WILLEMSTAD — Federashon Futbòl Kòrsou ta informá ku sr. Jan Peter Dogge a presentá su renunsia komo Sekretario-General. Su kontrato di trabou lo terminá dia 31 di òktober 2026.
Sr. Dogge a inisiá ku e funshon di Sekretario-General di FFK na luna di sèptèmber 2025. Durante su periodo komo Sekretario-General, el a kontribuí na desaroyo i profeshonalismo kontinuo di e federashon, tantu riba tereno operashonal, atministrativo komo organisatorio.
Presidente interino Fabi Constansia a deklará:
“Na nòmber di e direktiva di FFK, mi ke gradisí Jan Peter Dogge pa su dedikashon, kompromiso i kontribushon na nos organisashon. Nos ta hopi agradesí pa su trabou durante e último aña i nos ta dese’é hopi éksito den su próksimo reto profeshonal.”
Jan Peter Dogge a deklará:
“Tabata un privilegio pa por a forma parti di un periodo asina spesial pa FFK. Basá riba motibunan pèrsonal, mi a tuma e desishon pa bandoná FFK. Ku orguyo mi ta mira bèk riba e resultadonan ku nos a logra huntu, tantu riba tereno i tambe pafó di dje, huntu ku tur persona ku a kontribuí na esaki. Mi ta deseá tur persona den FFK hopi éksito ku e kontinuashon i ekspanshon di e desaroyo aki.”
Te na fin di su kontrato, Jan Peter Dogge lo sigui dediká su mes kompletamente na federashon.
E enfoke lo ta riba e traspaso di su responsabilidatnan, e kontinuashon di e trabounan aktual i e preparashon i ehekushon éksitoso di e ALV di FFK den ougùstùs 2026. Asina, kontinuidat di e organisashon ta keda garantisá i FFK lo sigui traha riba e desaroyo i profeshonalismo kontinuo di futbòl na Kòrsou.
Den un término kòrtiku lo kuminsá ku e prosedura pa nombra un Sekretario-General nobo.
E direktiva di FFK ya a tuma e medidanan nesesario pa garantisá kontinuidat kompletu di e trabounan di tur dia, e kompetensianan i e obligashonnan nashonal i internashonal di e federashon. Direktiva ta sigui enfoká sin trese kambio riba ehekushon di e metanan stratégiko, organisatorio i deportivo di e federashon.
FFK ta respetá privasidat di su empleadonan i p’esei lo no hasi mas komunikashon tokante asuntonan individual di su personal.