WILLEMSTAD (DA) — Selekshon femenino U-17 di Kòrsou lo ta den akshon awe 24 di yanüari te ku 2 di febrüari ora ku nan ta kompetí den e 2026 CONCACAF Women’s Under-17 Qualifiers, ku tur e partidonan den Stadion Rignaal “Jean” Francisca.
Segun Federashon Futbòl Kòrsou (FFK), Kòrsou lo habri e torneo djasabra, 24 di yanüari 2026, kontra Trinidad & Tobago pa 7:00 di anochi. E wega aki ta promé paso den e kampaña di kualifikashon pa e selekshon.
E di dos partido ta djabièrnè, 30 di yanüari, ora Kòrsou topa El Salvador, atrobe ku un orario di 7:00 di anochi na mesun stadion.
E fase di grupo pa Kòrsou lo sera djadumingu, 1 di febrüari, ku e partido kontra Barbados, tambe na 7:00 di anochi.
| Fecha | Ora | Partido | Stadion |
|---|---|---|---|
| 24 di yanüari 2026 | 19:00 | Trinidad & Tobago vs Kòrsou | Stadion Rignaal “Jean” Francisca |
| 30 di yanüari 2026 | 19:00 | Kòrsou vs El Salvador | Stadion Rignaal “Jean” Francisca |
| 1 di febrüari 2026 | 19:00 | Kòrsou vs Barbados | Stadion Rignaal “Jean” Francisca |
FFK a indiká ku e selekshon ta konsistí di un grupo di 14 hungadó lokal ku a pasa varios luna di preparashon, huntu ku refuersonan di eksterior ku a yega Kòrsou pa fortalesé e grupo pa e torneo.
Preparashonnan, segun e federashon, ta sigui den bon kaminda i tur kos ta kla pa e torneo.
FFK ta enfatisa ku tur e partidonan ta grátis i ta invita pueblo di Kòrsou pa bin mira e damanan U-17 den akshon durante e torneo.