WILLEMSTAD — Fanátikonan di e selekshon nashonal di Kòrsou awor por kumpra karchi di entrada pa e partidonan di Kòrsou den e promé di fase di Kampionato Mundial di FIFA i tur demas partido tambe via di Federashon di Futbòl Kòrsou.
E posibilidat di kompra di entrada aki a surgi despues ku FIFA a habri e asina yamá Ticket Allocation Groups (TAGS) pa fanátikonan di e selekshonnan nashonal ku ta partisipá. FFK di mes tambe ta parti di e fasilidat aki.
E bentaha pa kumpra karchi via TAG i portal di FFK ta lo siguiente; e preis di karchi ta fiho, bo ta sinta entre fanátikonan di Kòrsou i e chèns ta mas grandi pa bo haña karchi ku via e portal general pasó e kantidat di 5 mil karchi promedio pa wega ta garantisá pa fanátikonan di Kòrsou.
Personanan interesá por registrá te ku 18 di yanüari próksimo riba www.curacao-united.com (tambe aksesibel via e link riba FFK.CW). Via e portal online aki por selekshoná fásilmente kua partido(nan) den e promé fase bo ke asistí i kua tipo di asiento bo ke kumpra. Pa kada registrashon por pidí un máksimo di dies (10) entrada.
Despues di aseptá e kondishonnan general, e petishon mester konfirmá definitivamente dor di klik riba “place order”. Tuma nota: registrashon no ta garantisá asignashon di karchi di entrada.
FIFA lo informá FFK entre 18 i 22 di yanüari tokante kua petishonnan a wòrdu aprobá. Si un petishon ta honrá, e solisitante tin te promé di febrüari tempu pa paga. Si e pago no wòrdu hasí na tempu, e derecho riba e karchinan di entrada asigná lo keda kanselá i otro persona ku a registrá lo haña e oportunidat pa kumpra e karchinan ku a bin liber.