WILLEMSTAD — Federashon Futbòl Kòrsou i Maduro & Curiel’s Bank a logra implementá un inisiativa di sostenibilidat durante e partidonan ku a tuma lugá na Kòrsou, di nos selekshon nashonal, durante e CONCACAF Nations League kontra Nicaragua riba 27 di sèptèmber 2026 i Trinidad & Tobago riba promé di òktober 2026. Ku esaki, ámbos organisashon a tuma un paso konkreto den direkshon di e organisashon di partidonan di futbòl mas sostenibel na Kòrsou.
Parti di e proyekto piloto aki tabata e implementashon, tras di pantaya, di un programa di resiklahe enfoká riba kolekshon separá di material resiklabel ku a optené den stadion. Statera Earth tabata responsabel pa e ehèkushon di e programa, inkluyendo kolekshon, separashon i dokumentashon di e resultadonan.
Durante e dos partidoanan último, a kolektá un total di 417 kilo di material resiklabel:
- 195 kilo di plèstik
- 147 kilo di glas
- 75 kilo di aluminio
Ku un promedio di aproksimadamente 7485 bishitante pa partido i kasi 15.000 bishitante durante e dos partidonan di Nations League, un promedio di 27,8 gram di material resiklabel pa bishitante a keda for di sirkulashon promé ku e material aki terminá den sushi komun.
E promé paso ku por midi;
Pa FFK, e inisiativa aki ta marka e inisio di un ambishon mas amplio pa sostenibilidat den futbòl di Kòrsou. E proyekto piloto tabata deliberadamente limitá, pa por gana eksperensia, identifiká i mehorá proseso lográ i establesé e promé base ku resultado ku por wòrdu midí. E resultadonan ta ofresé un punto di salida konkreto pa sigui desaroyá inisiativanan pa futuro i pa haña un mihó bista riba e impakto di e partidonan di futbòl riba maneho di sushi.
Mundialmente, organisashonnan manera FIFA i UEFA ta dedikando kada bes mas atenshon na sostenibilidat, ekonomia sirkular i maneho responsabel di sushi durante eventonan deportivo. Ku e promé proyekto piloto aki, FFK ta uni su mes ku e desaroyonan aki i ta duna kontenido na su ambishon pa ta un organisashon di futbòl modèrno i komprometé ku komunidat.
“E kolaborashon aki ku MCB ta un promé paso importante pa FFK. E resultadonan ta mustra ku asta un proyekto piloto relativamente chikí por produsí un impakto ku por midi direktamente. Na mes momentu, nos ta mira esaki prinsipalmente komo un punto di salida. Nos ke integrá sostenibilidat gradualmente den nos partidonan i eventonan durante e añanan binidero.” Fabi Constansia, presidenta interino di FFK ta duna di konosé.
Na kaminda pa e siguiente fase
E eksperensianan optené, ta forma e base pa desaroyo di mas inisiativanan di sostenibilidat den futbòl di Kòrsou. FFK, MCB i Statera Earth ya ta den kòmbersashon tokante e siguiente pasonan den preparashon pa e partidonan di kuart final di CONCACAF Nations League na novèmber próksimo. Den e proseso aki, ta evaluá kon por amplia e inisiativanan di sostenibilidat i kon por envolví bishitantenan aktivamente den resiklahe i separashon di sushi den futuro.
Ku kasi 15.000 bishitante durante dos wega, e promé proyekto piloto aki a demostrá ku futbòl por ta un plataforma poderoso pa trese sostenibilidat na atenshon i logra resultadonan ku por keda midí.
FFK ta ekspresá su apresio na MCB pa hasi e inisiativa aki posibel i na Statera Earth pa e ehèkushon profesional di e programa di resiklahe. Ademas, FFK ta gradisí tur empleado, boluntario i partner envolví ku a kontribuí na e éksito di e promé edishon aki.
E promé paso pa partidonan di futbòl mas sostenibel na Kòrsou.