WILLEMSTAD — Stichting Blue Wave Curaçao ta enfatisá ku nan no tabatin den nan maneho plakanan di spònser di e aktual spònsernan di e selekshon nashonal di futbòl di Kòrsou. Esaki no tabata e kaso na aña 2024, ni tampoko na aña 2025.
Stichting Blue Wave Curaçao a keda lantá riba 13 di yüni 2024 na Hulanda i tabatin komo su sede statutario ‘s-Gravenhage. E fundashon a wòrdu kreá ku e meta prinsipal: “Atkerí rekursonan dor di entre otro atraé fondonan i spònsernan, pa sostené aktividatnan ku ta kontribuí na e finansiamentu di partisipashon di e selekshon nashonal di Kòrsou na torneonan internashonal.”
Direktiva
Na momentu ku a funda e organisashon e direktiva tabata konsistí di:
- Gilbert Martina – presidente
- Lindomar Scoop – tesorero
- Ernst Lighart – sekretario
- Tarzeno Cirkens – miembro di Direktiva.
Den un fase poko mas despues Charles Grootens i Job van Beekhoven a drenta komo miembronan di direktiva. E aktual direktiva di e fundashon ta konsistí di:
- Tarzeno Cirkens – presidente
- Lindomar Scoop – tesorero
- Charles Grootens – sekretario
- Job van Beekhoven – miembro di Direktiva.
Motibu i konteksto.
E fundashon a keda lantá ku bista riba e trayekto pa kualifikashon pa Mundial 2026 di e selekshon di Kòrsou i tambe teniendo kuenta ku e krisis den direktiva di FFK durante aña 2024, ku finalmente a kondusí na intervenshon dor di FIFA, atraves di e Komishon di Normalisashon. E sirkunstansianan menshoná tabata hasi e proseso pa atraé spònsernan difísil i kompliká.
Un kantidat di potensial spònser no tabatin sufisiente konfiansa den e trayekto. Pa e grupo chikitu di spònser ku sí tabatin konfiansa, deposita plaka dirèkt riba e kuenta bankario di FFK no tabata un opshon pa motibu di:
- E krísis den direktiva di FFK andando.
- Debenan habrí di FFK na kreditornan na e suma di mas o ménos XCG 1,4 mion.
E fundashon a wòrdu kreá ku e propósito pa ofresé spònsernan e garantia ku nan kontribushon:
- ta gosa di tur seguridat, i ku
- lo keda usá solamente pa gastunan di e selekshon nashonal den kuadro di e kualifikashon pa e WK, anto no pa paga debenan eksistente di FFK.
No a manehá plakanan di spònser.
Pa motibu di e proseso di Know Your Customer (KYC) dirigí tantu riba bankonan ulandes komo lokal ku a dura mas ku 8 luna, Stichting Blue Wave Curaçao finalmente a logra habri solamente un kuenta bankario serka un banko lokal. Ni riba e kuenta bankario lokal di e fundashon i ni tampoko di otro manera no a tene transakshon finansiero, komo tal transakshonnan finansiero no a kana via e kuenta akí di e fundashon i tampoko no tin kuenta di ganashi ni pèrdida, ni balansa.
Durante e periodo ku mester a warda pa kuenta bankario a eligí un direktiva nobo di FFK dia 10 di aprel 2025. Ku esaki tur e opstákulonan ku tabatin serka hopi di e spònsernan pa manda plaka direktamente pa FFK a kai. Pa e motibu aki no a risibí ni manehá plaka di spònser via Stichting Blue Wave Curaçao, ni na 2024, anto tampoko na 2025.
Kambio di direktiva i disolvementu.
Señor Gilbert Martina a sali di su funshon komo presidente di Stichting Blue Wave Curaçao na febrüari 2025. Esaki tabata promé ku su kandidatura pa bira presidente di FFK. E presidensia di e fundashon a keda tumá over pa Tarzeno Cirkens. E aktual direktiva di e fundashon a disidí di disolvé e fundashon entrante 31 di desèmber 2025.
Responsabilisashon di kuenta di plakanan di spònser.
Tur plaka di spònser ku a wòrdu duná den kuadro di e kualifikashon pa WK di e selekshon nashonal di Kòrsou, lo wòrdu responsabilisá den su totalidat pa medio di e kuentanan anual 2024 i 2025 di FFK. E aktual direktiva di FFK ta trahando riba finalisashon di e kuenta anual atrasá di 2024 (premirá pa kuminsamentu di 2026) i lo prepará e kuenta anual 2025 na tempu, konforme loke statutonan ta preskribí. Stichting Blue Wave Curaçao ta suprayá ku nunka nan no a risibí, manehá ni gasta plakanan di spònser.