WILLEMSTAD — Federashon Futbòl Kòrsou (FFK) a nombra señor Lesley Fer komo parttime FIFA Forward Program Manager. Ku e nombramentu akí, FFK a sigui fortalesé e ehekushon profeshonal, transparante i sostenibel di proyektonan den FIFA Forward Program i ta tuma otro paso importante den profeshonalisashon di e organisashon i desaroyo struktural di futbòl na Kòrsou.
E funshon di FIFA Forward Program Manager ta rekerí un nivel haltu di profesionalismo, integridat i konosementu den maneho. E Program Manager ta responsabel pa desaroyo, implementashon, koordinashon i observashon di tur proyekto finansiá via FIFA Forward Program. Transparensia, kumplimentu ku FIFA Financial Governance Framework, maneho di riesgo ku koutela, disiplina presupuestario i desaroyo duradero di futbòl ta fundamental.
Ademas, e Program Manager ta sirbi komo punto di kontakto prinsipal na FIFA i ta responsabel pa rapòrt tèkniko i finansiero relashoná ku progreso di tur proyekto. E ròl akí ta eksiguí kompetensia fuerte den ‘projectmanagement’, ’stakeholdermanagement’, ‘compliance’ i kòntròl interno, segun e standart internashonal di maneho.
Lesley Fer ta aportá ku un perfil nashonal i internashonal amplio. Den su funshon aktual komo Direktòr Risk Management & Disaster Policy na Ministerio di Asuntu Generál i Relashonnan Eksterior el a gana hopi eksperensia den kreá i manehá programanan kompleho i multidisiplinario.
Komo Koordinadó Nashonal di Krísis di Kòrsou, el a hunga un ròl klave den maneho di krísis nashonal durante e pandemia di COVID-19. El a koordiná programa di gran embergadura ku presupuestonan supstansial i a representá Kòrsou den diferente grupo internashonal.
Señor Lesley Fer su ekspertisio den duna guia i manehá, lei i reglanan, atendé maneho di riesgo, trayekto di sertifikashon internashonal i koperashon intergubernamental ta kuadra perfektamente ku e eksigensianan di e FIFA Forward Program.
Fer tin tambe un eksperensia akadémiko i profesional amplio den maneho empresarial, ‘projectmanagement’ (PRINCE2), ‘crisismanagement’ i auditoria.
Su estilo di liderato ta karakterisá pa integridat, responsabilidat, enfokando riba resultado i kapasidat pa integrá maneho, finansa i ehekushon di proyekto di manera efektivo. Ku e nombramentu akí, FFK ta aksentuá su meta pa alsa e nivel di maneho, disiplina finansiero i ehekushon di proyekto mas haltu.
Federashon ta konvensí ku konosementu, eksperensia i aktitut di Lesley Fer lo yuda den kresementu struktural i kontinuo di futbòl na Kòrsou.