WILLEMSTAD — E ekipo di dama di SV Victory Boys a bira kampion invikto di FFK Kampionato Femenino 2025/2026. E ekipo di Santa Rosa a kaba e kampionato sin pèrdè ni un wega, i asina a gana e título nashonal.
Den e final, Victory Boys a gana ku 2-0. Kaylin Sprok a habri e skor, i Kadisha Martina a marka e di dos gol, ku a fiha e resultado final.E kampionato akí ta kuadra ku e rumbo ku Victory Boys a tuma den e último temporada pa futbòl femenino. Den esaki, e klup ta sostené e prinsipio ku e ekipo maskulino i esun femenino ta para igual den e organisashon di futbòl. E igualdat ei ta bira konkreto no solamente den palabra, pero ta wòrdu mira bèk tambe den e nivel di training, nivel di coach, akseso na fasilidatnan i oportunidat real pa krese den futbòl.
‘Her Story Matters’
Bou di e prinsipio ‘Her Story Matters’, Victory Boys ta trahando pa duna tur futbolista i hende muhé un lugá den e klup. Akinan, Victory Boys ta wak mas leu ku riba kancha so. Hungadónan ta haña e oportunidat di konosé otro funshon den mundu di futbòl, manera coach, maneho di ekipo, arbitrahe, direktiva, i funshon tékniko i organisatorio.
Hassnah Elhage, presidente di SV Victory Boys:
“Futbòl femenino a gana un lugá fiho den futbòl mundial. Na Kòrsou nos tambe tin hopi talento. Kombinando e talento ei ku bon guia, kolaborashon internashonal i e rumbo di Victory Boys, nos ke ofresé hungadónan oportunidat nobo. Na mes un momentu, komo klup nos ke sigui hunga un ròl importante den futbòl femenino na Kòrsou i den region.”
Mucha muhé U15 i U17
Pa fortalesé e kaminda di desaroyo den futbòl di mucha muhé, Victory Boys ta lansa dos ekipo nobo di mucha muhé: U15 i U17. Ku esaki e klup ta krea un kaminda kla for di futbòl hubenil te na e promé ekipo femenino, i pa e talentonan di mas altu, te na oportunidat di futbòl na eksterior.
Mucha muhé ku tin interes pa hunga futbòl na Victory Boys por tuma kontakto ku [email protected] pa mas informashon i pa plania proeftraining.
‘Pathway’ internashonal
Victory Boys ta usa su red internashonal di futbòl aktivamente pa duna hungadónan akseso na otro ambiente di futbòl i pathway profeshonal. Wega, torneo i kolaborashon internashonal ta duna hungadónan e oportunidat di midi nan mes ku otro nivel i di gana eksperensia internashonal.
Aktualmente Victory Boys ta den kombersashon tokante dos invitashon internashonal: partisipashon den un torneo na Spaña i un trayekto na Italia. Pronto e klup lo anunsiá mas detaye. Den e añanan ku ta bini, eksperensia i kolaborashon internashonal lo forma parti struktural di e programa di futbòl femenino.
E prinsipio ta keda: desaroyo promé ku promesa. Victory Boys ta invertí den formashon, guia i eksperensia internashonal, i ta usa su red pa habri porta pa hungadónan ku ta kla pa un siguiente paso.
Despues di e kampionato invensibel, Victory Boys ta preparando awor pa partisipá den Kopa Kòrsou, kaminda ambos e ekipo femenino i maskulino lo hasi e maksimo pa regresa Santa Rosa bèk ku e Kopa.