ainda ku e skouder.
  • Un grupo di investor Sur Korea ta papiando ku e ekipo di Los Angeles Dodgers pa kumpra un parti minoritario den e ekipo. Segun korantnan di Sur Korea e grupo ta interesá na kumpra 20 porshento di e ekipo pa 370 mion dòler. Sin embargo fuentenan ku konosementu di e negosashonnan ta bisa ku e aktual doñonan lo no bai di akuerdo ku e proposishon aki. Aktualmente e doño di e ekipo ta Guggenheim Baseball Management.
  • E ekipo di Atlanta Braves a yega na un akuerdo di un aña ku outfielder Jonny Gomes. E pelotero lo risibí un montante di 4 mion dòler den 2015. Den 2016 e ekipo tin e oportunidat di retené e pelotero pa 3 mion dòler. Pa e temporada di 2015 e ekipo ta proyektá un outfield ku Zoilo Almonte den left field, B.J. Upton den center field i Nick Markakis den right. Jonny Gomes lo kompartí tempu ku Almonte den left. Gomes a pasa temporada pasa ku Boston Red Sox i Oakland Athletics logrando un promedio kombiná di .234.
  • Kedando riba Atlanta Braves, e manager di e ekipo Fredi Gonzalez tin ketu bai komo meta pa yega playoff e temporada aki ku e ekipo. Esaki apesar di ku e ekipo a kambia vários di su hungadonan estelar den ultimo lunanan. Segun e manager, Andrelton Simmons, Freddie Freeman i Nick Markakis te awor aki ta e úniko hungadónan ku lo ta diariamente riba e lineup. Atlanta Braves a finalisá temporada pasa number dos den nan divishon ku un rèkert di 79-83.
  • San Francisco Giants a yega na un akuerdo di dos aña i 7,5 mion di dòler ku e outfielder Venesolano, Gregor Blanco. Temporada pasa ku Giants e pelotero tabata tin un promedio di .260 den 146 partido.
Posted on

Weganan di Rei 2015

WILLEMSTAD — Partisipá na Koningsspelen 2015, for di awe tur skol di fundeshi por inskribí pa e dia di spòrt mas dibertido di aña: Koningsspelen, esta Weganan di Rei.

Weganan di Rei a wòrdu krea spesialmente pa alumnonan di skol di Fundeshi tantu na Hulanda komo e parti Karibense di Reino. Meta di e evento aki ta pa siña nos muchanan kon importante i dibertido movementu por ta. Esei ta nifiká ku spòrt i salu ta para sentral.

Dos aña pasa a organisá e Weganan di rei pa promé biaha durante inougurashon i koronashon di Rei Willem Alexander. E aña aki e dia deportivo ta wòrdu organisá pa di tres biaha konsekutivo, riba e delaster dia di skol promé ku aniversario di Rei, dia 24 di aprel 2015.

Meskos ku tur otro aña, e dia ta kuminsá ku un desayuno salu. E aña aki un biaha mas Jumbo Supermarkt di Hulanda ta spònser e desayuná pa tur mucha rònt Reino. Un desayuno salu ta importante pa kuminsá e dia ku hopi energia. Nos organisashon ta kere ku ta importante pa konsientisá muchanan riba kome salu, pero ku movementu ta dibertido tambe. Nos ta orguyoso ku algu ku a kuminsá pa un aña, a krese bira un fenómeno asina grandi. Ya e Weganan di Rei ta birando un tradishon Hulandes Karibense importante.

Komo ku dia 24 di aprel ta un dia regular di skol, nos ta spera di por konta ku mas ku di 40.000 mucha rònt nos islanan.

For di awe tur skol por inskribí nan alumnonan na koningsspelen@nospais.com

Inskripshon ta dura te ku dia 15 di febrüari próksimo. Kòrda ‘like’ tambe nos página di facebook: ‘Koningsspelen Caribisch Koninkrijk’, pa asina bo keda informá di tur akontesimentu rondó di Weganan di rei 2015.

