WILLEMSTAD — Despues di algun luna sin futbòl femenino, djadumingu 22 di febrüari 2026, Kampionato Femenino 2025-2026 ta inisiá den Stadion Dr. Antoine Maduro.
E aña aki Kampionato Femenino ta konta ku un total di 8 klup ku tin 13 tim ku lo partisipá den kategorianan U-15, U-17 i Senior, kontra otro na diferente tereno rònt Kòrsou.
E ekiponan aki ta lo siguiente;
Senior;
- Atletiko Saliña
- Centro Juve
- Undeba
- Victory Boys
- Hubentut Fortuna
- Excellence School
U-17;
- Atletiko Saliña
- Centro Juve
- Undeba
U-15;
- Atletiko Saliña
- Centro Juve
- C-Stars United
- FC Sithoc
Skema pa apertura femenino;
| Stadion | Fecha | Kategoria | Orario | Tim di Kas | Bishitante |
|---|---|---|---|---|---|
| Dr. Antoine Maduro | 22-2-2026 | Senior | 15:45 | Atletiko Saliña | Centro Juve |
E inisio di e kampionato aki lo konta ku palabranan di e presidente di FFK i un miembro di direktiva na komienso di e partidonan den Stadion Dr. Antoine Maduro pa despues bala kuminsá lora.
Tur e weganan lo ta grátis ku eksepshon di e partido inougural debí ku e lo ta un ‘voorwedstrijd’ di Kampionato FFK Promé Divishon. Pues pa e partido aki so entrada lo kosta solamente cg.6,- pa adulto miéntras mucha di 6 pa 12 aña i 60+ ta paga solamente cg. 3,-.
Karchinan ta optenibel na lokèt di stadion un ora promé ku e partido inisiá.
Manera tur aña Komishon Femenino ta spera ku e kampionato aki tambe lo ta unu éksitoso, deportivo ku e meta pa desaroyá kada hungadó den nan abilidatnan futbolístiko i hasi futbòl femenino mas atraktivo p’asina yuda engrandesé futbòl femenino aki na Kòrsou.
Komishon Femenino ta deseá tur ekipo, e hungadónan, nan entrenadónan, dirigentenan i nos kuerpo di arbitrahe, hopi éksito durante Kampionato Femenino 25-26!
Un invitashon ta bai pa pueblo di Kòrsou kompletu pa bin apoyá i sostené nos damanan. Bin ku henter bo famia i disfrutá di algun tremendo partido di futbòl i mira kon nos damanan lo mustra kiko tur nan tin aden.