WILLEMSTAD — Victory Boys a bai ku tres punto ku e viktoria di 2-0 riba Jong Colombia den Kampionato FFK Prome Divishon 2025-2026. E resultado a bini ku un outogol na minüt 30 i un gol di E. Nurijanyan na minüt 54.
Inter Willemstad a saka un viktoria di 5-3 riba Centro Barber den un wega ku hopi gol. Pa Centro Barber, D. Chaverra a marka na minüt 26, un outogol a kai na minüt 40 i K. Vides a agrega un gol na minüt 43. Pa Inter Willemstad, D. Eekhoudt a habri e skor na minüt 22, J. Martina a marka dos bes (64 i 68), J. de Kaster a hinka otro na minüt 89 i A. Martus a sera e wega na 90+3.
Den otro partido, Scherpenheuvel i Jong Holland a termina 0-0.
Centro Dominguito a gana 3-2 di SUBT. Centro Dominguito su gòlnan a bini di R. Kierindongo (11), O. Altahona (13) i A. Barrios (35). SUBT a kontesta ku dos gòl di E. Cundumi na minüt 24 i 27.
Atletiko Salinja a bai ku e viktoria 2-1 riba UNDEBA. N. Angela a marka na minüt 20 i C. Martha a sigui na minüt 49, miéntras UNDEBA a hinka nan úniko gol dor di D. Willems na minüt 86.