WILLEMSTAD — Fundashon Wilson, “Papa” Godett, djasabra awor den e kartelera di bòkseo amatùr na “Kanga Arena” ta duna rekonosementu e aña aki na Sr. Edmond Lodowica pa su mas di 53 añanan aktivo den e deporte di bòkseo. Lodowica a kuminsá komo bòksdó amatùr, pa despues bira rèfri di bòkseo. Fuera di rèfri, Edmond ta tambe supervisor di pelea.
…E la kuminsá den e deporte ku 14 Aña…
E la kuminsá train bòkseo ku 14 aña di edat, i a keda aktivo te ku 27 aña den ring komo bòksdó. E ta rekordá ku su promé stapnan den bòkseo tabata serka Sr. Eugene Dalnoot (dfm), konosí tambe komo Carmen Basillo den Sentro di Bario Buena Vista. E la nase den Buena Vista, i na edat di 5 aña e la bai biba den e bario di Kanga. Fuera di bòkseo, e la práktika futbòl i tambe vòlibòl. Un leshon na rudia a pone ku Edmond mester a bandoná deporte aktivo. Despues di a train serka Eugene Dalnoot (dfm), Edmond Lodowica a kontinuá su karera di bòkseo serka Sr. Pedro, “Shon Pé” Hooi (dfm) na e bario di Paradijs. “Nos tabata train 2 biaha pa dia, kore mainta promé kumi bai skol, i atardi bòkseo despues di skol. Despues di a train ku Sr. Pedro Hooi, Edmond a bai e bario di Kanga, i tabata train serka Vicente, “Blade” Piña (dfm).
…Semper Den Amatùr…
Semper e la bringa den amatùr. Bringando den amatùr, e la partisipá na vários kompetensia Internashonal prinsipalmente na Venezuela. E la bringa na e siudat di: Maracaibo, Caracas i tambe na Valencia den e popular “Bataya de Carabobo”.
…El a bringa 22 Pelea…
E rekòrt di Edmond komo bòksdó amatùr tabata di: 22 pelea bringá, 14 ganá, 2 empate i 6 derota. E ta rekordá ku tur su derotanan tabata pa desishon dividí. E la eksperensiá rivalnan manera: Rafael Flanders, Pedro Anzola, Kid Tigers di St. Maarten, Jorge Bazzan di Venezuela, Jorge Zuria tambe di Venezuela. Den selekshon di bòkseo su entrenadonan tabata: “Wincho” Zimmerman , Vicente Piña (dfm) i Sr. Erwin Berkemeyer.
…Kampeon Di Kòrsou…
Na aña 1980 Edmond Lodowica a bira kampeon di Kòrsou ganando di e bòksdó Saminero Nel Zimmerman. Edmond semper a kontribuí ku bòkseo, si no ta komo rèfri, ta komo asistente entrenadó o entrenadó. E ta bisa ku hopi mucha ta kuminsá ku e deporte di bòkseo, pero despues ta stòp.
…Kurso Di Rèfri i Entrenadó…
Pa duna un mihó aporte, Edmond a bai kursonan di rèfri i entrenadó. E la sigui kurso di arbitrahe na Colombia. Tambe e la haña kurso serka profesor di Trinidad i otro di Venezuela. Lodowica tambe tabatin eksperensia ku e eks rèfri di bòkseo profeshonal mundialmente konosí Mr. Richard Steele.
…Danki na Vicente Piña (dfm)…
E la start ku arbitrahe danki na Sr. Vicente Piña. Piña tabata traha na Fundashon Sedreko, i e la bai Instituto San Fernando kuné na Bándabou, dun’é algun instrukshon, i asina su karera komo rèfri di e deporte a start.
…Edmond 7 Aña Supervisor…
Aktualmente Edmond Lodowica ta Delegado Tékniko i ta supervisá pelea. E tin 7 aña ta hasi e trabou. El a ehersé e funshon na Kòrsou, i tambe el a yega di traha na St. Maarten. Tambe e la yega di dirigí pelea profeshonal, pero su spesialidat ta bòkseo amatùr.
…Semper Ela Yuda…
Edmond, o “Mond” semper a yuda. E ta kòrda ku e la train boksdonan huntu ku Sr. Jaime Phelipa (dfm), tambe e la train mucha serka Sr. “Ak” Rojer. E ta den gymnasio huntu ku Sr. Edwin Baas pa mas ku 20 aña. Tambe el a yega di asistí: Baba Quami, Michael Mercelina, Wendell Trinidad i otro boksdonan. Ainda pa mantené sumes den kondishon, i ta bai gymnasio 3 biaha pa siman.
…Tremendo Skohensia…
Sin duda tremendo e desishon di Fundashon Wilson, “Papa” Godett pa duna un rekonosementu bon meresí na un gran hòmber di bòkseo, Sr. Edmond Lodowica.
Skibi pa Taffy de Jongh