WILLEMSTAD (DA) — Den fin di siman tras di lomba e Kampionato FFK Promé Divishon 2025-2026 a kontinua ku sinku partido kaminda SUBT, Victory Boys, Atletiko Saliña, Jong Holland i Scherpenheuvel tur a saka viktoria.
Djabièrnè, SUBT a derotá Inter Willemstad 2-0 ku dos gol di E. Cundumi na di 50 i 65 minüt.
Djasabra den e promé partido, Victory Boys a bin di atras pa gana Centro Barber 3-1. A. Cambindo a habri e markado pa Barber den minüt 28, pero T. Demmers a empata den minüt 87. L. Hojer den minüt 90+7 ta manda Victory Boys ariba i K. Cijntje den minüt 90+8 ta kompleta e remontada pa Victory Boys gana 3-1.
Mas despues djasabra, Atletiko Saliña a gana Centro Dominguito 2-0. O. Mook a habri e kuenta den minüt 63 i H. Ospina a hinka e di dos den minüt 72.
Djadumingu, Jong Holland a derotá Jong Colombia 4-1. C. Benita a pone Jong Holland dilanti den minüt 14. Sugently Martines Martha a empata pa Jong Colombia den minüt 53, pero Gaspard Jean Baptiste a bolbe duna bentaha na Jong Holland ku golnan den minütnan 59 i 72. Davidson Bobby Rosa a sera e kuenta den minüt 90+2.
Den e último partido di e fin di siman, Scherpenheuvel a gana UNDEBA 2-1. B. Guedez a marka den minütnan 33 i 44 pa manda Scherpenheuvel ariba 2-0. S. Bernardus a deskontá pa UNDEBA den minüt 90+1.
Despues di 17 partido, Scherpenheuvel ta lidera ku 39 punto. Jong Holland ta di dos ku 37, i Victory Boys ta den terser lugá ku 33.
Jong Colombia i Inter Willemstad tin 29 punto kada un, Centro Dominguito tin 26, Barber 18, UNDEBA 16, Atletiko Saliña 13 i SUBT 5.