WILLEMSTAD — Dick Advocaat a stòp di inmediato komo Direktor Tékniko di nos selekshon nashonal di futbòl. E entrenadó di Den Haag a logra sorprendé hopi hende, dor di e klasifikashon pa e próksimo Kampeonato Mundial na Merka. Advocaat, di 78 aña di edat, ke duna su atenshon kompleto na su yu muhé ku ta enfrentando problema di salú. Fred Rutten (63) ta bira su susesor.
“Semper mi a bisa ku famia ta bai promé ku futbòl,” asina Advocaat a deklará. “P’esei esaki ta un desishon natural. Pero esaki no ta kita ku mi ta stima Kòrsou, su pueblo i miembronan di nos ekipo hopi. Mi ta konsiderá e kualifikashon di e pais mas chikí den FIFA pa Mundial komo un di e puntonan haltu di mi karera. Mi ta orguyoso di mi hungadónan, staf i miembronan di direktiva ku a kere den nos,” asina Dick Advocaat a suprayá.
Segun e desishon di Advocaat, su asistente i hòmber di konfiansa Cor Pot tambe a disidí di stòp. Dòkter di e tim, Casper van Eijck, tambe ta stòp pa por asistí famia Advocaat den e periodo akí na Hulanda.
Gilbert Martina, presidente di FFK, Federashon di Futbòl di Kòrsou, tabata profundamente konmoví na momento ku Dick Advocaat a partisipá su desishon. “Nos por solamente respetá su desishon. Dick a skibi historia ku nos selekshon nashonal. Kòrsou lo keda eternamente gradesido na dje.” Advocaat a kuminsá na fin di 2024 ku Tim Kòrsou, e Blue Wave i promé a klasifiká pa e prestigioso Gold Cup 2025 na Merka i despues pa Mundial. Despues di e klasifikashon ei, Kòrsou a selebrá durante vários dia.
Advocaat lo no ta presente na e partidonan amistoso na mart kontra Australia i China, ni tampoko na final di mei kontra Escosia, tampoko durante e partido di despedida na Kòrsou riba 6 di yüni. FFK ainda ta den kòmbersashon ku diferente pais di Concacaf i Conmebol komo posibel oponente pa e partido di despedida na kas.
Fred Rutten ta bira susesor di Dick Advocaat. Señor Rutten, kende a traha komo entrenadó na Hulanda pa entre otro FC Twente, PSV i Feyenoord, a anunsiá mesora su disposishon pa tuma e puesto asina ku el a tende ku Advocaat ta stòp: “Dick ta un íkono den mundu di futbòl. Ta realmente un honor pa kontinua ku su trabou. Mi a papia ku Dick i su staf i lo mi sigui den su liña. Ta tristu pa Dick, pero Kòrsou por konta riba e mesun kompromiso di mi parti.”
Gilbert Martina, presidente di FFK, ta kontentu ku yegada di Rutten: “Den e sirkunstansia aktual, esaki ta un solushon rápido i bon. Dick mes a pasa e batuta na Fred. Pronto Fred Rutten lo hasi su staf konosí.”