VANCOUVER (DA) — Federashon Futbòl Kòrsou a partisipá djaweps 30 di aprel na e di 76 Kongreso di FIFA, ku a tuma lugá na Vancouver, Canada. Na nòmber di FFK tabata presente presidente señor Gilbert Martina i sekretario-general señor Jan Peter Dogge.
Durante e kongreso a trata, entre otro, e aprobashon di e kuenta anual 2025 i e siklo di presupuesto 2027–2030, inkluyendo e presupuesto pa aña 2027. Ademas, a presentá un presupuesto nobo pa e periodo 2027–2030, ku ta mustra un oumento te na 14 miar dòler, kompará ku e siklo anterior 2023–2026.
Un parti importante di e siklo di presupuesto akí ta e Programa FIFA Forward. Den e fase nobo, FIFA Forward 4.0, ta premirá un oumento di 20 porshento kompará ku FIFA Forward 3.0.
E programa akí ta duna sosten finansiero na e federashonnan miembro, tantu pa gastunan operashonal komo pa desaroyo di aktividatnan di futbòl, kompetensianan i infrastruktura. Tantu e kuenta anual 2025 komo e siklo kompleto di presupuesto 2027–2030 a keda aprobá unánimamente pa e miembronan afiliá na FIFA.
Na final di e kongreso, presidente di FIFA señor Gianni Infantino a anunsiá ofisialmente ku e ta bolbe postulá su mes komo kandidato pa presidensia na e elekshonnan ku lo tuma lugá otro aña. Esaki lo ta su di tres término.
Fuera di e programa formal, a tene diferente kòmbersashon konstruktivo ku representantenan di FIFA i Concacaf tokante e desaroyo mas aleu di futbòl na Kòrsou. E kòmbersashonnan akí ta sekundá e plan di maneho stratégiko 2025–2029, ku a keda aprobá na sèptèmber di aña pasá pa e miembronan di FFK.
Pa sera e kongreso, a saka un pòrtrèt di e grupo di e representantenan di e paisnan di Concacaf ku ta partisipá na e Mundial 2026, ku lo tuma lugá na Canada, Estádos Unídos di Merka i México.
Riba e pòrtrèt di robes pa drechi: Gilbert Martina, presidente di federashon di futbòl di Kòrsou, Mikel Arriola, presidente di federashon di futbòl di México, Victor Montaglianni, presidente di Federashon Concacaf, Monique Andre, presidente di komishon di normalisashon di Haiti, Peter Augruso, presidente di federashon di futbòl di Canada i Manual Arias, presidente di federashon di futbòl di Panamá.