WILLEMSTAD — Siman pasá e di 41 Kongreso di CONCACAF a tuma lugá na Managua, Nicaragua. Durante e kongreso akí, e agènda a inkluí e presupuesto di CONCACAF pa aña 2026 i un evaluashon profundo di e aktividatnan i desaroyonan di último aña. Kòrsou a hala atenshon durante e kongreso, tantu durante e reunionnan ofisial komo serka medionan di prensa internashonal ku tabata presente.
Federashon Futbòl Kòrsou a keda representá pa presidente Gilbert Martina i sekretario-general Jan Peter Dogge. Den su diskurso, e presidente di CONCACAF, señor Victor Montagliani, di un forma masha elokuente a mustra apresio pa e logronan históriko di Kòrsou durante e kualifikashon pa Mundial 2026. El a suprayá tantu e progreso deportivo komo e kresementu organisatorio di e futbòl kurasoleño durante e último añanan.
E progreso i adelanto positivo no a pasa bai sin kapta atenshon di medionan di prensa internashonal. Periodistanan a mustra hopi interes pa e desaroyo di e futbòl na Kòrsou i den e prestashonnan i konstelashon di nos selekshon nashonal.
Ademas, FFK a tene kòmbersashon ku Camara David, kende ta sekretario-general di Caribbean Football Union (CFU). Den e kòmbersashonnan akí, énfasis tabata riba e desaroyo i e implementashon di e sistema di lisensia pa klupnan kurasoleño. E sistema aki tin komo meta e profeshonalisashon di e klupnan lokal di futbòl den aspektonan finansiero, atministrativo, organisatorio, deportivo, infrastruktural i hurídiko, ku komo meta final un desaroyo sostenibel na nivel lokal i regional.
Durante e kongreso a tuma lugá tambe e Presidents Cup, na kua e presidentenan di e federashonnan di futbòl nashonal a partisipá. Presidente di FFK, sr. Gilbert Martina, a yega na e final di e torneo huntu ku presidente di FIFA, sr. Gianni Infantino. E duo akí a pèrdè durante e partido final ku un skor mínimo kontra e kontrinkante, ku a gana ku skor di 1-0.