Posted on

Futbòl Skol di Fundeshi ta bai kuminsá

WILLEMSTAD — Fundashon Desaroyo Deportivo Kòrsou ta informá tur skol di fundeshi ku a inskribí pa e kampeonato di futbòl pa mucha hòmber i mucha muhé kategoria 2001 i mas hóben ku djaluna awor 26 di yanüari ta start ku e kampeonato pa aña eskolar 2014-2015.

Den e kategoria pa mucha hòmber tin 3 Pul. Den Pul-A tin: Annie Koenraad, International School i Sta. Clara. Den Pul-B: San Hosé, Immanuel i Johan Maurits. Den Pul-C: Mon. Willem Ellis, Van Houte, Don Sarto i Ellis Juliana. Den kategoria di muhé tin 1 Pul: Don Sarto, Annie Koenraad, Mon. Willem Ellis i San Hosé.

E weganan pa djaluna 26 di yanüari den stadion di Vesta ta: 2or: San Hosé vs Mon. Willem Ellis (M), 2or: Annie Koenraad vs Sta. Clara (HA), 3or: San Hosé vs Johan Maurits (HB), 3or: Don Sarto vs Mon. Willem Ellis (HC). Djarason 28 di yanüari: 2or: Don Sarto vs Annie Koenraad (M), 2or: International School vs Sta. Clara (HA), 3or: Immanuel vs Johan Maurits (HB), 3or: Ellis Juliana vs Van Houte (HC).

Posted on

Curacao Pro Tour (CPT) ta start na RIO Lounge & Sportsbar

WILLEMSTAD — Djasabra awor dia 24 di yanüari 2015 lo ta e inisio di e di tres aña konsekutivo di Curacao Pro Tour.

Curacao Pro Tour (CPT) ta un kampeonato di biar organisá pa Curacao Billiards Association ku a wòrdu funda na aña 2013 door di Karl Vervuurt. Curacao Billiards Association ta apropiá pa tur amante di biar paso tin diferente nivel pa akomodá tur hende ku ta level 3, level 2, level 1 anto esun mas altu ku ta e Curacao Pro Tour.

Na aña 2013 CPT a kuminsá ku 16 hungadó ku a partisipá riba e nivel mas altu. E aña aki lo bai tin un total di 26 hungadó ku lo bai partisipá. CPT lo bai tin un total di 8 stop durante aña. Pa kada un stop kada hungadó ta haña punto a base di su prestashon. Na final di aña ta wak ken tin mas tantu punto pa asina por saka e kampeon di CPT.

E disiplinanan ku lo wòrdu hunga ta 8 ball, 9 ball i 10 ball.

Lo bai tin un bolsa sumamente atraktivo ku un total di 13.000 florin pues kada persona lo duna su máksimo esfuerso pa e por kai den e premionan.

E kampeon di CPT na aña 2013 tabata Bryan Farah anto na 2014 Roukos Tannouri.

E aña aki lo ta bai tin un primisia kaminda lo bai tin dos hungadó international ku lo bai partisipá. Esaki ta e actual number 1 di Boneiru ku ta Marvin Abdul i di Aruba Ditto Acosta ku ta wòrdu konsiderá komo un di esnan mas mihó di Aruba. Ditto tambe ta un ex-kampeon Pan-Amerikano den e disipliná di bola 9.

Tambe nos mester menshoná ku e aña aki lo bai tin un partisipante di apénas 13 aña ku ta Shamir Tremus ñetu di Nelson Tremus ku ta hasiendo un bon trabou aya na Boca Sami ku su team Boca Stars.

Nelly Zimmerman tambe prosedente di Boca Stars lo partisipá komo e úniko femenino. Nelly na vários okashon a representá Kòrsou na weganan Pan-Amerikano i tambe kampeonato Mundial.

Akinan e lista kompletu di tur hungadó ku lo partisipá na CPT 2015:

Bryan Farah, Roukos Tannouri, David Prins, Javier Augusta, Salim Kuzi, Raymond Magdalena, Gio Ariza, Karl Vervuurt, Shandro Paula, Mark Janga, Alex Vieira, Marlon Pietersz, Joey Fung A Loi, Jeffrey Nieuwenhuijzen, Gemajel Rol, Robin Nazeer Appro, Marvin Abdul (BON), Shamir Tremus, Nelly Zimmerman, William Ochoa, Julian Rijna, Briant Landskind, Afmad Ibrahim, Ditto Acosta (AUA), Robertico Freitas, Isidro Noor

Curacao Billiards Association ta yama un danki na FEBIKO pa e kooperashon i alabes ta invitá henter pueblo di Kòrsou bin apoyá e 26 hungadónan i alabes disfrutá di un nivel sigur bastante altu di biar.

