WILLEMSTAD — Metro Leadership Sports Academy for di Atlanta, Georgia lo bishita Kòrsou di 16 te 19 di yanüari 2026 pa partisipá den un eksperensia kultural i un seri di wega di beisbòl hubenil kontra selekshonnan lokal di Kòrsou. E bishita ta wòrdu organisá pa e Curaçao Baseball Development Foundation (CBDF) den kolaborashon ku Curaçao Tourism Board (CTB) komo parti di un inisiativa internashonal di interkambio kultural i deportivo.
E organisashon di Atlanta (www.atlmetrorbi.org) lo yega ku dos ekipo hubenil—U16 i U14—konsistiendo di 32 hóben i 8 coach, kompañá pa mayornan, famia i fanátikonan. Ademas, vários hungadó for di One League Aruba – RBI a wòrdu invitá dor di e organisashon di Atlanta pa reforsá nan ekiponan.
E weganan lo wòrdu hungá na Tio Daou Ballpark na Sta. Rosa. Riba djasabra, 17 di yanüari, e weganan ta programá pa 2:00 PM i 4:00 PM. Riba djadumingu, 18 di yanüari, lo tin ‘double header’ di 10:00 AM te 4:00 PM.
E staf tékniko di Kòrsou—Carlos Pineda, Ghionelo Jansen, Jeremy Lucas, Sherrently Da Costa Gomez i Jair Quant—a forma un selekshon fuerte di hungadónan lokal pa enfrentá e ekiponan bishitante. Federashon di beisbòl di Kòrsou (FEBEKO) i Curaçao Prospect League (CPL) ta sostené e inisiativa dor di proveé e unifòrmnan i e hungadónan pa e ekiponan di Kòrsou. E weganan aki tambe lo sirbi komo preparashon pa partisipashon di Kòrsou na e Juegos Suramericanos de la Juventud 2026, programá pa luna di aprel.
Miéntras beisbòl lo keda hungá e wikènt binidero, e biahe ta diseñá prinsipalmente komo un eksperensia di interkambio kultural. Hopi di e hóbennan di Atlanta lo ta biahando pa promé biaha pafó di Estádos Unidos. Ademas di wega i entrenamentu, e hungadónan lo tuma parti den aktividatnan kultural i turístiko ku ta mustra e herensia riku di e komunidat vibrante di Kòrsou.
Curaçao Baseball Development Foundation ta deseá tur e hóbennan un fin di siman eksitante di beisbòl i ta spera ku e hungadónan bishitante lo bai for di Kòrsou komo embahadornan di nos isla. Un danki spesial pa e Curaçao Tourism Board, FEBEKO i CPL pa nan kolaborashon balioso pa hasi e inisiativa aki posibel.