WILLEMSTAD (DA) — Un delegashon di FIFA, entre kua leyenda di futbòl i embahador di FIFA Hristo Stoichkov, a yega Kòrsou pa un programa intensivo den kuadro di FIFA Futbòl pa Skolnan (F4S). E inisiativa mundial akí ta enfoká riba desaroyo i edukashon di muchanan di 4 pa 14 aña, ku e meta pa siña e muchanan abilidatnan di bida esensial via di futbòl.
E delegashon ta konsistí di kuater persona i ta dirigí pa Stoichkov, èks-strea di FC Barcelona i un di e embahadornan internashonal di e programa. Durante nan estadia, e programa F4S lo ta implementá lokalmente den kolaborashon estrecho ku Federashon Futbòl Kòrsou (FFK).
E programa akí ku yama ‘Football for Schools’ tin dos ambishon prinsipal: stimulá partisipashon amplio den deporte i promové edukashon, desaroyo i empoderamentu di muchanan rònt mundu. Ademas, e programa ta konsentrá riba siña abilidatnan di bida sertifiká ku ta aportá ku kambio sosial positivo.
Durante e aktividatnan, kuater tema sentral ta den sentro di atenshon: komprondementu personal, relashon, biba den un sentido mas amplio den komunidat, salú & bienestar. Muchanan ta siña entre otro tokante konfiansa den nan mes, komunikashon, rèspèt, liderazgo i kustumbernan di bida saludabel Esaki ta netamente abilidatnan ku ta esensial pa nan desaroyo komo siudadanonan aktivo i responsabel.
Pa ehekushon di e programa akí na Kòrsou, 40 skol a inskribí. Komo parti di e programa, tambe lo firma un Memorandum of Understanding (MOU) entre FFK i gobièrnu. Esaki ta un kondishon importante di parti di FIFA pa por partisipá.
E programa ta tuma lugá di djárason 15 te ku djabièrnè 17 di aprel. Djárason i djaweps lo trein e entrenadónan. E programa ta klousurá djabièrnè ku un festival grandi na SDK, na kua 100 mucha lo partisipá aktivamente i 100 mucha mas lo ta presente komo oudiensia.