WILLEMSTAD — Curaçao Baseball Week (CBW) 2026 a wordu lansa ofisialmente awe durante un rueda di prensa na Courtyard by Marriott Curaçao. E apertura a wordu hasi pa Hensley Meulens, huntu ku e tim organisatorio, profeshonalnan den beisbòl, spònsernan i representantenan di prensa lokal i internashonal.
Curaçao Baseball Week ta un inisiativa anual ku ta fokus riba desaroyo di beisbòl na e isla, ku atenshon spesial pa peloteronan, coachnan i umpirenan, i ku un fuerte impakto komunidario. E edishon di 2026 ta pone un énfasis spesial riba hende muhénan den beisbòl i riba invertí den e siguiente generashon di peloteronan.
Komunidat internashonal di beisbòl na Kòrsou
Tur peloteronan i coachnan internashonal a yega na Kòrsou. Nan ospedaje ta wordu kuidad pa Courtyard by Marriott Curaçao, Curaçao Marriott Beach Resort i Corendon. Curaçao Baseball Week no solamente ta promové desaroyo di beisbòl, pero ta pone Kòrsou tambe komo un destinashon lider den Karibe pa evento deportivo internashonal.
E uniforme ofisial i pèchi (caps) di CBW 2026 a wordu diseñá pa e marka di bisti moderno Kokolishi, ku diseño di e hoben diseñadó Kòrsouano Kyrsten Viceisza. Pa sostené representashon di muhé den deporte, Curaçao Baseball Week Foundation a trese e umpire muhé internashonal Natola Hawthorne pa inspirá i empoderá muhénan ku ta aspirá un karera den beisbòl.
Klínikanan pa mucha, coach i umpire | 5–7 di yanüari 2026
Durante Curaçao Baseball Week, un gran kantidat di mucha lo partisipá den klínikanan di beisbòl gratuito. E klínikanan lo tuma lugá na:
- 5 i 6 di yanüari 2026 – Tio Daou Ballpark
- 7 di yanüari 2026 – Didi Deeds Field
Ademas, lo tin klínikanan spesialisá pa coachnan i umpirenan di 5 te ku 7 di yanüari 2026, tur anochi di 19:00 pa 22:00 na Tio Daou Ballpark.
E klínikanan aki ta wordu organizá den kolaborashon ku e Samba Foundation (Andrelton Simmons) i e Didi Deeds Foundation, ku ta sostené e mishon di CBW pa promové desaroyo
sostenibel di beisbòl. Durante tur e dianan di klínika lo tin posibilidat pa kumpra ‘merchandise’ ofisial di Curaçao Baseball Week.
Torneo di Gòlf | 3 di yanüari 2026
Komparti di Curaçao Baseball Week 2026, lo tuma lugá un Torneo di Gòlf di Benefisensia riba djasabra 3 di yanüari 2026 na Old Quarry Golf Course.
E torneo di gòlf aki tin un meta klaro: rekoudá fondo pa mucha i futuro peloteronan di beisbòl na Kòrsou. Tur e entrada ku ta bin for di e evento lo wordu usá pa kumpra material esenshal di beisbòl, manera bate, bala, helm i material di entrenamentu pa timnan juvenil riba e isla. E torneo aki ta un di e inisiativanan di rekoudamentu di fondo mas importante di CBW i ta reflehá e kompromiso kontinuo pa duna bèk na e komunidat di beisbòl.
Spònsernan i Partnernan
Curaçao Baseball Week 2026 ta posibel danki na e sosten generoso di su spònsernan i partnernan. Un danki spesial ta bai na:
PRGV, Courtyard by Marriott Curaçao, Curaçao Marriott Beach Resort, Curaçao Tourist Board (CTB), MVP Foundation, Atlantic Spine, Corendon, Aqualectra, Centro Gastrobar, Café Barista, Greenhouse, CAH, MLBPAA, Enterprise Car Rental, Coca-Cola, MCB, Old Quarry, Playball, The Wine Factory, Heineken / Distribier, Trupial Inn, Pit Smoker, Mustashi, Ròm Tambú, La Casa del Habano, Lovers, Ultimate Automobiles N.V. Curaçao, Acoya, Renaissance Wind Creek Curaçao Resort, Kokolishi, Ojomojo, ISG i Profound.
Inskripshon ta posibel ainda
Mas ku 800 mucha ya a inskribí pa Curaçao Baseball Week 2026, i tin ainda algun lugá disponibel.
Pa mas informashon tokante e programa, inskripshon òf Curaçao Baseball Week, bishitá www.curacaobaseballweek.com òf tuma kontakto via WhatsApp +599 9 525 4699.