HULANDA — Marciano Pikero, mihó konosí komo The Underdog Picaro, ta un luchadó Antiyano yen di orguyo ku ta karga su raisnan di Kòrsou den tur loke e ta hasi. Su historia ta un di disciplina, perseveransia i un pasion puro pa e deporte di lucha.
Na solamente sinku aña di edat, Marciano a kuminsá ku Muay Thai. Tres aña mas laat, ora ku tabata tin ocho aña, el a sigui desarrollá su mes den boxeo olímpiko, miéntras ku al mes el a keda aktivo den kickboxing. Pronto a bira kla ku e tabata tin un talento ekscepcional.
Den e deporte di kickboxing, Pikero a logra gran eksitos. El a bira tantu kampion Hulandes komo kampion Europeo, prestashonnan ku a pone su nòmber firme den e mapa di deporte. Ora ku el a yega na e edat korekto pa participa kompletamente den kompetishonnan ofisial di boxeo, el a hasi un desishon konsiente pa enfoká su mes kompletamente riba boxeo olímpiko.
Tambe den e ring di boxeo, Marciano a sigui kolektá títulonan. Tantu zilver komo Oro.
El a bira Open Zuid-Nederlands kampion i Zuid-Nederlands kampion, sigui pa eksitos nasional manera kampion Hulandes B-klase (80 kg+) i kampion hulandes hóbèn A-klase (80 kg). Huntu ku e seleksion di boxeo Hulandes, el a gana tambe oro durante e torneo internashonal Fight for Liège na Bélgika.
Ademas, Marciano ta un miembro di e Euregio Team, un selekto tim di e mihó boxeadónan di Hulanda ku ta keda aktivo den e Oberliga internashonal, unda timnan di diferente paisnan ta kompetí entre nan mes. Den e temporada 2025, Marciano a wordu distinguí ku un premio pa mayor kantidat di punto gana, un rekonosimentu pa su nivel konstante i su influhensia den e kompetishon.
Den e komunidat Antiyano di Kòrsou i Boneiru, ku un gran sosten for di famianan Pikero, Kroon, Peny, e apoyo pa The Underdog Picaro ta sigui kresé. Miéntras ku e ta prepará su mes pa su próximo wega riba 24 di yanüari, Marciano ta sinti su mes sostení pa su raisnan, su famia i su fanátikonan. Pa Kòrsou i Boneiru, Marciano Pikero ta un ehempel inspiradó di kon luchadónan Antiyano por hasi nan mes konosí na nivel internashonal sin lubidá nan raisnan.