MADRID – E atleta di Kòrsou, Brian Hooi, djasabra ei a logra bira kampion di peso lihé den Way Of Warriors FC (WOW FC), ora el a derotá e britániko Umkhan Ibragimov. Esaki den un pelea kargá ku akshon for di komienso te final. WOW FC ta un plataforma spañó di MMA, ku ta trahando pa yuda ekspandé e deporte na Spaña i sobrá di Oropa. Ta un plataforma ku alabes e gran Cristiano Ronaldo ta sosio di dje.
Ibragimov tabata faborito den e pelea, i huntu ku esaki a nòkout tur su rivalnan for di dia el a bira profeshonal. Ku otro palabra, Brian Hooi tabata e ‘underdog’ pa e pelea aki.
E promé dos ròntnan di e pelea, tabata un bon propaganda pa e deporte di MMA. Tabatin interkambio entre e dos bringadónan, kaminda ámbos tabata mustra hopi skèrpi.
Brian Hooi a mustra bon forsa i tabata mustra alternativa den su atake den e promé rònt.
Den di dos rònt Hooi a sufri dos ‘knockdown’ na man di Ibragimov. No opstante esaki e yu di Kòrsou a rekuperá for di esaki, i el a kontra ataká ku un rudia brutal riba Ibragimov.
Den e di tres rònt Brian Hooi a kastigá su rival fuertemente. Ibragimov a wanta e ola di sla di Hooi, i despues a lanta bai su skina riba su mes forsa. Lamentablemente ora el a yega su skina, el a bai for di dje i mester a keda interná den hospital.
Esaki a pone ku Brian Hooi a keda koroná komo kampion nobo di peso lihé den Way Of Warriors FC. E pelea entre Hooi i Ibragimov a risibí tambe e premio di pelea di e anochi.