WILLEMSTAD – Kenley Jansen den fin di siman último a firma pa un temporada ku Detroit Tigers, ku opshon na fabor dje ekipo pa un di dos aña. E ‘closer’ yu di Kòrsou, ku kuater aparishon den All-Star i un veterano di 16 temporada den MLB, a firma kontrakt di 11 mion dollar pa temporada 2026, ku opshon pa e ekipo tené pa 2027 pa un di dos temporada riba kaminda pa yega 500 wega salbá. E akuerdo ta pendiente su eksámen físiko, lokual ta algu normal serka tur pelotero.
Jansen tin 476 wega salbá den su karera, djis dos bou di Lee Smith ku ta figurá na di tres lugá riba e “MLB’s all-time leaderboard”. E tin por lo ménos 25 wega salbá den diestres temporada konsekutivo, ekskluyendo e temporada di pandemia (2020). E aña’ki el a finalisá ku 29 ‘saves’ resurgiendo ku Angels. Su ‘rate’ di 24.4 porsentahe di ponche tabata esun di mas abou den su karera, pero di otro un banda ku WHIP di 0.95 tabata esun di mihó for di 2017, tempu ku el a kompartí e liderazgo di Liga Nashonal ku 41 salbá i un di sinku lugá den votashon di Cy Young den e liga.
Temporada 2025 tabata esun den kua e yu di Kòrsou a konosé su dia di mas tumultoso den Angel Stadium riba 2 di mei, na momento ku el a tuma seis kareda den di nuebe inning, inkluso back-to-back honron di Riley Greene i Colth Keith i mas despues un honron mas. Pero ya su siguiente dia el a bin bèk i retirá tur dos na momento ku LA Angels tabata dilanti ku tres kareda, i asina salba e partido.
Kenley su di sinku ekipo den MLB ta unu ku den 2025 a funshoná di forma aseptabel sin un ‘closer’ fiho, ku e manager Hinch skohiendo pa usa su mihó relevistanan den situashonnan grandi sin importá e inning. Will Vest a liderá e ekipo ku 23 salbá, pero sinku otro picher tambe a salba wega, inkluso nuebe di Tommy Kahnle. Mas aleu e ekipo a logra un akuerdo pa trese Finnegan bèk den 2026 i awor agregando Jansen e ekipo tin un bullpen fuerte pa traha den di shete i ocho inning, lagando e di nuebe entrada pa e yu di Kòrsou.
Kenley Jansen a start su karera komo ‘closer’ ku Los Angeles Dodgers, sigui pa Atlanta Braves, Boston Red Sox, Los Angeles Angels i awor pa 2026 lo figurá den unifòrm di Detroit Tigers.