WILLEMSTAD – Curaçao Beverage Bottling Company, mihó konosí komo Coca-Cola Curaçao, a lansa su kampaña ofisialmente “Skor ku Coca-Cola” pa FIFA Kopa Mundial 2026. Ku esaki, a kuminsá un promoshon di futbòl na nivel lokal den un momentu históriko pa futbòl di Kòrsou.
Komo un marka ku tin mas ku sinku dékada di konekshon ku futbòl i ku FIFA, Coca-Cola ta partisipá den e trayekto aki na Kòrsou i Boneiru via un kampaña pa konsumidó, enfokando riba partisipashon i eksperensia kolektivo.
Struktura di e Kampaña
E Kampaña “Skor ku Coca-Cola” ta diseñá pa ta fásil i aksesibel pa tur hende. Konsumidó por partisipá dor di manda e kódigo úniko, ku por haña bou di e tapa di e produktonan partisipante di Coca-Cola.
Premio grandi i Struktura di Sorteo
Pa selebrá e echo ku Kòrsou ta rumbo pa FIFA Kopa Mundial 2026, e kampaña tin tres momentu grandi di sorteo. Kada sorteo ta inkluí un premio grandi: dos pasashi pa un wega di FIFA Kopa Mundial 2026, kaminda Kòrsou ta hunga kontra Alemania na Houston, USA, inkluyendo un pakete kompletu di biahe i akomodashon. Balor total di kada pakete ta USD 13,500.00. Adishonalmente tin 3 rifa, ku ta inkluí tres karchi di VISA Money Card na balor di XCG 1,000.00 kada un i tres televishon. E sorteonan pa bai Kopa Mundial lo tuma lugá riba: 31 di mart, 15 di aprel i 30 di aprel. E otro rifa lo bai tuma lugá riba 30 di mèi, 30 di yüni i 15 di yüli.
Mas ku 55.000 Premio Instantáneo
Aparte di premio grandi, e kampaña tin mas ku 55.000 premio insantáneo. Coca-Cola lo distribuí mas ku 22.000 premio insantáneo, inkluyendo bala di futbòl, tas di deporte, kùp re-usabel, “drawstring bags” i refresko grátis. Partner di kampaña McDonald’s lo duna 33.000 premio adishonal, inkluyendo batata, refresko i ‘cheeseburger’ grátis.
Kon por Partisipá
Por haña e kódigo bou di tapa di e produktonan partisipante di Coca-Cola, lokalmente produsí. Esakinan ta: Coca-Cola, Coca-Cola Zero Sugar, Sprite, Sprite Zero Sugar, Criollita i Fria den bòternan selektá di 12oz, 20oz, 1L i 2L. Después di registrashon, partisipantenan por manda nan kódigo via WhatsApp na: +5999 5603311. Kada kódigo ta konta komo un entrada pa un di e sorteonan, ku oportunidat pa gana un di 55.000 premionan insantáneo. Partisipashon ta habrí pa konsumidónan di 18 aña di edat bai ariba.
Partnernan Lokal
E kampaña ta sostení pa partnernan lokal, inkluso McDonald’s i Sambil Shopping Center, ku lo sirbi komo e sentro ofisial pa kollekta premio i tambe host “viewing parties” durante e periodo di e kampaña.
Lansamentu Ofisial den Sambil Shopping Center
A lansa e kampaña ofisialmente durante e konferensia pa prensa na e sentro di kolekta premio di Coca-Cola den Sambil Shopping Center. Durante e evento, miembronan di prensa a haña informashon tokante e mekanismo di e kampaña i e premionan instantáneo, ku a keda presentá pa promé biaha. E premionan a wòrdu presentá dor di e futbolistanan di ekipo Excellence, pa enfatisá e importansia di futbòl femenino na Kòrsou.
“Futbòl tin e poder úniko pa uni hende di diferente generashon i komunidat,” Myrthe George-Verhulst, Marketing i PACS Manager di Coca-Cola Curaçao, a indiká. “Ku Kòrsou rumbo pa FIFA Kopa Mundial 2026 pa promé biaha den historia, e kampaña akí ta marka un momentu di gran importansia pa nos futbolistanan, fanátikonan, i komunidat di Kòrsou, aki i den eksterior.”
Partner di kampaña McDonald’s a enfastisá e balor di su kolaborashon largu ku Coca-Cola. “Nos partnership ku Coca-Cola tin hopi aña i ta basá riba balornan komun tokante konekshon, goso i eksperiensia,” segun Sra Jennifer Poulina, Operations Director di McDonald’s. “Partisipashon den e kampaña akí ta un kontinuashon natural di e relashon.”
Sr. Ludwig Alberto, miembro di direktiva di Federashon Futbòl Kòrsou a enfatisá e importansia di partnership riba término largu den futbòl profeshonal. “Futbòl profeshonal no por eksistí sin partnernan fuerte,” segun e federashon. “Coca-Cola ta konektá ku futbòl pa dékadanan, i e kompromiso duradero akí ta kontribuí den sostené e deporte lokalmente i internashonalmente.”
Komo lokalidat anfitrion, Sambil a enfatisá riba su ròl komo un punto di enkuentro riba nos isla. “Sambil ta un lugá kaminda hende ta bin huntu tur dia,” segun e representante. “Pa ta anfitrion di e lansamentu ofisial i e sentro di kolektá premio, ta reflehá e konekshon fuerte entre Coca-Cola, nos bishitantenan i komunidat di Kòrsou.”, segun Sra. Xandra van Hutten di Sambil.
Donashon
Komo sopresa, Coca-Cola a regalá Federashon Futbòl Kòrsou (FFK) 100 bala di futbòl, komo parti di su kompromiso pa apoyá deporte i nos komunidat. E regalo aki ta bai pa miembronan di FFK, ku e meta pa duna tur futbolista na Kòrsou mas chèns pa hunga, entrená i disfrutá di e wega faborito rònt di isla, inspirando moveshon i mas pashon pa futbòl lokal.
Mas informashon tokante e promoshon ta disponibel via e kanalanan di medio sosial di Coca-Cola Curaçao i Boneiru (Facebook.com/CocaColaCuracaoBonaire) i riba www.cocacola.cw.