MIAMI — Ku orguyo un i tur a tuma nota i selebrá e echo ku nos Andruw Jones a keda nominá pa Hall of Fame di Beisbòl Merikano. Den rekonosementu di esaki i inisiativa di Minister di Desaroyo Ekonómiko, Roderick Middelhof, Kòrsou a deklará leyenda di beisbòl Andruw Jones komo e promé “Curaçao Sport Tourism Ambassador.” E nombramentu aki ta rekonosé su karera ekstraordinario den deporte profeshonal i e kontribushon ku el a hasi pa pone Kòrsou riba mapa.
Andruw Jones, ku su trayekto remarkabel den Major League Baseball, ta un símbolo di ekselensia, dedikashon i perseveransia. Komo e promé yu di Kòrsou ku a logra drenta den prestigioso Baseball Hall of Fame, su historia ta inspirá generashonnan nobo di deportistanan i hóbennan pa kere den nan talento i perseverá nan meta.
Ku e inisiativa aki, Kòrsou ke fortalesé e konekshon entre deporte, turismo i promoshon internashonal, mientras ku Andruw Jones lo representá nos isla komo un figura inspiradó i embahador internashonal di nos talento i kultura.
Na e okashon aki, Minister di Desaroyo Ekonómiko, Sr. Roderick Middelhof, huntu ku Curaçao Tourist Board (CTB), a firmá e deklarashon ofisial ku ta nombra Andruw Jones komo “Curaçao Sport Tourism Ambassador”, formalmente rekonosiendo su ròl komo representante di Kòrsou den e mundo internashonal di deporte i turismo.
Despues di e seremonia ofisial na Brickell, Miami, a tuma lugá un brindis spesial pa selebrá Andruw Jones komo nos promé Embahador Turístiko di Deporte, mirando pa futuro kon huntu lo sigui pone Kòrsou riba mapa.
Gobièrnu di Kòrsou i Curaçao Tourist Board ta ekspresá su felisitashon na Andruw Jones, i ta orguyoso di su kontribushon kontinuo pa inspirá mundu i pa representá Kòrsou riba plataforma internashonal.
Na e evento tabatin presensia di Gerlien Croes (Minister di Enseñansa, Hubentut, Inovashon, Relashonnan di Reino i Deporte di Aruba), Muryad de Bruin (Direktor di CTB), huntu ku diferente medionan di prensa di Kòrsou, Aruba i Boneiru.