WILLEMSTAD — Federashon Futbòl Kòrsou a lansa ofisialmente e aña aki un programa nobo di mèntor pa entrenadónan lokal. Ku e programa aki, entrenadónan kualifiká di Kòrsou lo haña e oportunidat úniko pa forma parti di e staf tékniko di nos selekshon nashonal maskulino senior i haña eksperensia den un ambiente internashonal di deporte na nivel haltu.
E inisiativa ta forma parti di e strategia mas amplio di FFK pa fortalesé e kapasidat di e sektor futbòl lokal di forma duradero i pa garantisá ku transferensia di konosementu ta bira un proseso struktural den futbòl di Kòrsou.
E programa nashonal di mèntor pa entrenadónan lokal a wòrdu desaroyá pa integrá entrenadónan lokal kualifiká di forma struktural den e ambiente di rendimento haltu di nos selekshonnan nashonal. Dor di traha direktamente ku e staf tékniko internashonal, e partisipantenan ta haña eksperensia práktiko riba metodologianan di entrenamentu, preparashon táktiko, análisis di prestashon i e proseso di traha ku selekshonnan nashonal.
E promé entrenadó ku ta partisipá den e programa ta Gersinio Constansia. Komo un entrenadó ku hopi eksperensiá, el a traha ku diferente selekshonnan hubenil di Kòrsou, ku e tim Jong Colombia i anteriormente komo asistente-entrenadó di selekshon nashonal. Ademas, e tin eksperensia amplio den kompetensianan hubenil nashonal i internashonal, manera tambe den proseso di kualifikashon pa Mundial.
Komo promé partisipante den e programa nashonal di mèntor pa entrenadónan lokal, Gersinio Constansia lo wordu integrá den e staf tékniko di selekshon nashonal Senior durante e próksimo partidonan di Concacaf Nations League. Den e trayekto di desaroyo aki, el lo haña e oportunidat pa gana eksperensia ku preparashon pa weganan na e nivel regional mas haltu, kolaborashon ku hungadónan áktivo den eksterior, video i data análisis avansá i ku e operashon diario di un selekshon nashonal di nivel haltu.
Segun FFK, e programa ta kontribuí direktamente na e meta stratégiko pa fortalesé e kapasidat di e sektor futbòl lokal dor di invertí den edukashon i desaroyo di entrenadónan i otro profeshonalnan tékniko. E federashon ta mira desaroyo di konosementu komo un kondishon esensial pa subi e nivel di futbòl na Kòrsou i pa logra resultado duradero riba termino largu.
Fabi Constansia, presidente interino di FFK, ta splika:
“Den nos strategia, engrandesementu di e kapasidat den e sektor di futbòl na Kòrsou ta un prioridat sentral. E programa di mèntor aki ta duna forma na e ambishon aki dor di brinda entrenadónan lokal akseso na e nivelnan mas haltu di futbòl internashonal. Eventualmente nos ke konstruí un infrastruktura duradero di konosementu kaminda miembronan eksperensiá di staf internashonal i entrenadónan lokal ta kontribuí ku otro na e desaroyo kontinuo di futbòl na Kòrsou.”
FFK ta spera di por guia mas entrenadónan lokal den e programa aki durante e añanan binidero. E konosementu i eksperensianan optené lo wòrdu kompartí áktivamente ku e grupo di entrenadónan lokal despues di kada trayekto, p’asina e fruto di e programa benefisiá e desaroyo kontinuo di futbòl di Kòrsou.