WILLEMSTAD — E ekiponan di Kòrsou, forma pa selekshonnan Junior i Senior di Curaçao Prospect League (CPL) a gana e seri di weganan ku a keda hunga kontra e teamnan di Metro Leadership Sports Academy for di Atlanta, Georgia. E weganan a keda hungá wikènt último na Tio Daou Ballpark i a konta ku un bon asistensia di públiko lokal. E bishita a wòrdu organisá pa Curaçao Baseball Development Foundation (CBDF) den kolaborashon ku Curaçao Tourism Board (CTB) komo parti di un inisiativa internashonal di interkambio kultural i deportivo.
Ta di dos bes ku e organisashon di Atlanta (www.atlmetrorbi.org) a bini Kòrsou pa hunga weganan di beisbòl i tambe pa e hóbennan di e organisashon sera konosí ku e kultura di nos isla. Pa mayoria di e hóbennan aki esaki tabata nan promé biahe for di nan pais. Ámbos ekipo di Atlanta a keda reforsá tambe pa algun hungadó i coach di One League Aruba – RBI.
Riba e promé dia di kompetensia tantu e hungadónan di Atlanta, Aruba i Kòrsou por a disfrutá di un bishita spesial, den e kaso aki di e eks shòrtstòp di Atlanta Braves Andrelton Simmons. Simmons a papia di su eksperensia den Liga Grandi i kon dediká bo mester ta pa logra bo metanan den tur kos ku bo ke hasi den bida. Simmons a habri e torneo simbólikamente dor di hasi e ‘first pitch’.
E ekipo Junior di Kòrsou a gana su promé wega 6-3 i esun Senior a gana ku skor un poko mas pèrta 4-3 riba djasabra. Riba e dos dia di kompetensia Kòrsou Junior a sali gana 10-3 pero Senior a pèrdè ku skor di 8-1. Den e wega aki Jay-Dlynn Wiel di Kòrsou a dal un homerun deskomunal pa left. Den e di dos wega di e ‘double header’ e ekipo Junior di Kòrsou a gana ku skor grandi di 11-3 i e ekipo Senior di Kòrsou a bini bek i gana ku skor pèrta un bes mas di 3-2 pa asina sigurá ku Kòrsou a gana e seri kontra Atlanta.
E organisashon di Atlanta a gosa di nan breve estadia riba nos isla i por a sera konosí un tiki ku nos kultura i hendenan dor di e interkambio. Curaçao Tourist Board tabata un partner balioso den e proyekto aki i a sòru pa, entre otro, e hóbennan por a dal un paseo den ‘paranda bus’ den sentro di nos siudat i tambe por a bai landa den nos awanan kristalino promé ku nan a bula bai bek Atlanta.
Curaçao Baseball Development Foundation ta gradisí Curaçao Tourism Board, FEBEKO i CPL pa nan kolaborashon pa por a hasi e interkambio aki eksitoso.