WILLEMSTAD (DA) — Kòrsou su selekshon femenino kategoria U-17 a finalisa su di tres i último partido di e prome buelta di e 2026 CONCACAF Women’s Under-17 Qualifiers ku un viktoria di 4-2 riba Barbados den Stadion Rignaal ‘Jean’ Francisca.
E wega a kuminsá ku un gol tempran di Kòrsou ora ku na di 11 minüt e defensa Elisa Huizing a saka un disparo for di afó di e área penal pa pone Kòrsou dilanti 1-0.
Barbados a iguala na 14 minüt ora ku Gabrielle Birmingham a anota riba un tiru liber. Den tempu ekstra di promé mitar, Birmingham a pone Barbados dilanti 2-1 ku un pinalti na minüt 45+3.
E di dos mitar di e partido a bai sin gol te na e último 10 minütnan, ora ku Kòrsou a bin fuerte. E delantero Jairvienis Martina a iguala e partido na 2-2 na di 80 minüt, i despues Destiny Koko a pone Kòrsou dilanti 3-2 na minüt 89 ku un kabesaso.
Den tempu ekstra Kòrsou a risibí un penalti na minüt 90+2, i Koko a konvert’é pa sera e markado na 4-2.
Ku e viktoria aki, Kòrsou a termina di dos den Grupo F ku 4 punto (1 victoria, 1 empate, 1 derota), ku 6 gol a fabor i 6 gol kontra, pa un diferensia di gol di 0. Trinidad & Tobago a keda ku e mesun kantidat di punto (4), pero ku diferensia di gol -1, loke ta pone Kòrsou riba Trinidad riba e table di posishon lidera pa El Salvador ku 9 punto.
Ku e resultado aki e ekipo di Korsou no ta logra pasa pa e Concacaf Women’s Under-17 Qualifiers Final Round.