Weganan lo kuminsá Djasabra 10 di mainta i lo siguí henter dia te ku 7or anochi na RIO Lounge & Sportsbar.

Posted on

Inskribí pa Kampionato di Kòrsou Bola 8

WILLEMSTAD — Tur kos ta kla pa biar ranka sali den 2015 y e promé evento ta e Kampionato di Kòrsou Bola 9. Tur miembro por inskribí pagando 25 florin y no miembronan 35, esaki por tuma lugá serka Sr. David Prins na 5243869 of via info@febiko.org of na Poolarena durante dianan di aktividat. Inskripshon ta sera djaluna awor dia 26 pa 12’or di mèrdia. E evento ta programa pa kuminsá djárason 28 y terminá djadumingu dia promé di febrüari. Pues no pèrdè e oportunidat aki pa partisipá. E kampion y subkampion ta klasifiká mesora pa kampionato Pan-Amerikano benidero ku lo tuma lugá den luna di yüli. Federashon Biyar Kòrsou ta spera di konta ku partisipashon di tur su miembronan.

Posted on

Breve Deporte Awe #1-005

  • Segun e asistente Gerente General di Texas Rangers, Thad Levine e resultadonan di e promé entrenamentu di Jurickson Profar tabata positivo. Jurickson a kuminsá tira bala pa promé biaha for di sèptèmber ora ku Texas Rangers a prohibí tur aktividat di beisbòl di e pelotero pa motibu di leshon na skouder. Ayera Jurickson a tira 45 bala na un distansia di 45 pia. E pelotero lo tin un otro seshon di entrenamentu djabièrnè próksimo.
  • E ekipo di beisbol Hapones, Tokyo Yakult Swallows ta bisa ku e pia robes ku Wladimir Balentien a opera aña pasa no ta kurando manera a antisipá. E rekuperashon lento di e pia ta pone ku e pelotero lo pèrdè spring training otro luna i posiblemente tambe e komienso di temporada. Esaki mes ora ta trese interogatorio riba e pelotero su partisipashon ku e selekshon oropeo ku na mart próksimo mester hunga dos wega di fogeo kontra Hapon.
  • Segun informashonnan, picher Ryan Vogelsong lo no firma ku e ekipo di Houston Astros mas. Tur kos tabata parse ku Ryan Vogelsong lo a yega na un akuerdo ku Astros ayera. Pero aparentemente negosashonnan ku Astros a pega i awor e pelotero ta papiando ku San Francisco Giants riba un posibel regreso ku e ekipo.
  • E ekipo di Atlanta Braves a firma infielder, Kelly Johnson na un kontrato di Liga Menor ku invitashon pa Spring Training. Johnson a kuminsá su karera di beisbòl profeshonal hungando 10 aña den e organisashon di Atlanta Braves. Temporada pasa e pelotero a pasa den tres ekipo esta New York Yankees, Boston Red Sox i Baltimore Orioles. Akinan e la logra un promedio kombiná di .215.
  • E ekipo di Milwaukee Brewers a yega na un akuerdo di Liga Menor ku invitashon pa Spring Training ku picher Dontrelle Willis. E èks-nobato di aña i strea di Florida Marlins no a mira akshon den Liga Grandi for di 2011. Mas resien e pelotero a pasa tempu den Liga Menor ku Orioles, Angels, Rangers i den Liga Independiente.
  • Miami Marlins a hasi un oferta di un aña pa 2 mion dòler na Ichiro Suzuki. E ekipo ta optimistiko pero no sigur ku nan lo yega na un akuerdo ku e veterano. Suzuki temporada pasa tabata ku e ekipo di New York Yankees kaminda e tabata tin un promedio di .284 den 143 partido.