WILLEMSTAD (DA) — Segun Federashon di Futbòl Kòrsou (FFK), durante último dianan FIFA a informá tur esnan ku atraves di e portal di FIFA a demostrá interes i a reservá karchinan di entrada pa Mundial 2026, riba kon asignashon di e karchinan di entrada lo tuma lugá. Pa e motibu aki FFK ta risibiendo hopi pregunta di interesadonan ku no a logra optené un entrada via di FIFA.
FFK ke duna mas klaridat riba e situashon aktual, e proseso atministrativo via Curaçao United i e siguiente fasenan di benta.
E finalisashon di e proseso atministrativo di e reservashonnan di karchinan via di e ‘website’ di FFK, Curaçao United ta siguiendo su kurso ainda. Tan pronto ku e proseso akí ta kla i bira konosí kuantu ta e karchinan disponibel pa e weganan kontra Alemania, Ecuador i Kosta di Marfil, FFK lo komuniká esaki ofisialmente. E karchinan di entrada ku sobra lo keda poné disponibel via e portal Curaçao United.
FFK ta pidi tur interesadonan ku ya a reservá via Curaçao United, pero ku no a paga ainda, pa hasi e pago ku urgensia i mas pronto posibel. Si no risibí e pago na tempu, e registrashon lo keda anulá outomátikamente.
Ku finalisashon di e fase akí di ‘Group Sales’, kaminda FFK segun e asina yamá ‘Ticket Allocation Group (TAG) a pone karchinan di entrada disponibel via Curaçao United; FIFA lo habri un solo fase di benta di e entradanan akí, saliendo for di e aserkamentu mundial. E último fase di benta ta planiá pa kuminsamentu den luna di aprel 2026.
FFK ta sigui informá fanátikonan, hasiendo uso di e kanalnan di komunikashon ofisial, riba e último desaroyonan.