WILLEMSTAD — Federashon Futbòl Kòrsou ta reaktivá Komishon di Futbòl Femenino komo parti di su strategia pa sigui desaroyá, profeshonalisá i stimulá un kresementu sostenibel di futbòl femenino na Kòrsou.
E komishon lo konsistí di Hassnah Elhage, Jadira Laaf i Fabi Constansia. Huntu, nan lo dediká nan mes na e ehekushon di e strategia pa futbòl femenino, identifikashon di oportunidatnan pa desaroyo i fortalesementu di aliansanan na nivel nashonal i internashonal.
Ku e reaktivashon aki, FFK ke logra fortifiká e ehekushon di su metanan stratégiko, probechá oportunidatnan nobo pa desaroyo i sigui mehorá e posishon di futbòl femenino den e komunidat futbolístiko di Kòrsou.
E trabounan di e komishon lo enfoká riba diferente área stratégiko;
- Strategia i ehekushon: sostené e desaroyo i ehekushon di e strategia pa futbòl femenino, inkluyendo monitoreo di e progreso i resultado.
- Búskeda di fondo na nivel nashonal i internashonal: identifiká i probechá oportunidatnan di finansamentu via, entre otro; FIFA, CONCACAF, partnernan nashonal i otro organisashonnan relevante.
- Aktivashon komersial: desaroyá oportunidatnan komersial, aktividatnan di patrosinio i aliansanan stratégiko ku ta kontribuí na desaroyo sostenibel di futbòl femenino.
- Desaroyo di mucha i hende muhé: eksplorá oportunidatnan pa formashon, desaroyo di talento, interkambio di konosementu i koperashon internashonal, no solamente na Hulanda, sino tambe den Karibe, e region mas amplio i Merka.
- Visibilidat i kresementu: oumentá e visibilidat di futbòl femenino i stimulá mas mucha muhé i hende muhé pa partisipá den deporte di futbòl.
Invertí den desaroyo sostenibel
Un punto importante lo ta desaroyá proyektonan ku ta aliniá ku e metanan stratégiko di FFK i ku por kualifiká pa finansamentu nashonal i internashonal. Ademas, e federashon ke fortifiká koperashon ku instansianan di Gobièrnu, empresanan, organisashonnan futbolístiko i otro partnernan relevante.
Dor di kombiná desaroyo stratégiko ku inisiativanan komersial, koperashon internashonal i komunikashon dirigí, FFK ke krea oportunidatnan nobo pa sigui desaroyá futbòl femenino na Kòrsou.
E komishon lo kombertí su áreanan di trabou den proyekto i aktividatnan konkreto. Lo sigui e progreso i resultadonan pa sostené e ehekushon di e strategia pa huntu nos ta traha riba futuro di futbòl femenino
Ku e reaktivashon di Komisón di Futbòl Femenino, FFK ta reafirmá su ambishon pa fortifiká futbòl femenino, p’asina duna mas mucha i hende muhé e oportunidat pa partisipá aktivamente den deporte di futbòl.
FFK ta konsiderá e desaroyo di futbòl femenino komo un invershon importante den futuro di futbòl na Kòrsou, tantu riba tereno deportivo komo riba tereno sosial.