ANTWERPEN (DA) — Polis di Antwerpen a bisa ku un patruya di nan tim di asistensia di droga a arestá un homber di 27 aña despues ku polis di e distrikto di Deurne a gara e homber ta bende kokaína, i mas despues a rekuperá mas di 5,000 euro cash durante un inval.
Segun polis, riba 10 di yanüari nan a mira un homber ta kana den Deurne manera ku e ta buska algu. Dado momentu e homber a subi i baha for di un outo. Un tiki despues, polis a para e vehíkulo i a determiná ku e shòfur a kumpra kokaína di e homber ku a subi den e outo algun rtau prome.
Polis a e ora ey a bai kontrolá e supuesto bendedó i a haña 23 gram kokaína i 150 euro riba dje. A base di e deskubrimentu aki, polis a hasi dos inval, i durante un di nan, polis a bisa ku nan a haña mas ku 5,000 euro cash.
E sospechoso a wordu arestá i a keda presentá dilanti di un wes-komisario.
Polis di Antwerpen no a identifiká e homber den nan deklarashonnan. Pero segun informashon ku Deporte Awe a risibi, ta trata di Nigel Robertha, un eks-futbolista profeshonal ku a hunga komo delantero i ku a hasi su debút ofishal den Eredivisie ku e ekipo di Feyenoord riba 1 di mei 2016, ora el a drenta komo suplente den wega kontra Willem II.
Robertha a forma parti di diferente selekshon hubenil hulandes i e tabata miembro di e ekipo di Feyenoord ku a gana e titulo di liga den temporada 2016–17. Despues di e temporada ei, ela bai Cambuur, i despues ela uni ku Levski Sofia na 2019.
Na mart 2021, ela firma ku D.C. United pa un termino te ku 2023, ku opshon pa un temporada adishonal. Su karera tambe a inkluí periodonan kortiku ku Kalba SC na Emiratonan Arabe, AEL Limassol na Chipre, i Spartak Subotica na Serbia.
Robertha den pasado e keda konsidera pa e selekshon nashonal di Kòrsou i tabata riba lista di algun pre-selekshon pero nunka e no a wordu inklui riba e lista definitivo.