WILLEMSTAD — Nos a drenta e siman kaminda nos selekshon femenino kategoria U-17 lo ta den akshon di 24 di yanüari pa 2 di febrüari kompitiendo durante e partidonan di e 2026 CONCACAF Women’s Under-17 Qualifiers. Nos selekshon ta konsistí di un grupo di 14 hungadó lokal ku tin vários luna den preparashon i tambe 6 hungadó residensiá den eksterior ku a bin reforsá nos selekshon.
Nos 6 refuersonan a pisa suela di Kòrsou pa kontinuá ku e preparashonnan pa nos próksimo partidonan. Ta trata aki di Khloe Maduro Dorada ku ta militá den FC Cantera de Heroes Quindio, Jairvienis Martina ku ta den VCS, Xiarleahmay Martis Nocento di Atletico Club Amsterdam, Jacelynn Jubithana ku ta hungadó di Sparta AV, Shaë-Lyandra Gijsbertha miembro di FC Maense i Destiny Koko ku ta militá den De Graafschap. 6 hungadó ku sigur lo duna un man pa fortalesé nos selekshon durante e torneo aki.
Preparashonnan ta kontinuá den gran forma pa nos selekshon femenino kategoria U-17 duna tur ku tin durante nos partidonan di kualifikashon pa e 2026 CONCACAF Women’s Under-17 Qualifiers ku ta inisiá 24 di yanüari den Stadion Rignaal ‘Jean’ Francisca.
Nos selekshon lo topa Trinidad & Tobago, djasabra awor pa 7’or di anochi durante nos promé partido di e torneo aki.
Pueblo di Kòrsou kompletu ta keda kordialmente invitá pa bin disfrutá di algun tremendo partido i mira nos damanan den akshon, kòrda ku tur partido ta grátis.