WILLEMSTAD — Federashon di Futbòl Kòrsou (FFK) ta trahando den kolaborashon estrecho ku Adidas i Voetbalshop.nl riba un unifòrm nobo tantu pa partidonan di futbòl na kas komo den eksterior di e ekipo nashonal di Kòrsou pa Mundial 2026. E introdukshon di e unifòrmnan nobo akí ta planiá pa tuma lugá medio luna di mei. Durante e siklo di weganan entre paisnan na luna di mart, e ekipo nashonal ainda lo hasi uzo di e unifòrmnan aktual.
FFK, Adidas i Voetbalshop.nl huntu ta trahando intensivamente riba unifòrmnan ku ta reflehá karakter, sentido di orguyo i e ambishon internashonal di e futbòl kurasoleño. Ounke e introdukshon di ámbos unifòrm lo ta na medio di luna di mei, lo presentá e unifòrm ku ta pa weganan afó na luna di mart, durante e evento internashonal di Adidas na Los Angeles.
E selekshon nashonal durante e siklo di weganan di mart lo sigui hasi uzo di e unifòrmnan aktual. E fókus durante e periodo akí lo ta riba prestashon deportivo, siendo patras di kòrtina ta trahando riba lansamentu na gran eskala di e unifòrmnan .
Segun Sam Handy, General Manager Adidas Football: “Torneonan grandi manera FIFA ku Mundial di Futbòl ta karakterisá komo susesonan úniko. E manera kon kosnan a kana ku Kòrsou ta un ehèmpel asina, unu ku debidamente ta reflehá e espíritu di wega. Nos ta orguyoso pa ta trahando huntu ku Federashon di Futbòl Kòrsou, netamente na un momentu asina importante den nan desaroyo. Ku sumo plaser nos ta traha huntu ku bòntnan ku tin ambishon i konvikshon, komo tal nos ta sigui padilanti ku anhelo pa sostené Kòrsou ku kontinuashon di su biahe.”
Presidente di FFK señor Gilbert Martina a enfatisá kon importante koperashon ta: “E unifòrmnan akí ta muchu mas ku trahenan pa hasi deporte. Nan ta para pa desaroyo di Kòrsou su futbòl i nos lugá riba plataforma mundial. E kolaborashon ku Adidas i Voetbalshop.nl ta hasi posibel pa nos demostrá nos identidat na mundu hinter.”
Despues di e presentashon na mart e unifòrmnan pa weganan di selekshon pafó por keda ordena esklusivamente i adelantá serka Voetbalshop.nl. E pedidonan lo wòrdu entregá medio mei, na kua okashon fanátikonan ku a bestèl adelantá lo haña preferensia. Na mei FFK, Adidas i Voetbalshop.nl lo hasi presentashon ofisial di e unifòrmanan nobo.