WILLEMSTAD — E selekshon nashonal maskulino, U-17 di Kòrsou, a sali pa Guatemala pa partisipá na e ronda di klasifikashon pa Mundial di FIFA kategoria U-17. Ta trata aki di kampionato mundial, ku lo tuma lugá na luna di novèmber di e aña akí na Qatar.
Un total di 34 pais ta kompetí den e torneo aki ku a keda repartí den 6 grupo di 4 i 2 grupo di 5 pais. Den e fase desisivo di e grupo akí, Kòrsou lo enfrentá Cuba, Belize i El Salvador, ku e meta pa logra un posishon históriko den e Mundial akí.
Durante e torneo round-robin, nos selekshon U-17 lo hunga kontra di Cuba dia 6 di febrüari 6’or di atardi, kontra di Belize dia 8 di febrüari 7’or di anochi i kontra di El Salvador dia 10 di febrüari 6’or di atardi, orario di Kòrsou. Solamente e number 1 di grupo ta klasifiká pa e Mundial di FIFA U-17. Si Kòrsou logra tres viktoria, lo e sigurá di su klasifikashon pa Qatar.
E weganan di kualifikashon pa Mundial U-17 maskulino, ta wòrdu organisá na seis pais anfitrion: Honduras, St. Vincent & Grenadines, Panama, Trinidad & Tobago, Costa Rica i Guatemala.
E selekshon ta bou di guia di bondscoach Henry Caldera i e ta wòrdu asistí pa Sendley Bito. Esun enkargá ku nos materialnan ta Olivier Windster, nos masagista ta Ebenezer Lourentz, e dòkter di tim ta Ramfis Fillet i e manager di tim ta Liviéna Rijnschot. E direktor tékniko i manager di desaroyo Dean Gorré tambe ta kompañá nos selekshon i e hefe di delegashon ta David Heykoop, miembro di direktiva di FFK.
Nos selekshon nashonal U-17 ta konsistí di:
- Jëalardino Floranus (C-Stars United)
- Neurlendy Tokaay (C-Stars United)
- Keano Brazil (Jong Holland)
- Taysison Bregita (Inter Willemstad)
- Nathan Isenia (Scherpenheuvel)
- Raydion Melfor (Atletiko Saliña)
- Eljan Sparen (C-Stars United)
- Izjaïr Noor (Centro Juve)
- Kydion Seinpaal (C-Stars United)
- Jean-Jacques Rigaud (C-Stars United)
- Jyano Rojer (Willem II, Hulanda)
- Jereem Pieternella (Fc Skillz, Hulanda)
- Juraino Phelipa (Sparta, Hulanda)
- Kevin Davies (Feyenoord, Hulanda)
- Ribrayshen Eduarda (Sparta, Hulanda)
- Kayne Eshun (PSV, Hulanda)
- Genairo Louisa (Fc Utrecht, Hulanda)
- Tyrone Lucas (NEC, Hulanda)
- James de Vos (Fc Utrecht, Hulanda)
- Fernando Daal (Ado Den Haag, Hulanda)
- Duron van Bennekom (Feyenoord, Hulanda)